ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អគ្គនាយកក្រុមហ៊ុនវេសឡាញ អេឌ្យូខេសិន គ្រុប លោកឧកញ៉ា ប៉ិច បូឡែន មានប្រសាសន៍ថា ការងារអប់រំ និងវិស័យសុខាភិបាល គឺចាំបាច់ត្រូវដើរទន្ទឹមគ្នា ដើម្បីទទួលបាននូវមូលធនមនុស្សដែលពោរពេញដោយចំណេះដឹង បទពិសោធន៍ និងមានសុខភាពល្អ។ ប្រសាសន៍នេះ បានធ្វើឡើងក្នុងពិធីចុះអនុស្សរណៈយោគយល់គ្នា រវាងសាលារៀនវ៉េស្ទឡាញន៍សាខាតាខ្មៅ និងមន្ទីរព្យាបាល និងសម្ពពចតុមុខ កាលពីចុងសប្តាហ៍កន្លងទៅនេះ។
លោកឧកញ៉ា ប៉ិច បូឡែន មានប្រសាសន៍បន្តថា បញ្ហាសុខភាពរបស់សិស្សានុសិស្សគឺជារឿងសំខាន់ ព្រោះបើមានតែបញ្ញា តែមិនមានសុខភាពរាងកាយ សុខភាពផ្លូវចិត្តល្អទេ នោះសិស្សានុសិស្សក៏នឹងមិនអាចសម្របខ្លួនឱ្យជោគជ័យក្នុងអាជីវកម្ម ក៏ដូចជាអាជីពការងារនៅពេលអនាគតបានដែរ។
លោក ជា កញ្ញារិទ្ធិ នាយកសាលារៀនវ៉េស្ទឡាញន៍សាខាតាខ្មៅ មានប្រសាសន៍ថា សាលារៀនវ៉េស្ទឡាញន៍ បានគិតគូនិងផ្តោតជាសំខាន់ទាំងសេវាអប់រំ និងការថែទាំសុខភាព ដោយសាលាមានគិលានុបដ្ឋាយិកា និងគ្រូពេទ្យដាច់ដោយឡែក សម្រាប់ថែទាំសុខភាពសិស្ស ក៏ដូចជាប្រឹក្សាសុខភាពផ្លូវចិត្ត ។ លោកថា ការចុះអនុស្សរណៈយោគយល់គ្នា រវាងសាលារៀនវ៉េស្ទឡាញន៍តាខ្មៅ និងមន្ទីរព្យាបាល និងសម្ពពចតុមុខ គឺស្តែងចេញពីការយកចិត្តទុកដាក់របស់សាលា ទាំងគុណភាពអប់រំ និងសុខភាពរបស់សិស្សានុសិស្សទាំងអស់។
សម្រាប់លោក ឈឿន ប៊ុណ្ណារិទ្ធ នាយកប្រតិបត្តិមន្ទីរសម្រាកព្យាបាល និងសម្ពព ចតុមុខ មានប្រសាសន៍ថា មន្ទីរព្យាបាលចតុមុខ បានបើកដំណើរការអស់រយៈពេលប្រមាណ៥ឆ្នាំមកហើយ ដោយមាននូវសេវាជាច្រើនដូចជាជំងឺទូទៅ សម្ពព និងជាពិសេសជំងឺកុមារ, លោកថា ការចុះអនុស្សរណៈយោគយល់គ្នារវាងមន្ទីរព្យាបាល និងសម្ពព ចតុមុខ និងសាលារៀនវ៉េស្ទឡាញន៍ សាខាតាខ្មៅ គឺជាឱកាសក្នុងការសហការផ្តល់នូវសេវាថែទាំសុខភាព ទាំងបញ្ញាស្មារតីផងដែរ ជូនដល់សិស្សានុសិស្សដែលបានសិក្សានៅសាលារៀនវ៉េស្ទឡាញន៍។ បើតាមលោក ប៊ុណ្ណារិទ្ធ ការចុះអនុស្សរណៈយោគយល់គ្នានេះ ក៏ផ្តល់ផងដែរនូវអត្ថប្រយោជន៍ដល់អ្នកអាណាព្យាបាលដូចគ្នា៕
