គម្រោង Code for Girls ដំណើរការដោយកម្មវិធី Generation Future របស់អង្គការយូនីសេហ្វ នៅវិទ្យាល័យព្រះរាជបូជនីយកិច្ចខេត្តស្ទឹងត្រែង បានជោគជ័យ ក្រោយពីសិស្សជាច្រើនបានចាប់អារម្មណ៍នឹងបច្ចេកវិទ្យា ហើយ​ពេលនេះគម្រោង Code for Girls គ្រោង​នឹងបំពេញបេសកកម្មរបស់ខ្លួនបន្ត ដោយ​ផ្ដល់ចំណេះដឹងសរសេរកូដទៅកាន់សិស្សនៅសាលាមួយចំនួនទៀត​នៅក្នុង​ខេត្ត​ជាប់ព្រំដែនមួយ​នេះ ដើម្បីជួយសិស្ស​ងាកមកចាប់អារម្មណ៍បច្ចេកវិទ្យា។

កញ្ញា​ ម៉ិចព្រីង សិរិនី​ ប្រធានអនុវត្តគម្រោង Code for Girls ឱ្យដឹងថា ប្រទេសកម្ពុជា គឺជាប្រទេសកំពុងអភិវឌ្ឍ និងកំពុងឈានទៅរកប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងប្រាក់ចំណូលខ្ពស់ឆ្នាំ២០៥០ ដែលទាមទារឱ្យមានអ្នកជំនាញផ្នែកវិទ្យាសាស្រ្ត និងបច្ចេកវិទ្យាច្រើន។ ដូច្នេះគម្រោងនោះនឹងបង្រៀនក្មេងស្រីទាក់ទងជាមួយ កម្មវិធី Solid Work ឬ 3D Printer ដោយសារយល់ថា វាជាបច្ចេកវិទ្យាថ្មី ហើយចង់ឱ្យសិស្សងាកមកចាប់អារម្មណ៍ផ្នែកបច្ចេកវិទ្យាវិញ និងកុំឱ្យគិតថារៀនបច្ចេកមិនចេះ។

កញ្ញា​ ម៉ិចព្រីង សិរិនី បញ្ជាក់ថា សកម្មភាពដែល​ក្រុមខ្លួន​ធ្វើ គឺ​ការ​បង្រៀនសិស្សទាក់ទងជាមួយ Solid Work មានន័យថា ជាការគូសរូប 3D ហើយយករូបដែលគូសបានទៅប្រើប្រាស់ជាមួយម៉ាស៊ីនព្រីន 3D (3D Printer)។ ក្នុងនោះ ការង្រៀន ទាក់ទងនឹងមូលដ្ឋានគ្រឹះនៃការសរសេរកូដ (Coding) ដែលទាក់ទងនឹងការប្រើប្រាស់ខ្សែភ្លើង។ ឧទាហរណ៍ ប្រសិនជាសិស្សគូសរូបផ្ទះ ហើយចង់តចរន្តខ្សែភ្លើងក្នុងផ្ទះ គឺត្រូវការការសរសេរកូដ (Coding) ដែលទាក់ទងនឹងចរន្តភ្លើងដែលមានទំនាក់ទំនងគ្នា។

ប្រធានអនុវត្តគម្រោង Code for Girls​ បន្ថែមថា ក្នុងការអនុវត្តគម្រោងនាពេលកន្លងមក ក្រុមខ្លួនមាន​អ្នក​ស្ម័គ្រ​ចិត្ត​ចូលរួមចំនួន៨នាក់ បានជ្រើសរើសសិស្សចំនួន ៤ក្រុម ចាប់ពី​ថ្នាក់​ទី ១០ និង១១ ធ្វើ​បទ​បង្ហាញ​ក្នុង​ថ្នាក់​នីមួយៗ។ ក្នុងនោះ ក្រុមទី១៖ Mini Waterpump គឺជាគម្រោងដែលបង្កើតឡើងដោយប្រើប្រាស់បច្ចេកវិទ្យា 3D Printer ដើម្បីប្រែក្លាយរូបភាព 3D ទៅជាវត្ថុពិត ដែលអាចមើលឃើញ និងប៉ះ។  គម្រោងនេះមានគោលបំណងសម្រួលដល់ការលក់នៅលើទីផ្សារ ឆ្លើយតបនឹងតម្រូវការក្នុងស្រុក ជួយសម្រួលថវិកា និងសន្សំបានច្រើន។ ក្រុមទី២៖ House water wheel wind turbine គឺគម្រោងបង្កើតឡើងដើម្បីបង្ហាញពីលំហូរនៃរហាត់ទឹក និងបច្ចេកវិទ្យាកែច្នៃទួរប៊ីនខ្យល់។ ក្រុមទី៣៖ STEM Room គឺជាគម្រោងដែលបង្កើតឡើងដោយប្រើបច្ចេកវិទ្យា 3D មកធ្វើបទបង្ហាញ ដើម្បីបង្កភាពងាយស្រួលដល់សិស្សានុសិស្សដែលចង់សិក្សា STEM នាពេលអនាគត និងជួយសិស្សក្នុងការច្នៃប្រឌិតឌីជីថល។ ក្រុមទី៤៖ 3D House គឺជាគម្រោងដែលបង្កើតឡើងដោយសារតែក្តីស្រមៃរបស់សមាជិកក្រុមដែលចង់ធ្វើ និងបង្កើតអ្វីមួយ និងជាបំណងប្រាថ្នាតាំងពីកុមារភាពរហូតដល់បច្ចុប្បន្ន។

កញ្ញា​ ម៉ិចព្រីង សិរិនី បន្តថា មានសិស្សចំនួន ២០០នាក់បានចូលរួម ហើយក្រោយវគ្គបណ្ដុះបណ្ដាលកម្មវិធីទទួលបានសិស្សដែលចេះសរសេរកូដ និងអាចប្រើប្រាស់ 3D Printer ចំនួន ២៣នាក់ និងទទួលបានសិស្សដែលចាប់អារម្មណ៍លើផ្នែកសរសេរកូដចំនួន២០០០នាក់ នៅក្នុងវិទ្យាល័យព្រះរាជបូជនីយកិច្ចខេត្តស្ទឹងត្រែង។

បើតាម​ ប្រធានអនុវត្តគម្រោង Code for Girls​ គម្រោងបន្ទាប់ នឹងបន្តទៅ វិទ្យាល័យហ៊ុនសែន ដែលមានចម្ងាយ​ប្រមាណ៥គីឡូម៉ែត្រ ពីវិទ្យាល័យ​ព្រះរាជបូជនីយកិច្ច ហើយគម្រោងនោះមានឈ្មោះថា “school prototype”។

គួរជម្រាបជូនថា កម្មវិធី Code for Girls គឺជាគម្រោងសង្គមមួយដែលដល់ចំណេះដឹងដោយឥតគិតថ្លៃលើផ្នែកសរសរកូដសម្រាប់ក្មេងស្រី និងស្រ្តី។ Code for Girls ដឹកនាំដោយក្រុមយុវជនដែលមានជំនឿលើគុណតម្លៃនៃការអប់រំ STEAM និងចង់ផ្ដល់ឱកាសនេះទៅដល់ក្មេងស្រី និងស្រ្តី ដើម្បីរៀនសរសេរកូដ និងកសាងឱកាសការងារក្នុងផ្នែកបច្ចេកវិទ្យា។ តាមរយៈកម្មវិធីសរសេរកូដ និងវគ្គបណ្ដុះបណ្ដាល Code for Girls នឹងចូលទៅផ្ដល់ថាមពលដល់ក្មេងស្រី និងស្រ្តីឈោងចាប់ឱកាសការងារជាច្រើននៅក្នុងវិស័យបច្ចេកវិទ្យា និងលើកកម្ពស់សមភាពយេនឌ័រនៅក្នុងវិស័យបច្ចេកវិទ្យា៕