ដោយសារតែបច្ចេកវិទ្យាប្រព័ន្ធផ្សព្វផ្សាយមានការរីកចម្រើនយ៉ាងឆាប់រហ័ស ហើយប្រព័ន្ធផ្សព្វផ្សាយមានភាពស្មុគស្មាញ និងផ្លាស់ប្តូរជាបន្តបន្ទាប់យ៉ាងលឿននោះ អក្ខរកម្មឌីជីថលប្រព័ន្ធផ្សព្វផ្សាយ និងព័ត៌មាន បានក្លាយជាជំនាញដ៏សំខាន់មួយនៅជុំវិញពិភពលោក។

បើតាមសៀវភៅអក្ខរកម្មឌីជីថលប្រព័ន្ធផ្សព្វផ្សាយ និងពត៌មាន របស់ក្រសួងអប់រំ យុវជន និងកីឡា ពាក្យថា «អក្ខរកម្ម» សំដៅដល់សមត្ថភាពដែលចេះអាន និងសរសេរ។ «អក្ខរកម្មឌីជីថល និងព័ត៌មាន» សំដៅដល់សមត្ថភាពក្នុងការប្រើប្រាស់ប្រព័ន្ធផ្សព្វផ្សាយច្រើនប្រភេទដោយសុវត្ថិភាព ឈ្លាសវៃ និងទំនួលខុសត្រូវ។ ដូច្នេះ អក្ខរកម្មប្រព័ន្ធឌីជីថល និងព័ត៌មាន មានន័យថា ជាបណ្ដុំជំនាញដែលអនុញ្ញាតឱ្យបុគ្គលម្នាក់ចេះប្រើប្រាស់ ចេះវិភាគ ចេះបង្កើតខ្លឹមសារថ្មីៗ និងចូលរួមយ៉ាងសកម្មក្នុងប្រព័ន្ធផ្សព្វផ្សាយ។

លើសពីនេះ បុគ្គលដែលមានការយល់ដឹងផ្នែកប្រព័ន្ធផ្សព្វផ្សាយ មានសមត្ថភាពអាចយល់ពីសារស្មុគស្មាញដែលផ្សាយចេញលើកាសែត ផ្ទាំងប៉ាណូ វីដេអូហ្គេម តន្រ្តី អ៊ីនធឺណិត បណ្តាញសង្គម និងប្រភេទនៃប្រព័ន្ធផ្សព្វផ្សាយផ្សេងៗទៀតក៏ដូចជាចេះបង្កើតសារប្រព័ន្ធផ្សព្វផ្សាយដោយខ្លួនឯង។

ហេតុអ្វីបំណិនអក្ខរកម្មឌីជីថល ប្រព័ន្ធផ្សព្វផ្សាយ និងព័ត៌មានមានសារៈសំខាន់សម្រាប់គ្រូបង្រៀនសតវត្សទី២១?

បំណិនអក្ខរកម្មឌីជីថល ប្រព័ន្ធផ្សព្វផ្សាយ និងព័ត៌មានមានសារៈសំខាន់សម្រាប់គ្រូបង្រៀនសតវត្សទី២១ ក្នុងការជួយឱ្យសិស្សអាចប្រើជំនាញនៃការគិតបែបស៊ីជម្រៅបានយ៉ាងទូលំទូលាយ។ ទន្ទឹមនេះ គ្រូបង្រៀនគួរប្រើប្រព័ន្ធផ្សព្វផ្សាយឌីជីថលឱ្យបានត្រឹមត្រូវ, ការប្រើប្រាស់ការរៀនឌីជីថលក្នុងមុខវិជ្ជា, បង្កើនប្រសិទ្ធភាពសិក្សា បង្កើតលទ្ធភាពកាន់តែច្រើនសម្រាប់ការងារជាក្រុម និងការប្រើប្រាស់ពិភពឌីជីថលប្រកបដោយសុវត្ថិភាព។ ក្នុងនោះ គោលបំណងរបស់អក្ខរកម្មឌីជីថលប្រព័ន្ធផ្សព្វផ្សាយ និងព័ត៌មាន គឺធ្វើឱ្យមនុស្សកាន់តែច្រើនឡើងចេះប្រើប្រព័ន្ធផ្សព្វផ្សាយ ព្រមទាំងបង្កើនការចូលរួមក្នុងការបង្កើតខ្លឹមសារលើប្រព័ន្ធផ្សព្វផ្សាយ។ វិធីនេះនឹងអាចបង្កើនឱកាសនៃរបកគំហើញ ចក្ខុវិស័យថ្មីៗ សម្រាប់ការពង្រីកប្រព័ន្ធផ្សព្វផ្សាយដែលអាចអភិវឌ្ឍសង្គមមួយដែលមានប្រជាពលរដ្ឋរស់នៅប្រកបដោយគុណតម្លៃនិងសីលធម៌។

ម៉្យាងវិញទៀត ការយល់ដឹងអំពីប្រព័ន្ធផ្សព្វផ្សាយ និងឥទ្ធិពលរបស់វាទៅលើសង្គមនិងបុគ្គលគ្រប់រូប គឺជាជំនាញចាំបាច់មួយសម្រាប់មនុស្សគ្រប់គ្នា។ ការហ្វឹកហាត់ជំនាញក្នុងការយល់ដឹងអំពីអក្ខរកម្មប្រព័ន្ធផ្សព្វផ្សាយ ជួយឱ្យយើងកាន់តែមានការយល់ដឹងថែមទៀតអំពីវប្បធម៌ និងគុណតម្លៃរបស់វា ព្រមទាំងសារៈសំខាន់នៃទំនាក់ទំនងនិងព័ត៌មាន។ ប្រព័ន្ធផ្សព្វផ្សាយព័ត៌មានសង្គម និងបុគ្គលម្នាក់ៗ មានភាពស្មុគស្មាញ ពិបាកយល់។ ហេតុដូច្នេះហើយ ទើបអ្នកដែលមានការយល់ដឹងអំពីប្រព័ន្ធផ្សព្វផ្សាយតែងជៀសវៀងការវិនិច្ឆ័យអ្វីមួយភ្លាមៗដោយមិនបានគិតឱ្យល្អិតល្អន់។

បច្ចេកវិទ្យាបច្ចុប្បន្នអនុញ្ញាតឱ្យមនុស្សបង្កើត និងវិភាគសារតាមទម្រង់ប្រព័ន្ធផ្សព្វផ្សាយផ្សេងៗដូចជា អត្ថបទ រូបភាព ឬវីដេអូជាដើម។ ប៉ុន្តែជំនាញដែលចាំបាច់ក្នុងការចេះបង្កើត និងវិភាគព័ត៌មានលើប្រព័ន្ធផ្សព្វផ្សាយនេះ ត្រូវតែឆ្លងកាត់ការរៀនសូត្រ ការបង្វឹក និងធ្វើបច្ចុប្បន្នភាពចំណេះដឹងថ្មីៗជានិច្ច។ ជាក់ស្ដែង ការរៀនអក្ខរកម្មឌីជីថលប្រព័ន្ធផ្សព្វផ្សាយ និងព័ត៌មាន អាចនឹងមានរយៈពេលយូរ និងត្រូវសិក្សារៀនសូត្រជាប្រចាំពេញមួយជីវិត។ ជាពិសេសយុវជនទាំងឡាយត្រូវការឱកាសក្នុងការរៀនផ្ទាល់ពីគ្រូដើម្បីបង្កើនសមត្ថភាព និងបទពិសោធន៍ឱ្យបានកាន់តែច្រើនថែមទៀត ពាក់ព័ន្ធនឹងប្រភេទនៃប្រព័ន្ធផ្សព្វផ្សាយទាំងអស់ ប្រព័ន្ធផ្សព្វផ្សាយអន្តរបុគ្គល និងបច្ចេកវិទ្យាផ្សព្វផ្សាយផ្សេងៗ។ នេះមានន័យថា​ គ្រូបង្រៀនចាំបាច់ត្រូវតែមានចំណេះដឹងអក្ខរកម្មឌីជីថល ប្រព័ន្ធផ្សព្វផ្សាយ និងព័ត៌មានជាចាំបាច់។

ជាមួយគ្នានេះ អក្ខរកម្មប្រព័ន្ធផ្សព្វផ្សាយ និងព័ត៌មានអាចជួយដល់មនុស្សបានដូចជា បង្កើនសមត្ថភាពជំនាញនៃការគិតបែបស៊ីជម្រៅ, យល់អំពីរបៀបដែលសារប្រព័ន្ធផ្សព្វផ្សាយចូលរួមផ្លាស់ប្តូរអភិវឌ្ឍវប្បធម៌ និងសង្គម, ចេះសម្គាល់នូវការកំណត់ទិសដៅ និងការធ្វើយុទ្ធសាស្ត្រទីផ្សារ, យល់អំពីអ្វីដែលផលិតករប្រព័ន្ធផ្សព្វផ្សាយចង់បញ្ចុះបញ្ចូលយើងជឿលើអ្វីមួយ ឬអាចដឹងអំពីបច្ចេកទេសនៃការបញ្ចុះបញ្ចូលដែលត្រូវបានប្រើប្រាស់, ផ្តល់មតិយោបល់សម្រាប់ការផ្លាស់ប្តូរដល់ប្រព័ន្ធផ្សព្វផ្សាយ, ចេះសម្គាល់នូវព័ត៌មានលម្អៀង រឿងប្រឌិតឡើង ព័ត៌មានខុស និងរឿងកុហក, ចេះស្វែងយល់ពីផ្នែកខ្លះនៃសាច់រឿងដែលមិនត្រូវបានបង្ហាញ ឬត្រូវគេបិទបាំង, វិភាគសារប្រព័ន្ធផ្សព្វផ្សាយដោយផ្អែកលើបទពិសោធន៍ ចំណេះដឹងផ្ទាល់ខ្លួន ជំនាញ ជំនឿ និងគុណតម្លៃ និងបង្កើតនិងចែកចាយសារដែលបានបង្កើតដោយខ្លួនឯង។

គួរជម្រាបជូនថា នាយកដ្ឋានបច្ចេកវិទ្យាព័ត៌មាន នៃក្រសួងអប់រំ យុវជន និងកីឡា ក៏បានផ្ដល់វគ្គបណ្ដុះបណ្ដាលតាមបែបចម្រុះស្ដីពីអក្ខរកម្មឌីជីថល ប្រព័ន្ធផ្សព្វផ្សាយ និងព័ត៌មាន (MIL) ជូនដល់គ្រូឧទ្ទេសនៅតាមមជ្ឈមណ្ឌលគរុកោសល្យភូមិភាគរាជធានី-ខេត្ត តាមអនឡាញ និងជួបផ្ទាល់ផងដែរ ៕