រមណីយដ្ឋានប្រាសាទកោះកេរ របស់កម្ពុជា ត្រូវបានដាក់បញ្ចូលជាសម្បត្តិបេតិកភណ្ឌពិភពលោកដោយគណៈកម្មាធិការបេតិកភណ្ឌពិភពលោក នៃអង្គការយូណេស្កូ កាលពីថ្ងៃទី១៧ ខែកញ្ញា ឆ្នាំ២០២៣ កន្លងទៅនេះ។ សម្រាប់​លោក​បណ្ឌិត ឈត ប៊ុនថង ប្រធានផ្នែកទំនាក់ទំនង​វប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិ មើលឃើញថា ការដាក់បញ្ចូលរមណីដ្ឋានប្រាសាទកោះកេរជាសម្បត្តិបេតិកភណ្ឌពិភពលោក នឹងជំរុញចំណាប់អារម្មណ៍អ្នកស្រាវជ្រាវ និងអ្នកទេសចរបន្ថែមទៀត​មក​កម្ពុជា។

លោកបណ្ឌិត ឈត ប៊ុនថង មានប្រសាសន៍ថា កន្លងមករាជរដ្ឋាភិបាលកម្ពុជា ក៏ដូចជាក្រសួងវប្បធម៌ និង​វិចិត្រសិល្បៈ បានរៀបចំស្នើបញ្ចូលប្រាសាទបុរាណ ឬស្ថានីយ៍ប្រវត្តិសាស្រ្តមួយចំនួនជាសម្បត្តិបេតិកភ័ណ្ឌពិភពលោកជាបន្តបន្ទាប់ ដើម្បីឱ្យភ្ញៀវទេសចរបានស្គាល់ពីសម្បត្តិវប្បធម៌ខ្មែរ ព្រមទាំងបង្កើនការកែលម្អ អភិរក្ស និងការពារ។

“អតីតកាលយើងបែបណា ទេពកោសល្យយើងបែបណា ប្រើប្រាស់បែបណាសម្រាប់ទាក់ទាញភ្ញៀវទេសចរ ដើម្បីកូនចៅ អាចយកជាគំរូ ជាមរតក សម្រាប់បន្តទៅថ្ងៃអនាគត”

លោកបណ្ឌិត ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិកម្ពុជា

ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃរាជបណ្ឌិតសភាកម្ពុជាបន្ថែមថា ការបញ្ជូលប្រាសាទកោះកេរទៅជាបេតិកភណ្ឌពិភពលោក បានធ្វើឱ្យប្រាសាទនេះ មានកេរ្តិ៍ឈ្មោះល្បីរន្ទឺទៅដល់ឆាកអន្តរជាតិ ជាពិសេសអ្នកចូលចិត្តខាងវិស័យទេសចរណ៍ គេនឹងមើលបញ្ជីនៃការដាក់បញ្ចូលប្រាសាទកោះកេរជាបេតិកភណ្ឌពិភពលោក ជំរុញឱ្យចាប់អារម្មណ៍ចង់សិក្សាស្រាវជ្រាវ និងអ្នកទេសចរចូលរួមទស្សនាកាន់តែច្រើន។ លោកបណ្ឌិតបន្តថា ការចូលរួមទស្សនារបស់ភ្ញៀវទេសចរ នឹងផ្ដល់ផលប្រយោជន៍សម្រាប់ជាតិទាំងមូល ទាំងក្នុងរដ្ឋ និងជួយដល់ជីវភាពប្រជាពលរដ្ឋដែលប្រកបរបរលក់ដូរនៅតំបន់រមណីយដ្ឋានកោះកេរ ឬប្រាសាទក្បែរៗនោះ។

បើតាមលោកបណ្ឌិត ឈត ប៊ុនថង ការដាក់បញ្ចូល​ប្រាសាទកោះកេរ ជាសម្បត្តិ​បេតិកភណ្ឌពិភពលោក ក៏​រួមចំណែកក្នុងការការពារសម្បត្តិវប្បធម៌ ជួយបង្កើនការយកចិត្តទុកដាក់ និងប្រុងប្រយ័ត្នបន្ថែមទៀត។ លោកបណ្ឌិតមានប្រសាសន៍ថា កាលពីមុនមានតែអាជ្ញាធរក្នុងស្រុកថែរក្សាការពារ ដោយសារធនធានមនុស្សនៅមានកម្រិត ប៉ុន្តែឥឡូវនេះ ប្រសិនខ្វះជំនាញនឹងមានអង្គការយូណេស្កូជាដៃគូសកម្ម រួមចំណែកដល់ការអភិរក្ស និងចូលរួមឧបត្ថម្ភពីបណ្ដាប្រទេសពាក់ព័ន្ធ ជួយដល់ការកែលម្អ និងអភិរក្សប្រាសាទបន្ថែមទៀត។

គួរជម្រាបជូនថា ប្រាសាទកោះកេរ ស្ថិត​ក្នុងអតីតរាជធានីបុរាណខ្មែរ ដែលមានទីតាំងស្ថិតនៅក្នុងភូមិស្រយ៉ង់ខាងជើង ឃុំស្រយ៉ង់ ស្រុកគូលែន ខេត្តព្រះវិហារ បានកសាងឡើងក្នុងរជ្ជកាលព្រះបាទជ័យវរ័្មនទី៤។ ប្រាសាទនេះ មានកម្ពស់ប្រមាណ៣៥ម៉ែត្រ មានកាំជណ្តើរប្រមាណ៥៥កាំ ហើយចែកចេញជា៧ថ្នាក់ បែរមុខទៅរាជធានីអង្គរ៕