ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ខណៈសន្ទុះនៃការប្រើប្រាស់រថយន្តដើរដោយថាមពលអគ្គិសនី ឬដែលគេហៅថា EV Car កំពុងតែមានសន្ទុះកាន់តែច្រើននៅក្នុងប្រទេសកម្ពុជា ក្រសួងការងារ និងបណ្តុះបណ្តាលវិជ្ជាជីវៈ គ្រោងនឹងដាក់បញ្ចូលកម្មវិធីសិក្សាលើការជួសជុល និងថែទាំរថយន្តអគ្គិសនី ទៅក្នុងជំនាញជួសជុលរថយន្ត នៅគ្រប់គ្រឹះស្ថាន TVET ទាំងអស់។
ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ការប្រើប្រាស់រថយន្តអគ្គិសនី ឬ EV Car គឺជាចលនាមួយដែលមិនអាចទប់ស្កាត់បានទេ ដោយសារតែបច្ចុប្បន្ន រថយន្តដែលប្រើប្រាស់បច្ចេកវិទ្យាថាមពលអគ្គិសនី គឺកាន់តែច្រើនទៅៗ ហើយគុណភាពនៃការប្រើប្រាស់រថយន្តនេះ ក៏កាន់តែធុន និងបើកបរកាន់តែបានឆ្ងាយ ។ ជាមួយគ្នានេះ ជាការជួយដល់រាជរដ្ឋាភិបាលក្នុងការសម្រេចបាននូវគោលនយោបាយជាតិ ស្ដីពីការអភិវឌ្ឍវិស័យយានយន្តអគ្គិសនី ២០២៤-២០៣០ ក្រសួងការងារនឹងធ្វើការបណ្តុះបណ្តាលធនធានមនុស្ស ឱ្យចេះជួសជុល ឱ្យចេះថែទាំ ហើយនឹងចេះគ្រប់គ្រងទៅលើគ្រឿងយន្ត ក៏ដូចជាម៉ាស៊ីនដែលប្រើប្រាស់ដោយអគ្គិសនីនេះ។
“ក្នុងរយៈពេល១ ទៅ២ឆ្នាំទៀត គឺទីផ្សារ EV នឹងច្រើន ដូច្នេះយើង ទាំងអស់គ្នាដែលជាអ្នកមានជំនាញ ខាងផ្នែក EV បើទោះបីជាធ្វើការនៅការ៉ាស់ ក៏ការ៉ាសនឹងមានអតិថិជនដែលមានរថយន្ត EV កាន់តែច្រើន”
យោងតាមគោលនយោបាយជាតិ ស្តីពីការអភិវឌ្ឍវិស័យយានយន្តអគ្គិសនី ២០២៤-២០៣០ កម្ពុជាបានបង្ហាញពីការប្តេជ្ញាចិត្ត ដោយបង្កើនការប្រើប្រាស់យានយន្តអគ្គិសនីដែលបានកំណត់ការប្រើប្រាស់ទោចក្រយានយន្តអគ្គិសនីឱ្យបាន ៧០% និងរថយន្តអគ្គិសនីឱ្យបាន ៤០% នៅត្រឹមឆ្នាំ២០៥០ ក្នុងគោលដៅសម្រេចបានអព្យាក្រឹតកាបូន។
ជាមួយគ្នានេះ បើយោងតាមរបាយការណ៍របស់ក្រសួងសាធារណការ និងដឹកជញ្ជូន គិតត្រឹមខែមិថុនា ឆ្នាំ ២០២៤នេះ យានយន្តអគ្គិសនីដែលបានចុះបញ្ជីជាផ្លូវការ មានចំនួនសរុប ២ ៩៦៨គ្រឿង ដោយក្នុងនោះរួមមាន ទោចក្រយានយន្តចំនួន ៩១៤គ្រឿង ត្រីចក្រយានយន្តចំនួន ៤៤០គ្រឿង និងរថយន្តចំនួន ១ ៦១៤គ្រឿង។ រីឯទីតាំងបញ្ចូលថាមពល គិតត្រឹមដើមឆ្នាំ ២០២៤នេះ មានចំនួន ២១កន្លែង ដែលមានទូបញ្ចូលថាមពលអគ្គិសនីលឿនខ្លាំងសរុបចំនួន ២៧គ្រឿង។
តាមក្រសួងសាធារណការ និងដឹកជញ្ជូន ការចុះបញ្ជីយានយន្តអគ្គិសនីមានការកើតឡើងជារៀងរាល់ថ្ងៃ ដោយប្រជាពលរដ្ឋមានសុទិដ្ឋនិយមច្រើន និងបង្ហាញការចាប់អារម្មណ៍ខ្ពស់ចំពោះការប្រើប្រាស់យានយន្តអគ្គិសនី ដែលជានិន្នាការថ្មី បើប្រៀបធៀបជាមួយការប្រើប្រាស់យានយន្តប្រើប្រាស់ប្រេងឥន្ធនៈចំហេះក្នុងដែលជានិន្នាការចាស់ ព្រោះតែការប្រើប្រាស់យានយន្តអគ្គិសនី ត្រូវបានគេមើលឃើញថា ចំណាយប្រចាំថ្ងៃតិច មានផាសុកភាព កម្រិតបំពុលក្នុងបរិយាកាសទាប ហើយលើសពីនេះ ក្រុមហ៊ុនយានយន្តខ្លះបានអះអាងពីកម្រិតនៃការបំភាយឧស្ម័នពុលកម្រិតសូន្យថែមទៀត។
បើតាម ឯកឧត្តម ហេង សួរ កាលពីប៉ុន្មានសប្តាហ៍មុននេះ រោងចក្រតម្លើងរថយន្តដឹកជញ្ជូនដោយប្រើថាមពលអគ្គិសនី ត្រូវបានបើកការដ្ឋានសាងសង់នៅខេត្តពោធិ៍សាត់, ឯកឧត្តមជឿជាក់ថា នៅពេលខាងមុខអាចនឹងមានរោងចក្រតម្លើងរថយន្តដើរដោយថាមពលអគ្គិសនីកាន់តែច្រើននឹងមានវត្តនៅកម្ពុជា ដូច្នេះ ឯកឧត្តមសង្ឃឹមថា យុវជន ក៏ដូចជាសិស្សានុសិស្សដែលកំពុងរៀននៅក្នុងថ្នាក់ជំនាញរថយន្ត នឹងយកចិត្តទុកដាក់ ហើយប្រែខ្លួនឱ្យទៅជាអ្នកដែលមានជំនាញមួយច្បាស់លាស់នៅក្នុងការថែទាំរថយន្ត ជាពិសេសរថយន្តបែបថ្មី ជាពិសេសរថយន្តអគ្គិសនី៕
