ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ- ក្រសួងអប់រំ យុវជន និងកីឡា បានឱ្យដឹងថា ក្រសួងមុខងារសាធារណៈបានសម្រេចផ្ដល់ក្របខណ្ឌចំនួន ៣ពាន់កន្លែងដល់ក្រសួងអប់រំ យុវជន និងកីឡា ដើម្បីប្រឡងជ្រើសរើសគ្រូបង្រៀននៅឆ្នាំ២០២៣ ក្នុងនោះអង្គភាព ឬគ្រឹះស្ថានសិក្សាសាធារណៈក្រោមឱវាទទីស្ដីការក្រសួងចំនួន ២៦៥ កន្លែង និងគ្រឹះស្ថានសិក្សាសាធារណៈនៃមន្ទីរអប់រំ យុវជន និងកីឡារាជធានី ខេត្ត ចំនួន ២ ៧៣៥ កន្លែង។
ក្នុងលិខិតរបស់ក្រសួងអប់រំ ចុះថ្ងៃទី១៧ ខែមករា ឆ្នាំ២០២៣ បានលើកឡើងថា ក្របខណ្ឌទាំងនោះ រួមមាន ក្របខណ្ឌគ្រូបង្រៀនកម្រិតឧត្តម (បង្រៀននៅគ្រឹះស្ថានឧត្តមសិក្សាសាធារណៈ) ចំនួន ៨០ កន្លែង, ក្របខណ្ឌគ្រូបង្រៀនកម្រិតឧត្តម បណ្តុះបណ្តាលនៅវិទ្យាស្ថានជាតិអប់រំ ចំនួន ៧៣៥ កន្លែង រួមមាន ផ្នែកចំណេះទូទៅ បណ្តុះបណ្តាលតាមរូបមន្ត (បរិញ្ញាបត្រ+១) ចំនួន ៥២៨, ផ្នែកអប់រំបច្ចេកទេស បណ្តុះបណ្តាលតាមរូបមន្ត(បរិញ្ញាបត្រ+១)ចំនួន ២៧ កន្លែង និងតាមរូបមន្ត(បរិញ្ញាបត្រ+២) ចំនួន ១៨០ កន្លែង។
រីឯក្របខណ្ឌគ្រូបង្រៀនកម្រិតមូលដ្ឋានក្រសួងថា មានចំនួន ៤៣៨ កន្លែង រួមមានផ្នែកចំណេះទូទៅ បណ្តុះបណ្តាលតាមរូបមន្ត (១២+២) ចំនួន ២១៧ កន្លែង, ផ្នែកអប់រំបំណិនជីវិត បណ្តុះបណ្តាលតាមរូបមន្ត (១២+២) ចំនួន ២៣ កន្លែង និងផ្នែកចំណេះទូទៅ បណ្ដុះបណ្ដាលតាមរូបមន្ត (១២+៤) ចំនួន ១៩៨ កន្លែង។
ចំណែកឯក្របខណ្ឌគ្រូបង្រៀនកម្រិតមូលដ្ឋានអប់រំកាយ និងកីឡា ចំនួន១០០កន្លែង, ក្របខណ្ឌគ្រូបង្រៀនកម្រិតបឋម(គ្រូបឋមសិក្សា) ចំនួន ១ ៣៤៧ កន្លែង, ក្របខណ្ឌគ្រូបង្រៀនកម្រិតបឋម (គ្រូមត្តេយ្យសិក្សា) ចំនួន ២០០ កន្លែង និងប្រឡងជ្រើសរើសមន្ត្រីគ្រប់គ្រងរដ្ឋបាល ឱ្យចូលរៀននៅសាលាភូមិន្ទរដ្ឋបាល ចំនួន ១០០ កន្លែង។
ក្រសួងអប់រំ ក៏បានស្នើឱ្យប្រធានមន្ទីររៀបចំបញ្ជីប៉ុស្តិ៍សាលារៀនដែលមានតម្រូវការចាំបាច់ដោយមានទម្រង់បញ្ជីប៉ុស្តិ៍សាលារៀន ជាបីទម្រង់រួមមាន បញ្ជីប៉ុស្តិ៍វិទ្យាល័យ បញ្ជីស្ដីអនុវិទ្យាល័យ និងបញ្ជីប៉ុស្តិ៍សាលាបឋមសិក្សា/មត្តេយ្យសិក្សា ជូនភ្ជាប់ទៅតាមឯកទេស និងប្រភេទក្របខ័ណ្ឌនីមួយៗ ដើម្បីក្រសួងមានមូលដ្ឋាន រៀបចំការប្រឡងជ្រើសរើស។ លើសពីនេះ ផ្តល់ទៅនាយកដ្ឋានបុគ្គលិក មុនដំណាច់ខែមីនា ឆ្នាំ២០២៣។
តាមការបញ្ជាក់របស់ក្រសួងអប់រំ គ្រប់មន្ទីរអប់រំត្រូវពិនិត្យ និងផ្ដល់ក្របខ័ណ្ឌជូនវិទ្យាល័យអប់រំពិសេស ការអប់រំបច្ចេកទេសដើមក្របខ័ណ្ឌថ្មី ត្រូវផ្តល់អាទិភាពដល់វិទ្យាល័យ អនុវិទ្យាល័យ សាលាបឋមសិក្សា និងសាលាមត្តេយ្យសិក្សាដែលកំពុងខ្វះគ្រូបង្រៀន ការបែងចែកក្របខ័ណ្ឌដល់សាលារៀន ត្រូវមានការប្រជុំពិភាក្សាជាមួយគណៈគ្រប់គ្រងសាលារៀនសាម៉ីដែលត្រូវទទួលក្របខ័ណ្ឌថ្មី៕
