កម្មវិធីប្រកួតប្រជែងរ៉ូបូតទិចអូឡាំព្យាដកម្ពុជា ២០២៤ ដែលបានរៀបចំឡើងនៅផ្សារទំនើបអុីអនមានជ័យ កាលពីថ្ងៃទី១៤ ខែកញ្ញា ឆ្នាំ២០២៤ កន្លងទៅនេះ ទទួលបានលទ្ធផលជាផ្លែផ្កា និងជោគជ័យយ៉ាងត្រចះត្រចង់បំផុត ដោយបានកៀរគរសិស្ស និស្សិត លោកគ្រូ អ្នក គ្រូ និងអ្នកជំនាញពីគ្រប់វិស័យរាប់ពាន់នាក់នៅទូទាំងប្រទេសកម្ពុជា។ ​​​​​​​​​កម្មវិធីនេះរៀបចំឡើង​​ដោយ​អ​ង្គការ​ពិព័រណ៍វិទ្យាសាស្រ្តកម្ពុជា និងទទួលបានការគាំទ្រដ៏ខ្ពង់ខ្ពស់ពីសំណាក់ក្រសួងអប់រំ យុវជន និងកីឡា​ និងក្រសួងបរិស្ថាន ដែលមានគោលបំណងផ្ដល់ឱកាសដល់​នវានុវត្តជនកម្ពុជា ក្នុងការបង្ហាញពីសមត្ថភាពឆ្នើម និងភាពច្នៃប្រឌិតដ៏អស្ចារ្យរបស់ខ្លួន។

កម្មវិធីសម្រាប់ឆ្នាំនេះបានប្រព្រឹត្តទៅក្រោមមូលបទ “Earth Allies” ដែលរំលេចពីសារៈសំខាន់នៃការអប់រំស្ទែម (វិទ្យាសាស្រ្ត បច្ចេកវិទ្យា វិស្វកម្ម និងគណិតវិទ្យា) ដើម្បីយកមកប្រើប្រាស់ និងដោះស្រាយបញ្ហានានាដែលអាចប្រឈមនឹងចីរភាពនៃបរិស្ថាន។​ បេក្ខជនមកពី ៦ ខេត្តផ្សេងៗ ក្នុងព្រះរាជាណាចក្រកម្ពុជា ដែលជាតំណាងសាលារៀននិ​​​​​​ងសាកលវិទ្យាល័យ ដើម្បីប្រកួតប្រជែងក្នុងវិញ្ញាសានានាដូចជា​ Robomission, Future Innovators, Future Engineers, Robot Sumo, និង Robot Soccer។ កាប្រកួតប្រជែងនេះមានសាលារៀនចូលរួមចំនួន ៣២​ សាលា និង សាកលវិទ្យាល័យចំនួន ៨ ផងដែរ។

ជ័យលាភីពីវគ្គជម្រុះថ្នាក់ជាតិនឹងធ្វើជាតំណាងប្រទេសកម្ពុជាទៅចូលរួមប្រកួតបន្តក្នុងកម្មវិធីរ៉ូបូតអូឡាំព្យាដពិភពលោក ដែលជាវគ្គ​ផ្តាច់ព្រ័ត្រ នៅក្នុងទីក្រុងអ៊ីហ្សីមៀ ប្រទេសតួកគី នាខែវិច្ឆិកា ឆ្នាំ២០២៤ ខាងមុខនេះ ហើយនេះក៏ជាសមិទ្ធផលដ៏អស្ចារ្យរបស់យុវជនរ៉ូបូតទិចយើងផងដែរ។

លក្ខណៈពិសេសនៃកម្មវិធីប្រកួតប្រជែងរ៉ូបូតទិចអូឡាំព្យាដកម្ពុជា ២០២៤ រួមមាន៖

• ការរៀបចំការប្រកួតរ៉ូបូតទិចថ្នាក់ជាតិលើវិញ្ញាសា Robomission, Future Innovators, Future Engineers, Robot Sumo និង Robot Soccer។
• ការបណ្ដុះបណ្ដាលវីរជនបរិស្ថាន តាមរយៈសកម្មភាពអនុវត្តនានាដើម្បីជួយដល់បរិស្ថានផ្ទាល់។
• ពិព័រណ៍រ៉ូបូតទិចដែលផ្ដល់ឱកាសដល់អ្នកចូលរួមទស្សនាបានសិក្សា និងស្វែងយល់ដោយផ្ទាល់អំពីតួនាទីរបស់រ៉ូបូតទិចនៅក្នុងការអប់រំស្ទែម។
• ការដាក់តាំងបង្ហាញ និងធ្វើពិសោធន៍សកម្មភាពរ៉ូបូតទិចទំនើបៗ។

ថ្លែងក្នុងឱកាសនេះដែរ លោកស្រី អ៊ាង និធិជ្ជនី ដឺណេ នាយកប្រតិបត្តិ អង្គការពិព័រណ៍វិទ្យាសាស្រ្តកម្ពុជា បានលើកឡើងថា៖ «កម្មវិធីប្រកួតប្រជែងរ៉ូបូតទិចអូឡាំព្យាដកម្ពុជា ២០២៤ គឺជាថ្នាលអប់រំមួយ ដើម្បីបង្ហាញពីភាពប៉ិនប្រសប់ ទេពកោសល្យ និងសក្តានុពលរបស់យុវជនកម្ពុជា។ ការដែលពួកគាត់អាចពង្រីកវិសាលភាពផ្នែកនវានុវត្តន៍​​ហើយអាចលើកកម្ពស់ចរីភាពនៃបរិស្ថានក្នុងពេលដំណាលគ្នាបានថែមទៀតនោះ គឺជាមោទនភាពមួយរបស់យើងទាំងអស់គ្នា។»

កម្មវិធីប្រកួតប្រជែងរ៉ូបូតទិចអូឡាំព្យាដកម្ពុជា ២០២៤ សបញ្ជាក់ឱ្យយើងឃើញថា វិស័យស្ទែមនៅក្នុងប្រទេសកម្ពុជានឹងបន្តមានភាពត្រចះត្រចង់ទៅថ្ងៃអនាគតជាក់ជាមិនខាន ដោយយើងមានយុវជនជំនាន់ក្រោយដែលមានបុគ្គលិកលក្ខណៈជាអ្នកដឹកនាំ និងជំរុញការអភិវឌ្ឍនវានុវត្តន៍ប្រកបដោយចីរភាព។

សម្រាប់ព័ត៌មានបន្ថែមអំពីកម្មវិធីប្រកួតប្រជែងរ៉ូបូតទិចអូឡាំព្យាដកម្ពុជា ២០២៤ សូមចូលទៅកាន់គេហទំព័ររបស់ង្គការពិព័រណ៍វិទ្យាសាស្រ្តកម្ពុជា។

អ៊ីមែល៖ info@stemcambodia.ngo
ទូរសព្ទ៖ (+855) 69 626 898