ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ស្រ្តីទីមួយកម្ពុជា ទទួលបាននូវពានរង្វាន់ “Smile Asia Philanthropic Visionary Award” លើកទី២ នៅក្នុងកម្មវិធី “Smile Asia Charity Gala 2025” ដោយមានការប្រគល់ដោយផ្ទាល់ពីលោកជំទាវ Gan Siow Huang រដ្ឋមន្ត្រីទទួលបន្ទុកការងារកិច្ចការបរទេស និងទទួលបន្ទុកការងារពាណិជ្ជកម្ម និងឧស្សាហកម្ម នៃសាធារណរដ្ឋសិង្ហបុរី កាលពីល្ងាចថ្ងៃទី១៤ ខែសីហា ឆ្នាំ២០២៥។
ពានរង្វាន់ “Smile Asia Philanthropic Visionary Award” ត្រូវបានបង្កើតឡើង ដើម្បីផ្ដល់ជូនជាកិត្តិយសដល់បុគ្គលឆ្នើមរូបណា ដែលបានចូលរួមចំណែកសំខាន់ក្នុងសង្គមលើវិស័យថែទាំសុខភាព ហើយពានរង្វាន់នេះជាលើកដំបូងត្រូវបានប្រគល់ថ្វាយជូនម្ចាស់ក្សត្រីនៃប្រទេសប៊ូតង់ ហើយលោកជំទាវបណ្ឌិតក៏ជាភរិយាថ្នាក់ដឹកនាំមួយរូបពីកម្ពុជាដែលទទួលបានដំបូងគេ។
ចំពោះការប្រគល់ពានរង្វាន់លើកទី២នេះជូនលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត គឺជាការទទួលស្គាល់នូវ ស្នាដៃសមិទ្ធផល និងការដឹកនាំប្រកបដោយចក្ខុវិស័យរបស់លោកជំទាវបណ្ឌិត ចំពោះអង្គការ Smile Cambodia ក៏ដូចជាការយកចិត្តទុកដាក់ចំពោះសុខភាព និង សុខុមាលភាពរបស់កុមារ ក្នុងរយៈពេលជាងមួយទសវត្សរ៍មកនេះ។
លោកជំទាវបណ្ឌិត ពេជ ចន្ទមុន្នី បានសម្តែងក្តីសោមនស្សរីករាយចំពោះការផ្តល់កិត្តិយសដ៏ខ្ពង់ខ្ពស់ដល់លោកជំទាវ ក្នុងការទទួលបានពានរង្វាន់ “Smile Asia Philanthropic Visionary Award” ពី “អង្គការ SMILE ASIA” ហើយថា ការទទួលបានរង្វាន់មួយនេះ គឺជាការផ្តល់កិត្តិយសដ៏ខ្ពង់ខ្ពស់ដល់លោកជំទាវ និងសហការីទាំងអស់ ដែលបានខិតខំបំពេញការងារយ៉ាងសកម្មកន្លងមកនេះ។
លោកជំទាវក៏បានថ្លែងអំណរគុណដល់ពុកម៉ែបងប្អូនប្រជាពលរដ្ឋគ្រប់ៗរូប ដែលតែងតែជឿជាក់ និងគាំទ្រដល់លោកជំទាវក្នុងការបំពេញបេសកកម្មមនុស្សធម៌ សាបព្រោះមេត្តាធម៌ ការលើកកម្ពស់សុខុមាលភាពប្រជាជន និងការជួយសង្គ្រោះកុមារកម្ពុជាក្នុងរយៈពេលជាងមួយទសវត្សរ៍មកនេះ។
ជាមួយគ្នានេះ លោកជំទាវក៏សូមអរគុណដល់បងបងវីរកងទ័ពទាំងអស់ដែលបាននិងកំពុងប្រឈមជាមួយនឹងសត្រូវឈ្លានពាន និងសូមអរគុណដល់កងទ័ពជួរក្រោយមានកងទ័ពអាវសជាដើមដែលកំពុងជួយក្នុងស្មារតី “ខ្មែរតែមួយ”។
លោកជំទាវបណ្ឌិត ពេជ ចន្ទមុន្នី ក៏បានបង្ហាញពីការប្តេជ្ញាចិត្តក្នុងការបន្តសកម្មភាពដ៏ល្អផូរផង់ប្រកបដោយបរិយាប័ន្ននេះឱ្យបានច្រើនបន្ថែមទៀត ដើម្បីធានាថា ប្រជាជនគ្រប់រូបទទួលបាននូវការថែទាំសុខភាព និងសេវាសង្គមនានា ការយកចិត្តទុកដាក់ដិតដល់ និងគ្មានជនណាម្នាក់ត្រូវបានមើលរំលង ឬទុកចោលឡើយ៕
