ភ្នំពេញ – រដ្ឋាភិបាលជប៉ុនបានឯកភាពផ្តល់ជំនួយឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ គូសាណូណិ នូវថវិកាសរុបចំនួន ៣០០,៧៧៩ ដុល្លារអាមេរិក សម្រាប់គម្រោងសាងសង់អគារសិក្សានៅសាលាបឋមសិក្សាក្នុងស្រុកបន្ទាយអំពិល ខេត្តឧត្តរមានជ័យ និងគម្រោងសាងសង់អគារសិក្សានៅសាលាបឋមសិក្សាភ្នំរអិលក្នុងស្រុកព្រែកប្រសព្វ ខេត្តក្រចេះ ព្រមទាំងគម្រោងទិញម៉ាស៊ីនផលិតឧបករណ៍សិប្បនិម្មិត និងឧបករណ៍ព្យាបាលដោយចលនានៅមជ្ឈមណ្ឌលជាតិស្តារលទ្ធភាពពលកម្មជនពិការគៀនឃ្លាំង ។

កិច្ចសន្យាផ្តល់ជំនួយឥតសំណងនេះ បានចុះហត្ថលេខាដោយលោក អ៊ូអិណុ អាត់ស៊ូស៊ី ឯកអគ្គរាជទូតជប៉ុន ប្រចាំកម្ពុជា និងអ្នកតំណាងស្ថាប័នទទួលជំនួយទាំងបីកាលពីរសៀលថ្ងៃទី០៦ ខែមីនាកន្លងទៅ ។ ទន្ទឹមគ្នានេះ ឯកអគ្គរាជទូតជប៉ុន ប្រចាំកម្ពុជា ក៏បានលើកឡើងថា ប្រទេសកម្ពុជាបាននឹងកំពុងអភិវឌ្ឍយ៉ាងឆាប់រហ័ស។ ទោះយ៉ាងណា យើងក៏ទទួលស្គាល់ថា នៅតែមានបញ្ហាប្រឈមមួយចំនួនដែលត្រូវដោះស្រាយ ដើម្បីកែលម្អគុណភាពជីវិតរបស់ប្រជាជន។ ជប៉ុននឹងបន្តចូលរួមចំណែកក្នុងការដោះស្រាយបញ្ហាប្រឈមទាំងនោះ តាមរយៈគ្រោងការណ៍ជំនួយអភិវឌ្ឍន៍ផ្លូវការផ្សេងៗ រួមទាំងជំនួយគូសាណូណិ ។

ចំពោះគម្រោងសាងសង់អគារសិក្សានៅសាលាបឋមសិក្សាក្នុងស្រុកបន្ទាយអំពិល ខេត្តឧត្តរមានជ័យ មានទំហំថវិកាប្រមាណជាង ១២ម៉ឺនដុល្លារ ត្រូវផ្តល់ដល់មន្ទីរអប់រំ យុវជន និងកីឡា ខេត្តឧត្តរមានជ័យ ដើម្បីសង់អគារសិក្សា ១ខ្នងមានប្រាំបន្ទប់ និងបំពាក់ដោយគ្រឿងសង្ហារឹមសាលារៀន នៅសាលាបឋមសិក្សារំដួល ក្នុងស្រុកបន្ទាយអំពិល ដែលនឹងផ្តល់អត្ថប្រយោជន៍ដល់សិស្សប្រមាណ ២២០នាក់ និងគ្រូបង្រៀនចំនួនប្រាំបួននាក់ តាមរយៈការកែលម្អគុណភាពអប់រំ។

ចំណែកគម្រោងទី២ សាងសង់អគារសិក្សានៅសាលាបឋមសិក្សាភ្នំរអិលក្នុងស្រុកព្រែកប្រសព្វ ខេត្តក្រចេះ មានទំហំថវិកា ៩ម៉ឺនដុល្លារ ផ្តល់ដល់មន្ទីរអប់រំ យុវជន និងកីឡាខេត្តក្រចេះ ដើម្បីសាងសង់អគារសិក្សា ១ខ្នងប្រាំបន្ទប់ បង្គន់អនាម័យ ១ខ្នងមានបីបន្ទប់ និងការដំឡើងគ្រឿងសង្ហារឹមសាលារៀន ដូចជាតុ កៅអី និងក្តារខៀន ដែលនឹងផ្តល់អត្ថប្រយោជន៍ដល់សិស្សសរុបចំនួន ២៦៦នាក់ និងគ្រូបង្រៀនចំនួនប្រំាពីរនាក់ ។

រីឯគម្រោងទី៣ មានទំហំថវិកាជាង ៨ម៉ឺនពាន់ដុល្លារ សម្រាប់គម្រោងទិញម៉ាស៊ីនផលិតឧបករណ៍សិប្បនិម្មិតនិងឧបករណ៍ព្យាបាលដោយចលនា ១១ប្រភេទ នៅមជ្ឈមណ្ឌលជាតិស្ដារលទ្ធភាពពលកម្មជនពិការគៀនឃ្លាំង រាជធានីភ្នំពេញ ។ តាមគម្រោងនេះ នឹងផ្តល់អត្ថប្រយោជន៍ដល់ប្រជាជនដែលត្រូវការឧបករណ៍សិប្បនិម្មិតរណប ឬសេវាស្តារនីតិសម្បទានៅមជ្ឈមណ្ឌលនេះ មានចំនួនប្រមាណ ៩០០នាក់ក្នុងមួយឆ្នាំ ។

គួរបញ្ជាក់ថា ចាប់តាំងពីឆ្នាំ១៩៩១ រដ្ឋាភិបាលជប៉ុន បានផ្ដល់ថវិកាជាង ៦៦លានដុល្លារដល់អាជ្ញាធរមូលដ្ឋាន និងអង្គការក្រៅរដ្ឋាភិបាល ដើម្បីអនុវត្តគម្រោងគូសាណូណិចំនួន ៧០២ គម្រោងនៅទូទាំងប្រទេសកម្ពុជា ។ ជំនួយឥតសំណងគូសាណូណរបស់ជប៉ុន មានគោលបំណងគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការអភិវឌ្ឍន៍ និងស្ថាបនាប្រទេសឡើងវិញនៅតាមកម្រិតមូលដ្ឋាន ដោយទិសដៅជួយការពារជនងាយរងគ្រោះពីកត្តាមួយចំនួនដូចជា ភាពក្រីក្រ ឬភាពអកុសលនានាដែលអាចគំរាមកំហែងដោយផ្ទាល់ដល់អាយុជីវិត ជីវភាពរស់នៅ និងសេចក្ដីថ្លៃថ្នូររបស់ពួកគេ ព្រមទាំងជួយជំរុញភាពម្ចាស់ការលើខ្លួនឯងរបស់ប្រជាសហគមន៍ ៕