យុវជន​ដែល​មក​ពីគ្រួសារក្រីក្រ និង​គ្រួសារងាយរងហានិភ័យ និយាយថា កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស​ ១.៥លាននាក់ របស់រាជរដ្ឋាភិបាល បានផ្តល់នូវជំនាញ និងការងារសមរម្យ​ ព្រមទាំងប្រែក្លាយពួកគេ​ជាបុគ្គលបង្គោល​ក្នុងការ​ស្រោចស្រង់ជីវភាពគ្រួសារ។

ឈុត បញ្ញា ជាសិក្ខាកាម​កំពុង​សិក្សា​ជំនាញ​ថែទាំ និង​ជួសជុលរថយន្ត​ នៅ​វិទ្យាស្ថាន​ពហុបច្ចេកទេស​ខេត្តពោធិ៍សាត់ និយាយថា ការសិក្សា​ជំនាញ​របស់ខ្លួន​ក្នុងរយៈពេល​ជិត១ខែមកនេះ គឺដំណើរ​ការ​ល្អ ដោយ​គ្រូបង្រៀន​​បាន​ពន្យល់ក្បោះក្បាយទៅ​លើ​មុខវិជ្ជា ការបង្ហាញពីគ្រឿងឡាននានា ព្រមទាំង​មានការបង្រៀន​ជំនាញទន់ផងដែរ។

យុវជន បញ្ញា បញ្ជាក់ថា ការរៀនជំនាញកន្លងមក នេះធ្វើឱ្យខ្លួនកាន់តែមានចិត្តចង់សិក្សារៀនសូត្របន្ថែមទៀតដោយសារកម្មវិធីបង្រៀន បូករួមទាំងការអនុវត្តផ្ទាល់ផងដែរ។

ខ្ញុំរីករាយក្នុងការរៀនជំនាញបច្ចេកទេសនេះ ពីព្រោះការរៀននេះបានអនុវត្តផ្ទាល់ និងមានកម្មវិធីល្អៗក្នុងការបង្រៀនពីសំណាក់គ្រូៗរបស់យើងនៅក្នុងថ្នាក់

យុវជន ឈុត បញ្ញា

យុវជន ឈុត បញ្ញា បន្ថែមថា បន្ទាប់ពីរៀនចប់វគ្គជំនាញបច្ចេកទេសរយៈពេល៤ខែ ខ្លួននឹងអាចមានជំនាញមួយច្បាស់លាស់ មានការងារធ្វើសមរម្យ នឹងក្លាយជាបុគ្គលបង្គោលក្នុងការស្រោចស្រង់ជីវភាពគ្រួសារនៅពេលខាងមុខ។ ជាមួយគ្នា បញ្ញា ក៏​បានឱ្យដឹងដែឬថា ក្រោយ​រៀនចប់រយៈពេល៤ខែនេះ ខ្លួនគ្រោងដាក់ពាក្យធ្វើការនៅក្រុមហ៊ុនឯកជនដែលត្រូវនឹងជំនាញខ្លួន។

ដោយឡែកយុវជន ធឹង ណារ៉ូ ដែលជាសិក្ខាកាមកំពុងសិក្សាជំនាញនៅវិទ្យាស្ថានពហុបច្ចេកទេសភូមិភាគ​តេជោសែនឦសាន ស្ថិតក្នុងខេត្តកំពត និយាយថា ខ្លួនបានបោះបង់ចោល​ការ​សិក្សា ព្រោះតែគ្រួសារក្រីក្រ មិន​មានលទ្ធភាព​សម្រាប់ការ​សិក្សា​បន្ត, តែតាមរយៈកម្មវិធី​បណ្តុះបណ្តាល​ជំនាញវិជ្ជាជីវៈ និង​បច្ចេកទេស ដែលដាក់ចេញដោយរាជរដ្ឋាភិបាល ធ្វើ​ឱ្យ​ខ្លួន​មាន​ឱកាស​ចាប់យកជំនាញបច្ចេកទេស​លើសេវាកម្ម​បរិក្ខា​ត្រជាក់ ហើយ​បច្ចុប្បន្ន​រូប​គេ​ក៏​កំពុងសិក្សា​យ៉ាង​យកចិត្តទុកដាក់ផងដែរ។

យុវជន ណារ៉ូ បន្តថា ការ​សិក្សា​ជំនាញបច្ចេកទេសនេះ មិនត្រឹមតែមិនបង់ថ្លៃសិក្សា​នោះទេ ថែមទាំងទទួលបាន​ប្រាក់ឧបត្ថម្ភត្រឡប់​មក​វិញទៀត ។ យុវជននៅខេត្តកំពតរូបនេះ លើកឡើងថា ការមានជំនាញផ្ទាល់ខ្លួន គឺប្រសើរ​ជាង​ដើរស៊ីឈ្នួលគេ។

គួរជំរាបជូនថា រាជរដ្ឋាភិបាល​កម្ពុជា បានប្រកាស​ដាក់​ឱ្យ​ដំណើរ​ការ នូវ​កម្មវិធី​បណ្តុះបណ្តាល​ជំនាញវិជ្ជាជីវៈ និង​បច្ចេកទេស ដល់យុវជន​មក​ពី​គ្រួសារក្រីក្រ និង​គ្រួសារងាយរងហានិភ័យចំនួន ១.៥លាននាក់ កាលពីខែវិច្ឆិកា ឆ្នាំ២០២៣ ។ ក្នុងនោះ វគ្គទី១ បានបើកបវេសនកាល​កាលពីថ្ងៃទី១៥ ខែមករា ឆ្នាំ​២០២៤ ដោយមានសិក្ខា​កាមចូលរៀន​ចំនួន ១៥០០០នាក់។

សម្តេចបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា បានលើកទឹកចិត្ត​ដល់សិក្ខា​កាម​ទាំងអស់ ត្រូវ​យក​ចិត្តទុកដាក់​ខ្ពស់​ក្នុងការសិក្សា​ពីគ្រូជំនាញ និង​រក្សា​នូវ​គោល​ការណ៍ «ឱ្យចេះ ឱ្យចប់ ឱ្យមានការងារ» ដើម្បីអនុវត្ត​អំឡុងពេលសិក្សា​ជាប់ជាប្រចាំ៕