មជ្ឈមណ្ឌលសិក្សាសហគមន៍ ជាទីកន្លែងអប់រំក្រៅប្រព័ន្ធមួយដែលមានទីតាំងស្ថិត​នៅតាមភូមិ តំបន់ប្រជុំជន វត្តអារាម ដែលត្រូវបានបង្កើតឡើងដោយប្រជាពលរដ្ឋ គ្រប់គ្រងដោយប្រជាពលរដ្ឋក្នុងសហគមន៍ ដើម្បីផ្ដល់ឱកាសរៀនសូតសម្រាប់ការអភិវឌ្ឍសហគមន៍ និងការកែប្រែគុណភាពរស់នៅ នៃជីវិតរស់នៅប្រចាំថ្ងៃរបស់ប្រជាពលរដ្ឋ។

ជាគោលការណ៍មជ្ឈមណ្ឌលសិក្សាសហគមន៍ ផ្ដោតសំខាន់ចំពោះប្រជាពលរដ្ឋជាស្ត្រី កុមារ និងយុវជនក្រៅសាលា ដើម្បីផ្ដល់ឱកាសដល់ពួកគេក្នុងការទទួលយកចំណេះដឹងការអប់រំបច្ចេកទេស សម្រាប់យកទៅប្រកបរបរចិញ្ចឹមជីវិតក្នុងជីវិតរស់នៅប្រចាំថ្ងៃ។

ជាមួយគ្នានេះ ការប្រែក្លាយឱ្យទៅជាមជ្ឈមណ្ឌលអប់រំពេញមួយជីវិត សំដៅ ជាកន្លែងសម្រាប់ផ្ដល់សេវាសិក្សាពេញមួយជីវិតដល់ពលរដ្ឋគ្រប់រូប ផ្ដល់ឱកាសសិក្សា និងបណ្ដុះបណ្ដាលជំនាញមុខរបរ និងជាវេទិកាជួបជុំរបស់ប្រជាសហគមន៍ផ្សព្វផ្សាយសកម្មភាពវប្បធម៌សង្គម និងបន្តអនុវត្តកម្មវិធីអប់រំក្រៅប្រព័ន្ធនិងកម្មវិធីអប់រំផ្សេងៗទៀត។

បើតាមផែនការយុទ្ធសាស្រ្តវិស័យអប់រំ ឆ្នាំ២០២៤-២០២៨ ដើម្បីជំរុញមជ្ឈមណ្ឌលសិក្សាសហគមន៍ឱ្យដំណើរការល្អ និងប្រែក្លាយជាមជ្ឈមណ្ឌលអប់រំពេញមួយជីវិតទាមទារនូវកត្តាជាច្រើនរួមមាន ៖

ទី១. ការបំពេញបន្ថែមលើកម្មវិធីសិក្សាសាលារៀនសាធារណៈ ៖ ស្របតាមតម្រូវការជាក់ស្តែងរបស់យុវជន និងសិស្ស ដូចជាកម្មវិធីបណ្ដុះបណ្ដាលភាសាបរទេស បច្ចេកវិទ្យា ព័ត៌មានវិទ្យា ការបណ្ដុះបណ្តាលជំនាញ និងការបើកវគ្គខ្លីៗសម្រាប់យុវជន និងសិស្សចំណេះទូទៅ ព្រមទាំងមានវិធីសាស្ត្រទាក់ទាញសិស្សឱ្យមករៀន។

ទី២. ការផ្សារភ្ជាប់កម្មវិធីបណ្តុះបណ្តាលជាមួយតម្រូវការជាក់ស្តែងក្នុងសហគមន៍ ៖ ការសិក្សាតម្រូវការមជ្ឈមណ្ឌលទីផ្សារ ការបណ្ដុះបណ្តាលជំនាញកសិកម្ម និងការរៀបចំកម្មវិធីប្រកបដោយភាពច្នៃប្រឌិតនិងសិក្សាពេញ នវានុវត្តន៍ ដូចជាវគ្គខ្លីៗខាងផ្នែកគរុកោសល្យ សិប្បកម្មដែក ការផលិតវីដេអូ ការបណ្ដុះបំណិនមួយជីវិត រកប្រាក់ចំណូលជាដើម។

ទី៣. ការចូលរួម និងការសហការ ៖ ការបង្កើតគណៈកម្មការគ្រប់គ្រង ដែលសកម្ម និងមានមនសិការខ្ពស់ ដោយមានការចូលរួមពីយុវជនស្ម័គ្រចិត្ត និងការគាំទ្រពីនាយកដ្ឋានអប់រំក្រៅប្រព័ន្ធ និងអង្គការដៃគូ ដូចជាអង្គការ ឌីវីអន្តរជាតិ ព្រមទាំងធ្វើការអភិវឌ្ឍសមត្ថភាពគណ:កម្មការគ្រប់គ្រងឱ្យមានសមត្ថភាពពេញលេញទាំងជំនាញទន់ និងជំនាញរឹង។

ទី៤. ការធានានិរន្តរភាព ៖ តាមរយៈការផ្តល់ថវិការដ្ឋ ការបង្កើតសកម្មភាពរកចំណូល ដើម្បីទ្រទ្រង់មជ្ឈមណ្ឌលសិក្សាពេញមួយជីវិត ការកៀរគរធនធានពីប្រភពផ្សេងៗ និងការលើកទឹកចិត្តដល់បុគ្គលិក។

គួរជម្រាបជូនថា ក្រោយពីដាក់ចេញនូវគោលនយោបាលជាតិមក មជ្ឈមណ្ឌលសិក្សាពេញមួយជីវិតត្រូវបានសាងសង់ឡើងបានចំនួន២០កន្លែងហើយ ដែលគិតជាទឹកប្រាក់ប្រមាណជិត៤លានដុល្លារ និងបានចូលរួមសង្រ្គោះកុមារបោះបង់ចោលសាលា និងប្រជាជនងាយរងគ្រោះមិនចេះអក្សរ និងក្រីក្រប្រមាណពីរម៉ឺននាក់៕