ក្នុងពិធីចែកវិញ្ញាបនបត្រ​ថ្នាក់ទី១២ ដល់សិស្សានុសិស្សនៃបណ្តាញ​សាលា​រៀនវ៉េសឡាញន៍ កាលពីថ្ងៃអាទិត្យ (២២ កញ្ញា) លោកឧកញ៉ា ប៉ិច បូឡែន អគ្គនាយកក្រុមហ៊ុនវេសឡាញ អេឌ្យូខេសិន គ្រុប បានលើកទឹកចិត្តដល់សិស្សានុសិស្សដែលនឹងប្រឡង​សញ្ញាបត្រ​មធ្យមសិក្សា​ទុតិយភូមិ​នាពេលខាងមុខ គួរ​គិត​ទៅ​លើ​ការ​រៀនជំនាញ​បច្ចេកទេស និង​វិជ្ជាជីវៈ ខណៈ​ជំនាញទាំងនេះ នឹងជួយ​ក្នុងការ​ជំរុញ​សេដ្ឋកិច្ចប្រទេស​កម្ពុជា។

ឧកញ៉ា ប៉ិច បូឡែន មានប្រសាសន៍ថា ជាទិសដៅ​សេដ្ឋកិច្ច​របស់​ប្រទេស​កម្ពុជា គឺការជំរុញ​ទៅ​លើផ្នែក​កសិឧស្សាហកម្ម ផ្នែក​ឧស្សាហកម្មកែច្នៃ ក៏​ដូចជា​ទេសចរណ៍​ជា​ដើម ដូច្នេះ​សម្រាប់​ក្មួយៗទោះជាប់សញ្ញាបត្រ​បាក់ឌុប ឬក៏ថ្លោះធ្លោយ​មិន​ជាប់ក៏​ដោយ សូម​គិត​ទៅ​លើសញ្ញាបត្រ​​បណ្តុះបណ្តាល​បច្ចេកទេស និង​វិជ្ជាជីវៈ ហើយ​កុំគិតថា ការ​រៀនជំនាញបច្ចេកទេស និង​វិជ្ជាជីវៈ គឺសម្រាប់តែអ្នក​ដែល​រៀន​ធ្លាក់ ឬ​រៀន​សូត្រមិនបាន។ លោកឧកញ៉ាបញ្ជាក់ថា បច្ចុប្បន្ន​កម្ពុជា​កំពុង​តែ​ត្រូវ​ការអ្នកដែលមានជំនាញបច្ចេកទេស ដូចជា អ្នកបច្ចេកទេស​អគ្គិសនី អ្នក​បច្ចេកទេសទឹក ភ្លើង អគារ សំណង់ អ្នក​បច្ចេកទេស​ផ្នែក​ឧស្សាហកម្ម ក៏​ដូចជា​ការ​កែច្នៃអាហារជាដើម ខណៈ​ប្រទេស​កម្ពុជា​ កំពុងឈាន​ទៅ​រក​ប្រទេស​ដែលមានចំណូលមធ្យមកម្រិតខ្ពស់​នៅឆ្នាំ​២០៣០ និង​ជា​ប្រទេស​ដែលមានចំណូលខ្ពស់នៅឆ្នាំ២០៥០។

“…មាន​អាជីពជាច្រើន​ដែលត្រូវការ​កូនក្មួយ ហើយ​ក៏​មានផល​សេដ្ឋកិច្ចជាច្រើនដែលរង់ចាំកូនក្មួយ កុំសម្រុក​នាំគ្នាទៅរៀនតែផ្នែកសង្គម ឬក៏សញ្ញាបត្រ​ទូលំទូលាយ តែអត់មានគំនិតច្បាស់ នៅពេលហ្នឹងកូននឹងមានបញ្ហាត្រឡប់ទៅវិញ នៅពេល​ចេញពីមហាវិទ្យាល័យ គឺពិបាក​នៅក្នុងអាជីពមួយចំនួនដែលអត់មានតម្រូវការ​ទៅវិញ…”

ការអប់រំ​បណ្តុះបណ្តាលបច្ចេកទេស និង​វិជ្ជាជីវៈ គឺជា​កត្តា​មិន​អាច​ខ្វះ​បាន​ក្នុងការ​អភិវឌ្ឍ​សេដ្ឋកិច្ច​សង្គម និង​ជំរុញ​ឱ្យ​អ្នក​សិក្សា​ទទួល​បាន​នូវ​ចំណេះដឹង ជំនាញ​បច្ចេកទេស​ជាមួយ​សមត្ថភាព ដើម្បី​ក្លាយ​ខ្លួនជា​ពលករ​ជំនាញ អ្នក​បច្ចេកទេស ដែលចូលរួម​ចំណែក​យ៉ាង​សំខាន់​ក្នុងការ​អភិវឌ្ឍ​សង្គម និង​សេដ្ឋកិច្ច​ជាតិ។ តាមរបាយការណ៍​របស់ក្រសួងការងារ និង​បណ្តុះបណ្តាលវិជ្ជាជីវៈ កាលពីឆ្នាំ២០២៣ មានសិស្សនិស្សិតសរុប​ប្រមាណ ជាង៥ម៉ឺននាក់​ប៉ុណ្ណោះ ដែលបា​នចុះ​ឈ្មោះ​ចូលរៀន​ជំនាញ​បច្ចេកទេស និង​វិជ្ជាជីវៈ ខណៈ​របាយ​ការណ៍​របស់ក្រសួងអប់រំ យុវជន និងកីឡា បង្ហាញថា នៅឆ្នាំដដែល​នោះមាននិស្សិត​ចុះឈ្មោះ​ចូលរៀន​ថ្នាក់ឧត្តមសិក្សា​ប្រមាណ ២០ម៉ឺននាក់។

យ៉ាងណាក៏ដោយជាមួយនឹងការ​លើកទឹកចិត្ត​ដល់សិស្សានុសិស្សឱ្យ​គិតគូរពីការសិក្សាជំនាញបច្ចេកទេស និង​វិជ្ជាជីវៈ លោកឧកញ៉ា ប៉ិច បូឡែន ក៏​បានផ្តល់ជាគន្លឹះខ្លះៗដែល​មូលដ្ឋាន នៃភាពជោគជ័យក្នុងអាជីពការងារ ដល់សិស្សានុសិស្សក្រោយបញ្ចប់ការ​សិក្សា ។ លោកឧកញ៉ា មានប្រសាសន៍ថា ដើម្បីជោគជ័យ​ក្នុងជីវិត យុវជន​ត្រូវមាន ចំណង់ ចំណេះ ជំនាញ អត្តចរិត និងចំណងទាក់ទង។ លោកឧកញ៉ាពន្យល់ថា ការ​មានចំណង់គោលដៅ​ច្បាស់នឹង​ធ្វើ​ឱ្យ​យុវជនមើលឃើញ​ផ្លូវ​ដែលខ្លួនត្រូវ​ដើរ ព្រមជាមួយ​នេះ យុវជន​ត្រូវ​មានចំណេះដឹងច្បាស់ និង​ជំនាញ​​ពិតប្រាកដ ដែលទាំង៣ចំណុចនេះ ជាផ្នែក​​កំពុង​ឈានទៅ​រកភាពជោគជ័យហើយ។ ជាមួយ​គ្នា​នេះ អត្តចរិត គឺជារឿងមួយ​ដែល​យុវជន​ត្រូវ​គិតគូរ, លោកឧកញ៉ាបន្តថា នៅក្នុងប្រព័ន្ធអប់រំ យើង​តែង​តែ​អប់រំ​យុវជន​ឱ្យ​មានចរិតសុភាពរាបសា រម្យទម ចេះគោរពចាស់ទុំ ដូច្នេះ​នៅក្នុងពិភពការងារ សូមយុវជន​យើង​ព្យាយាមអនុវត្តប្រកបដោយបញ្ញា។

ដោយឡែកចំណងទាក់ទង គឺកាន់តែសំខាន់​ក្នុង​ពិភពការងារ ក៏​ដូចជា​អាជីវកម្ម, លោកឧកញ៉ា ប៉ិច បូឡែន មានប្រសាសន៍ដោយ​លើកជាឧទាហរណ៍ថា បុគ្គលខ្លះមានភាពឆ្នើម ពូកែ ប៉ុន្តែពេលធ្វើការ គឺមិន​អាច​ចុះ​សម្រុង​ជាមួយ​អ្នកដទៃ មិន​អាច​ធ្វើការងារជាក្រុមបាន។ លោកឧកញ៉ាមានប្រសាសន៍ថា ចំណងទាក់ទង ឬដែល​គេ​ហៅថា បណ្តាញ​ធនធាន​សង្គម គឺមានន័យណាស់ ព្រោះក្នុងការ​ធ្វើអាជីវកម្ម ក៏​ដូចជា​ក្នុងពិភព​ការងារ គឺ​ត្រូវ​ការ​គេ​គោរព​ស្រឡាញ់ ដូច្នេះ​ការ​កសាង​បណ្តាញ​ទំនាក់ទំនងល្អ គឺនាំ​ឱ្យ​ឈ្នះ ឈ្នះ ទាំងអស់គ្នា យើង​ក៏​បានផល អ្នកដែល​ធ្វើការ​ជាមួយ​ក៏​បានផល៕