នៅក្នុងវេទិកាសន្ទនាយុវជនកម្ពុជា “តម្រង់ទិសខ្លួនឯងឆ្ពោះទៅរកភាពជោគជ័យនៅថ្នាក់ឧត្តមសិក្សា និងមាគ៌ាអាជីពដំបូង”  រៀបចំឡើងដោយ Giversify កាលពីថ្ងៃទី០៨ ខែធ្នូ ឆ្នាំ២០២៣កន្លងទៅ លោក សឿង សម្បត្តិ ស្ថាបនិក Giversify មានប្រសាសន៍ថា លោកចង់ឃើញយុវជនក្លាយជាអ្នកដឹកនាំដែលគិតគូរពីទំនួលខុសត្រូវសង្គមរួមគ្នា (CSR) នៅថ្ងៃអនាគត។

ស្ថាបនិក Giversify រូបនេះបន្ថែមថា វេទិកាសន្ទនាយុវជនកម្ពុជា ត្រូវ​បានរៀបចំឡើងក្នុងគោលបំណងចំនួន៣ គឺ ១. បង្កើតឱកាសដល់យុវជនដើម្បីសិក្សាពីគ្នាទៅវិញទៅមកពាក់ព័ន្ធនឹងការតម្រង់ទិសខ្លួនឯងឆ្ពោះទៅរកភាពជោគជ័យនៅថ្នាក់ឧត្តមសិក្សា និងមាគ៌ាអាជីពដំបូង ហើយត្រៀមខ្លួនឱ្យបានរួចរាល់ដើម្បីទទួលបានជោគជ័យ, ២. ជំរុញយុវជនគិតគូរពីអនាគតដែលពួកគេចង់សម្រេចបាន និង៣. ផ្តល់នូវភាពជាដៃគូរជាមូលដ្ឋានសម្រាប់ក្រុមហ៊ុនឯកជន សហគ្រាសសង្គម និងភ្នាក់ងារផ្តល់សេវាកម្មសង្គម ដើម្បីចូលរួមក្នុងការលើកម្ពស់វិស័យអប់រំ និងការងាររបស់យុវជនកម្ពុជា។

លោក សឿង សម្បត្តិ បញ្ជាក់បន្ថែមថា យុវជនបច្ចុប្បន្ន ជាពិសេសសិស្សទើបចប់ថ្នាក់ទី១២ ​មិនទាន់ទទួលបានព័ត៌មានគ្រប់គ្រាន់ក្នុងការជ្រើសរើសជំនាញសិក្សាឱ្យបានត្រឹមត្រូវ ។ ទន្ទឹមគ្នានេះ យុវជនភាគច្រើនចង់រៀនបណ្ដើរ និងស្វែងរកឱកាសការងារបណ្ដើរ ទើបវេទិកាសន្ទនាយុវជនកម្ពុជា រៀបចំឡើងសម្រាប់ពួកគាត់ក្នុងការពិភាក្សាជាមួយវាគ្មិនជំនាញ។

ស្ថាបនិកនៃក្រុមហ៊ុន Giversify លើកឡើងថា យុវជនជាអ្នកដឺកនាំ ជាម្ចាស់អាជីវកម្ម ឬដឹកនាំក្នុងក្រុមហ៊ុន រោងចក្រ សហគ្រាសធំៗនៅថ្ងៃអនាគត ដូច្នេះប្រសិនបើយុវជនបានបញ្ចូលទំនួលខុសត្រូវសង្គមរួមគ្នា (CSR) ក្នុងការសិក្សារបស់ខ្លួន ការងារស្ម័គ្រចិត្ត កន្លែងធ្វើការ នោះយុវជននឹងក្លាយជាអ្នកដឹកនាំដែលគិតគូរពីទំនួលខុសត្រូវសង្គមរួមគ្នា (CSR) នៅថ្ងៃអនាគត ។

«យើងរំពឹងវែងឆ្ងាយបែបនេះ យើងបង្កើនទំនួលខុសត្រូវសង្គមរួមគ្នា (CSR) តាមរយៈការធ្វើការជាមួយយុវជន»

លោក សឿង សម្បត្តិ ជាស្ថាបនិក Giversify

លោក សឿង សម្បត្តិ លើកឡើងទៀតថា មនុស្សម្នាក់ៗ ប្រជាជនម្នាក់ៗត្រូវតែមានទំនួលខុសត្រូវ ហើយក្រៅពីអ្វីដែលយុវជនអាចចូលរួមដោយផ្ទាល់បានដូចជា ការងារស្ម័គ្រចិត្ត សប្បុរសធម៌ ការមិនចោលសំរាមផ្ដេសផ្ដាស ការមិនបំផ្លាញភពផែនដី យុវជនក៏អាចជំរុញឱ្យក្រុមហ៊ុនក្នុងប្រទេសកម្ពុជាបញ្ចូលទំនួលខុសត្រូវសង្គមបានផងដែរ។ ឧទាហរណ៍ យុវជនគាំទ្រតែផលិតផលរបស់ក្រុមហ៊ុនណាដែលបានបញ្ចូលទំនួលខុសត្រូវសង្គមរួមគ្នា (CSR) នោះនឹងធ្វើឱ្យក្រុមហ៊ុនផ្សេងទៀតយកគំរូតាម។

បើតាម ស្ថាបនិក Giversify ការអប់រំត្រូវតែបញ្ចូលនូវចំណុចសំខាន់ៗមួយចំនួនទៀតរួមមាន ការអភិវឌ្ឍប្រកបដោយចីរភាព សារៈសំខាន់នៃការចូលរួមក្នុងសង្គម ព្រមទាំងការគិតគូរពីសហគមន៍ នោះយើងនឹងទទួលបានយុវជនមួយជំនាន់ទៀតជាអ្នកដឹកនាំដែលគិតគូរពីការអភិវឌ្ឍប្រកបដោយចីរភាពយ៉ាងពិតប្រាកដ។

គួរជម្រាបជូនថា សម្រាប់ទំនួលខុសត្រូវសង្គមនៃសាជីវកម្ម (CSR) វិញ គឺជាវិធីសាស្ត្រអាជីវកម្មមួយដែលក្រុមហ៊ុន ឬស្ថាប័នផ្សេងៗប្រើដើម្បីធានាថាការធ្វើជំនួញរបស់ខ្លួនបានគិតគូរការអភិវឌ្ឍន៍ប្រកបដោយចីរភាព សីលធម៌ និង គុណធម៌ ។ លើសពីនេះ CSR គឺជា ការដាក់បញ្ចូលការយកចិត្តទុកដាក់លើការអភិវឌ្ឍន៍សង្គម និងបរិស្ថានទៅក្នុងដំណើការអាជីវកម្មមួយ និងបង្កើតឱ្យមានការចូលរួមពីបុគ្គលិក និយោជិត សហជីព អតិថិជន អ្នកផ្គត់ផ្គង់ ពាណិជ្ជករ អង្គការ សង្គម ស៊ីវិល រដ្ឋាភិបាល និងសហគមន៍ជារួម៕