ក្នុងកិច្ចប្រជុំក្រុមប្រឹក្សាសហគមន៍សង្គម-វប្បធម៌អាស៊ានលើកទី៣៣ នៅទីក្រុងគូឈីង ប្រទេសម៉ាឡេស៊ី កាលពីពេលកន្លងទៅថ្មីៗនេះ លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការនៃក្រសួងអប់រំ យុវជន និងកីឡា​ បានមានប្រសាសន៍ដោយធ្វើគាំទ្រសេចក្តីថ្លែងការបរិវត្តកម្មឌីជីថល ការអនុវត្តប្រព័ន្ធអប់រំឌីជីថលក្នុងតំបន់អាស៊ាន ការពង្រឹងការទទួលបានសិក្សាប្រកបដោយសុវត្ថិភាព និងការអភិវឌ្ឍជំនាញទន់ ដែលជាកម្លាំងចលករក្នុងការកំណត់គោលដៅអនាគត និងទទួលស្គាល់តួនាទីរបស់យុវជនអាស៊ានក្នុងការកសាងសហគមន៍អាស៊ាន ប្រកបដោយបរិយាបន្ន ចីរភាព និងការលើកកម្ពស់មជ្ឈភាពអាស៊ានទាំងមូល។

រដ្ឋលេខាធិការប្រចាំការ នៃក្រសួងអប់រំ បានសង្កត់ធ្ងន់លើការបង្កើតក្របខ័ណ្ឌចីរភាពសេដ្ឋកិច្ចច្នៃប្រឌិតអាស៊ាន ដែលមានគោលបំណងលើកកម្ពស់សកម្មភាពសេដ្ឋកិច្ចច្នៃប្រឌិតក្នុងតំបន់អាស៊ាន ដែលគូសបញ្ជាក់ពីលទ្ធផលជះផ្នែកសង្គម វប្បធម៌ សេដ្ឋកិច្ច និងបរិស្ថាន។ ក្របខ័ណ្ឌនេះស្របទៅនឹងសេចក្តីថ្លែងការសៀមរាបស្តីពីការលើកកម្ពស់សហគមន៍អាស៊ានដែលមានការសម្របខ្លួន និងច្នៃប្រឌិត ដើម្បីគាំទ្រសេដ្ឋកិច្ច និងវប្បធម៌។

លោកជំទាវបណ្ឌិត គឹម សេដ្ឋានី បន្ថែមថា កម្ពុជាវាយតម្លៃខ្ពស់ចំពោះកិច្ចខិតខំប្រឹងប្រែងក្នុងការបញ្ជូនផែនការយុទ្ធសាស្ត្រសហគមន៍សង្គម-វប្បធម៌អាស៊ាន ទៅកាន់ក្រុមការងារជាន់ខ្ពស់ចក្ខុវិស័យអាស៊ានឆ្នាំ២០៤៥។ កម្ពុជាទន្ទឹងរង់ចាំនូវការអភិវឌ្ឍក្របខណ្ឌលទ្ធផលសហគមន៍សង្គម-វប្បធម៌អាស៊ាន និងអនុម័តចក្ខុវិស័យសហគមន៍អាស៊ានឆ្នាំ២០៤៥។ លើសពីនេះ កម្ពុជាកត់សម្គាល់លើការអនុវត្តដោយជោគជ័យចំពោះផែនការចក្ខុវិស័យសហគមន៍សង្គមវប្បធម៌អាស៊ានឆ្នាំ២០២៥ ដែលផ្តល់នូវគោលការណ៍គ្រឹះក្នុងការរៀបចំផែនការនៅពេលអនាគត។

ជាមួយគ្នានេះ រដ្ឋលេខាធិការប្រចាំការនៃក្រសួងអប់រំក៏​បញ្ជាក់ថា កម្ពុជាបន្តគាំទ្រការចូលជាសមាជិកអាស៊ានទី១១ របស់ប្រទេសទីម័រឡេស្ត និងលើកទឹកចិត្តដល់ក្រសួង/ស្ថាប័នក្រោមសសរស្តម្ភសហគមន៍សង្គម-វប្បធម៌អាស៊ាន អញ្ជើញតំណាងទីម័រឡេស្តចូលរួមរាល់សកម្មភាពដែលជាការអភិវឌ្ឍសមត្ថភាពបន្ថែម បន្តលើកម្ពស់សកម្មភាពកីឡា និងសុខុមាលភាព ដោយបង្កើនការចូលរួមកម្រិតសហគមន៍ក្នុងតំបន់ រួមទាំងស្រ្តី ជនភាពមានពិការភាព និងជនងាយរងគ្រោះ។

សម្រាប់ឯកសារលទ្ធផលសហគមន៍សង្គម-វប្បធម៌អាស៊ានឆ្នាំ២០២៥ ក្រោមការដឹកនាំរបស់ប្រទេសម៉ាឡេស៊ីក្នុងនាមជាប្រធានអាស៊ានប្តូរវេន សម្រាប់កិច្ចប្រជុំកំពូលអាស៊ានលើកទី៤៦ មានចំនួន៣ រួមមាន៖ ឯកសារលទ្ធផលសម្រាប់ការអនុម័តចំនួន២ គឺក្របខ័ណ្ឌចីរភាពសេដ្ឋកិច្ចច្នៃប្រឌិតអាស៊ាន និងសេចក្តីថ្លែងការណ៍អាស៊ានស្តីពីការប្តេជ្ញាចិត្តលើសន្តិសុខគ្រឿងញៀនអាស៊ាន និងការពឹងផ្អែកលើខ្លួនឯង សម្រាប់ការកត់សម្គាល់ចំនួន១ គឺបញ្ជីត្រួតពិនិត្យសម្រាប់រដ្ឋាភិបាលសមាជិកអាស៊ាន អ្នកជ្រើសរើសកម្មករ និងពលករចំណាកស្រុក ស្តីពីការជ្រើសរើសដោយយុត្តិធម៌ និងការបំពេញការងារដោយតម្លាភាព។

គួរជំរាបជូនថា ក្រុមប្រឹក្សាសហគមន៍សង្គម-វប្បធម៌អាស៊ាន បានសម្ភោធឱ្យប្រើប្រាស់ផែនការយុទ្ធសាស្ត្រសហគមន៍សង្គម-វប្បធម៌អាស៊ាន មានគោលដៅយុទ្ធសាស្ត្រ (Strategic Goals) ចំនួន១២ ក្នុងនោះមានគោលដៅយុទ្ធសាស្ត្រចំនួន១០ ឆ្លុះបញ្ចាំងពីសេចក្តីថ្លែងការណ៍ចក្ខុវិស័យសហគមន៍អាស៊ានឆ្នាំ២០៤៥ សម្រាប់សហគមន៍សង្គម-វប្បធម៌ និងគោលដៅយុទ្ធសាស្ត្រឆ្លងសសរស្តម្ភចំនួន២ ផ្តោតលើការបង្រួមគម្លាតអភិវឌ្ឍកំណើន និងការអភិវឌ្ឍប្រកបដោយចីរភាព៕