​សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី​ នៃកម្ពុជា កាលពីថ្ងៃទី១៥ ខែមករា ឆ្នាំ២០២៤ បានចូលរួមជាអធិបតី​ក្នុងពិធីចុះ​អនុស្សរណៈ​យោគយល់​​ ​(MoU)​ ចំនួន ​៦ រវាង​វិស័យ​ឯកជន​​កម្ពុជា និង​វិស័យ​ឯកជន​បារាំង ដោយក្នុងនោះ ក៏​មានកិច្ចព្រមព្រៀងរវាងក្រុមហ៊ុន OCIC និង Platform Impact ដើម្បីគាំទ្រ​ដល់​ការ​បង្កើត​សាលាបង្រៀន​សរសេរកម្មវិធីកុំព្យូទ័រ និងការអភិវឌ្ឍកម្មវិធី។

បើតាមសេចក្តីប្រកាស​របស់ក្រុមហ៊ុន OCIC ភាពជាដៃគូនេះ គឺមានគោលបំណងផ្តល់ការបង់ថ្លៃសិក្សាដោយឥតគិតថ្លៃដល់សិស្សមាន ឬគ្មានសញ្ញាបត្រ ដែលមានអាយុចាប់ពី ១៨ ឆ្នាំឡើងទៅ។ វិធីសាស្រ្តបង្រៀនគឺផ្អែកលើការរៀនពីមិត្តភ័ក្តិ ៖ គ្មានគ្រូ គ្មានការបង្រៀន និងការរៀនផ្អែកលើគម្រោង ក្នុងបរិយាកាសការរៀនបែបកម្សាន្ត ដើម្បីអភិវឌ្ឍជំនាញបច្ចេកទេស និងជំនាញទន់ដែលត្រូវការសម្រាប់សេដ្ឋកិច្ចឌីជីថល។

លោក Wisal Hin ប្រធានក្រុមហ៊ុន Platform Impact មានប្រសាសន៍ថា “យើងមានសេចក្តីរំភើបរីករាយជាខ្លាំងក្នុងការចាប់ដៃគូជាមួយក្រុមហ៊ុន OCIC ដើម្បីគាំទ្រដល់ការអភិវឌ្ឍន៍ជំនាញ” ។ លោកថា ការអប់រំគឺជាមូលដ្ឋានគ្រឹះនៃវឌ្ឍនភាព ហើយតាមរយៈការរួមបញ្ចូលភាពខ្លាំងរបស់យើង យើងអាចបង្កើតប្រសិទ្ធភាពយូរអង្វែងលើជីវិតរបស់សិស្ស ដោយផ្តល់ឱ្យពួកគេនូវជំនាញដែលត្រូវការសម្រាប់អនាគតដ៏ជោគជ័យ។

សម្រាប់លោក Thierry Tea អនុប្រធានក្រុមហ៊ុន OCIC Group បានលើកឡើងថា “ភាពជាដៃគូជាមួយ Platform Impact នេះស្របតាមការប្តេជ្ញាចិត្តនៃតម្លៃរួមរបស់យើងចំពោះការគាំទ្រគំនិតផ្តួចផ្តើមដែលមានឥទ្ធិពលវិជ្ជមានលើយុវជន ការអប់រំ និងបច្ចេកវិទ្យា ដែលទីបំផុតបានរួមចំណែកដល់អនាគតរបស់ប្រទេសកម្ពុជា ក៏ដូចជាការរីកចម្រើន និងការអភិវឌ្ឍន៍របស់ខ្លួន”។

យើងជឿជាក់លើឥទ្ធិពលនៃការអប់រំក្នុងការផ្លាស់ប្តូរសង្គម តាមរយៈការផ្តល់សិទ្ធិអំណាចដល់បងប្អូនជនរួមជាតិតាមរយៈការបង្កើនជំនាញ និងការកសាងឱកាស

លោក Thierry Tea អនុប្រធានក្រុមហ៊ុន OCIC

ការអភិវឌ្ឍន៍នៃសាលាបង្រៀនសរសេរកម្មវិធីកុំព្យូទ័រដែលបំផុសគំនិតដោយបារាំង នឹងបង្កើតឡើងក្នុងទីក្រុងកោះពេជ្រ ជាពិសេសមជ្ឈមណ្ឌល Connexion ដែលគ្រោងនឹងបើកដំណើរការក្នុងត្រីមាសទី 1 ឆ្នាំ 2024។

OCIC និយាយថា ការចុះអនុស្សារណៈយោគយល់ MOU នេះជាការចាប់ផ្តើមនៃដំណើរសហការ ដើម្បីពន្លឿនជំនាញឌីជីថលនៅកម្ពុជា៕