ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – យុវជនយុវនារីជាសសរទ្រូង និងធនធានរបស់ប្រទេសជាតិនៅថ្ងៃអនាគតដែលមានតួនាទីក្នុងការអភិវឌ្ឍនខ្លួនឯងឱ្យមានជំនាញវិជ្ជាជីវៈពិតប្រាកដ ។ លើសពីនេះវិស័យការងារសម្រាប់យុវជននឹងមានការប្រែប្រួលទៅតាមការអភិវឌ្ឍប្រទេសជាតិដែលតម្រូវឱ្យយុវជនត្រូវខិតខំសិក្សារៀនសូត្រ ប្រកបដោយជំនាញពិតប្រាដក ។
ឯកឧត្ដមបណ្ឌិត សាន វឌ្ឍនា អនុរដ្ឋលេខាធិកាក្រសួងអប់រំ យុវជន និងកីឡា បានលើកឡើងថា យើងមិនអាចទាយដឹង ឬមើលឃើញអំពីសន្តិភាព ឬស្ថេរភាពរបស់ពិភពលោកបានទេ ប៉ុន្តែអ្វីដែលមនុស្សគ្រប់គ្នាអាចធ្វើបានគឺមានតែការខិតខំ និងចូលរួមពីសំណាក់មនុស្សគ្រប់គ្នា ជាពិសេសយុវជនដើម្បីអាចអភិវឌ្ឍន៍ប្រទេសជាតិបាន ។ ឯកឧត្ដមបណ្ឌិតបានបន្តថា គ្រប់ជំនាញសិក្សាទាំងអស់មិនថា ថ្នាក់បរិញ្ញាបត្រ ឬវគ្គសិក្សាខ្លីក្ដី សុទ្ធតែបានផ្ដល់សារៈសំខាន់ដល់យុវជនគ្រប់គ្នាឱ្យតែពួកគាត់អាចចាប់យកជំនាញនោះបានស្ទាត់ ។
លោកអនុរដ្ឋលេខាធិការក្រសួងអប់រំ យុវជន និងកីឡា រូបនេះបានបន្តថានៅពេលខាងមុខចំណុចសំខាន់ចំនួន០៤ដែលយុវជនគួរចាប់អារម្មណ៍ និងត្រៀមខ្លួនសម្រាប់ទីផ្សារការងារ ។ ដោយទី១ ទីផ្សារការងាររបស់មនុស្សកាន់តែមានតម្លៃ ព្រោះតម្រូវការធនធានមនុស្សដែលមានផលិតភាពការងារខ្ពស់ និងអាចដើរលឿនជាងបច្ចេកវិទ្យា ។ ទី២ ជាសត្យានុម័ត ការងារមួយចំនួនត្រូវបាត់បង់ហើយជំនួសដោយការងារមួយចំនួនផ្សេងទៀតរួមទាំងជំនាញវិជ្ជាជីវៈមួយចំនួនកើនឡើងផងដែរ ។ ទី៣ វិសមត្ថភាពសង្គម មានន័យថា គម្លាតនៃជំនាញវិជ្ជាជីវៈ និងវិស័យផ្សេងៗកើតឡើង ដូចនេះយុវជនត្រូវបង្កើនសមត្ថភាពច្បាស់លាស់ និងបន្តរៀនបន្ថែមសម្រាប់ខ្លួនឯងអាចគ្រប់គ្រងផលិតភាពការងារបានល្អប្រសើរ ។
ជាមួយគ្នានេះ ចំណុចទី៤ និយាមសង្គមថ្មី ឬបែបបទច្បាប់ជាច្រើននឹងកើតឡើង និងកាន់តែតឹងតែងជាងនេះ ដូច្នេះជាមួយនឹងការប៉ាន់ស្មានទាំង៤ខាងលើ វិស័យអប់រំនឹងវិនិយោគលើវិស័យចំនួន០៧សម្រាប់បណ្ដុះបណ្ដាលធនធានមនុស្ស ដោយទី១ ជំនាញផ្នែក Life-style (អាហារបំប៉ន ការថែរក្សាសុខភាព ការកម្សាន្ត និងផ្សេងៗ) ទី២ជំនាញផ្នែកហិរញ្ញវត្ថុ និងធនាគារ (ការធ្វើពាណិជ្ជកម្មឆ្លងដែន និងតំបន់នឹងកើនឡើងខ្ពស់ជាងមុន) ទី៣ ជំនាញផ្នែកទីក្រុងវ័យឆ្លាត និងនគររូបនីយកម្ម (ការបញ្ជូលខួរក្បាលសប្បនិមិត្ត បញ្ញាសប្បនិមិត្តដើម្បីដោះស្រាយបញ្ហាផ្នែកចររាចរណ៍ ការសាងសង់អគារជាដើម) ។ ទី៤ ជំនាញផ្នែកវេជ្ជសាស្ត្រ នឹងសិក្សាអំពីកើនឡើងហើយឯកទេសចំនួន៣ដែលនឹងមានតម្រូវការខ្លាំង គឺជំនាញវះកាត់បេះដូង ជំនាញខួរក្បាល និង វះកាត់តម្រងនោម នឹងមានទីផ្សារកាន់តែច្រើនព្រោះរបៀបរបបរស់នៅរបស់មនុស្សបច្ចុប្បន្នមានការប្រែប្រួលជាខ្លាំង ។ ទី៥ កសិកម្មវ័យឆ្លាត ទី៦ ការអប់រំឌីជីថល (Digital Education) និងទី៧ វិទ្យាសាស្ត្រនយោបាយ ជាពិសេសការប្រើប្រាស់ Big Data ការវិភាគទិន្នន័យ ចារកម្មព័ត៌មានវិទ្យា ។
ឯកឧត្ដមបណ្ឌិត សាន វឌ្ឍនា បានបន្ថែមថា ត្បិតលោកលើកឡើងចំណុច និងជំនាញខាងលើក៏ពិតមែន ប៉ុន្តែមិនបានន័យថា ជំនាញផ្សេងៗមិនមានទីផ្សារការងារនោះទេ ដោយវាអាស្រ័យទៅលើចំណូលចិត្តរបស់អ្នកសិក្សាផងដែរ ។
គួរបញ្ជាក់ដែរថា នេះជាការលើកឡើងរបស់ឯកឧត្ដម សាន វឌ្ឍនា នៅក្នុងវេទិកាសន្ទនាមតិក្រោមប្រធានបទ «ការកសាងអនាគតឱ្យកាន់តែភ្លឺស្វាង» ដែលរៀបចំដោយ SOMA Initiative កាលពីថ្ងៃទី០៦ ខែមីនា ឆ្នាំ២០២៣ ៕
