ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងជំនួបជាមួយរដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី០១ ខែកុម្ភៈ ថ្នាក់ដឹកនាំជាន់ខ្ពស់នៃក្រុមហ៊ុនផលិតរថយន្តរបស់ជប៉ុនចំនួន២ គឺ Ehime Nissan និង Forval Corporation បានបង្ហាញពីគម្រោងកិច្ចសហប្រតិបត្តិការបណ្តុះបណ្តាលជំនាញជួសជុលរថយន្តតាមបែបស្តង់ដារជប៉ុន ដល់យុវជនកម្ពុជា។
លោក Yutaka Oka ប្រធានក្រុមប្រឹក្សាភិបាលក្រុមហ៊ុន Ehime Nissan Group និងលោក Ken Matsumura ថ្នាក់ដឹកនាំជាន់ខ្ពស់នៃក្រុមហ៊ុន Forval Corporation បាននិយាយថា ក្រុមហ៊ុនរបស់ខ្លួនបានមកសិក្សាពីគុណវុឌ្ឍ និងសក្តានុពលរបស់កម្ពុជាលើការបណ្តុះបណ្តាលជំនាញបច្ចេកទេសជាពិសេសផ្នែកគ្រឿងយន្ត។ ដោយមើលឃើញពីសក្តានុពលរបស់យុវជនកម្ពុជា ក្រុមហ៊ុនមានបំណងចង់សហប្រតិបត្តិការលើការបណ្តុះបណ្តាលជំនាញឯកទេសរបស់ក្រុមហ៊ុន លើការជួសជុល ថែទាំរថយន្ត តោន បាញ់ថ្នាំ និងសេវាកម្មមួយចំនួនទៀតដែលមានកម្រិតស្តង់ដារ របស់ប្រទេសជប៉ុន។
ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានសម្តែងការស្វាគមន៍ និងគាំទ្រចំពោះបំណង នៃគំនិតផ្តួចផ្តើមរបស់ក្រុមហ៊ុនជប៉ុនទាំងពីរ ក្នុងការផ្តល់ជំនាញបច្ចេកទេសជួសជុល និងថែទាំរថយន្តកម្រិតស្តង់ដារជប៉ុននៅកម្ពុជា។ ក្នុងនោះបើតាមការបញ្ជាក់របស់ ឯកឧត្តមរដ្ឋមន្រ្តី ក្រសួងការងារ បានត្រៀមខ្លួនរួចជាស្រេចក្នុងដែនសមត្ថកិច្ចរបស់ខ្លួនដើម្បីជួយជ្រោមជ្រែងកិច្ចសហប្រតិបត្តិការមួយនេះឱ្យបានជោគជ័យ។
យោងតាមរបាយការណ៍របស់ក្រសួងសាធារណការ និងដឹកជញ្ជូន គិតត្រឹមឆ្នាំ២០២៣កន្លងទៅនេះ កម្ពុជាមានរថយន្តសរុបប្រមាណ ១លានគ្រឿងហើយត្រូវបានចុះបញ្ជី ។ មិនមានរបាយការណ៍ជាក់លាក់បង្ហាញពីចំនួនរថយន្តផលិតនៅប្រទេសជប៉ុនដែលបាននាំចូល និងប្រើប្រាស់នៅក្នុងប្រទេសកម្ពុជាទេ តែជាការកត់សម្គាល់គ្រួសារកម្ពុជាភាគច្រើននិយមចូលចិត្តប្រើប្រាស់រថយន្តផលិតនៅប្រទេសជប៉ុន៕
