ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីសម្ពោធដាក់ឱ្យប្រើប្រាស់សាកលវិទ្យាល័យជាតិគ្រប់គ្រងសាខាវាលស្បូវ នៅព្រឹកថ្ងៃទី១៥ ខែកុម្ភៈ ឆ្នាំ២០២៤ សម្តេចបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា លើកឡើងថា ការកសាងធនធានមនុស្សដែលមានសុខភាពល្អ និងចំណេះដឹងខ្ពស់ គឺជារឿងសំខាន់ និងចាំបាច់ណាស់សម្រាប់សង្គមជាតិមួយ។
សម្តេចធិបតីមានប្រសាសន៍ថា ការកសាង និងបំពាក់សមត្ថភាពមនុស្ស មិនខុសពីការកសាងធនធានមនុស្សសម្រាប់ប្រទេសទេ។ សម្តេចបញ្ជាក់ថា ការមានចំណេះដឹង មានគុណវុឌ្ឍខ្ពស់ ជាមូលដ្ឋានឈានទៅរកការបង្កើនសមត្ថភាពមួយកម្រិតកាន់តែខ្ពស់ ក្នុងនោះ ប្រសិនបើប្រទេសមួយមានធនធានមនុស្សច្រើន មានមូលធនមនុស្សកាន់តែច្រើន មានសុខភាពល្អ នោះយើងនឹងអាចបង្កើនភាពប្រកួតប្រជែងទាំងក្នុងតំបន់ ក៏ដូចជាពិភពលោក។
ជាមួយគ្នានេះ សម្តេចនាយករដ្ឋមន្រ្តី ក៏បានធ្វើការកោតសរសើរចំពោះយុវជនកម្ពុជាដែលមានការអភិវឌ្ឍផ្នែកសមត្ថភាពកាន់តែខ្លាំង ដោយថា ធនធានមនុស្សរបស់យើងបច្ចុប្បន្នក៏មិនអន់ជាងបណ្តាប្រទេសផ្សេងៗដែរ, សម្តេចមានប្រសាសន៍ថា បច្ចុប្បន្ននិស្សិតរបស់យើងបានចេញទៅប្រកួតរូបូត ក៏ដូចជាប្រកួតក្នុងការបង្កើតគំនិតនវានុវត្តន៍ នៅក្រៅប្រទេសបានជោគជ័យ។
…អញ្ចឹងការកសាងធនធានមនុស្សនេះ គឺបង្កើតភាពប្រកួតប្រជែងឱ្យយើងអាចបិទនូវគម្លាតខួរក្បាល, បង្កើតភាពម្ចាស់ការឯករាជ្យរបស់កម្ពុជា…
សម្តេចធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា
សម្តេចធិបតី ហ៊ុន ម៉ាណែត មានប្រសាសន៍ថា ប្រសិនបើកម្ពុជាចង់វិឌ្ឍន៍ទៅជា សេដ្ឋកិច្ចឌីជីថល ឬក៏ឧស្សាហកម្ម ៤.០ គឺលុះត្រាតែលើងមានមូលធនមនុស្ស និងមានមូលដ្ឋានសេដ្ឋកិច្ច ហេដ្ឋារចនាសម្ព័ន្ធដែលអាចធានាបាន។ ដូច្នេះមូលដ្ឋានធនធានមនុស្ស និងហេដ្ឋារចនាសម្ព័ន្ធដែលយើងកសាងក្នុងវិស័យអប់រំ នឹងជួយប្រទេសកម្ពុជា ឈានទៅដល់ការធ្វើទំនើបកម្មមួយជំហ៊ានទៅមុខទៀត ហើយនេះជាការធានានូវភាពប្រកួតប្រជែងរបស់យើងប្រកបដោយចីរភាពរយៈពេលវែង។
ដោយមើលឃើញពីភាពសំខាន់នៃធនធានមនុស្សនេះ ទើបនៅក្នុងរាជរដ្ឋាភិបាលអាណត្តិទី៧ បានដាក់ចេញនូវយុទ្ធសាស្រ្តបញ្ចកោណដំណាក់កាលទី១ ដោយបានដាក់ចេញនូវគោលនយោបាយយុទ្ធសាស្រ្តកំណើនការងារសមធម៌ ប្រសិទ្ធភាព និងស្ថេរភាព ដែលមានអាទិភាពគន្លឹះ៥ គឺ មនុស្ស ផ្លូវ ទឹក ភ្លើង និងបច្ចេកវិទ្យា។ សម្តេចនាយករដ្ឋមន្រ្តីបញ្ជាក់ថា មនុស្សនៅតែជាអាទិភាពទី១ ហើយយុទ្ធសាស្រ្តបញ្ចកោណ ដែលមាន ៥ដំណាក់កាល រយៈពេល២៥ឆ្នាំ ក្នុងនោះ មនុស្ស នៅតែជាអាទិភាពទី១ ព្រោះមានតែមនុស្សទេ ដែលអាចធានានូវការវិវត្តន៍ផ្សេងៗបាន៕
