ភ្នំពេញ – ដើម្បីបង្កើត​នូវ​អនុស្សាវរីយ៍​ដែល​មិន​អាច​បំភ្លេចបាន យុទ្ធនាការ #BeyondTheGames បានផ្តួចផ្តើម​បង្កើត​ការ​បំបែក​ឯតទគ្គកម្ម «បេះដូងច្រើនជាងគេលើពិភពលោក» ដែលជា​ការ​ប្រមូលផ្តុំ​ការ​ចូល​រួមរបស់ប្រជាជនខ្មែរ ដើម្បីបង្ហាញ​ពីទំហំទឹកចិត្ត​ក្នុង​ការ​គាំទ្រ​ដល់កីឡាករ កីឡាការិនីគ្រប់រូប និង​បង្ហាញ​ពីការ​សាទរ នៃភាពជាម្ចាស់ផ្ទះលើកដំបូងរបស់កម្ពុជា នៃព្រឹត្តិការណ៍ស៊ីហ្គេមលើកទី៣២ និង​អាស៊ាន ប៉ារ៉ាហ្គេម​លើកទី១២ ឆ្នាំ​២០២៣។

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជន​កម្ពុជា និង​ជាប្រធានគណៈកម្មការ​ទទួលបន្ទុក​សហការ និង​សម្របសម្រួល​ការងារ​ជាមួយ​គណៈកម្មាធិការជាតិ CAMSOS – CAMAPGOC មានប្រសាសន៍ថា ការបត់បេះដូងនេះ គឺជា​ការ​ចូលរួម​ចំណែក​របស់ ស.ស.យ.ក. ដើម្បីអបអរសាទរភាពជាម្ចាស់ផ្ទះរបស់កម្ពុជា ក្នុង​ការ​រៀបចំព្រឹត្តិការណ៍​ស៊ីហ្គេម​លើកទី៣២ និង​អាស៊ាន​ប៉ារ៉ាហ្គេម​លើកទី១២ ។ ហើយ​គោលបំណង​នៃការបត់បេះដូងនេះ មិន​មែន​គ្រាន់តែ​ផ្តោត​សំខាន់​ទៅ​លើ​ការ​បំបែក​ឯតទគ្គកម្ម​ពិភពលោក​តែមួយ​មុខ​នោះទេ តែការ​បត់បេះដូងនេះ បង្កប់នូវ​អត្ថន័យ​យ៉ាងជ្រាលជ្រៅ បង្ហាញ​អំពី​ក្តីស្រឡាញ់ ការ​ផ្តល់​កម្លាំងចិត្ត និង​ការ​គាំទ្រ​ដោ​យ​គ្មាន​លក្ខខណ្ឌ​របស់ប្រជាជន​ខ្មែរ ដើម្បីបុព្វហេតុ​រួម​សម្រាប់​ប្រទេសជាតិមាតុភូមិ។

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជន​កម្ពុជា

“លើសពីនេះទៅទៀត នេះ​ជាការ​បង្ហាញអំពីសាមគ្គីភាព និង​ការ​រួបរួម​គ្នា​របស់ប្រជាជនខ្មែរ ដើម្បីជាការ​គាំទ្រ​ដល់កីឡាករ កីឡាការិនី តាមរយៈសកម្មភាពជាក់ស្តែង ក៏​ដូចជា​បង្ហាញ​ឱ្យ​ពិភពលោក​បានឃើញថា ប្រទេស​កម្ពុជាតូច តែបេះដូងរបស់ប្រជាជន​កម្ពុជាធំទូលាយ”

ទន្ទឹមគ្នានេះ ឯកឧត្តម សុខ សប្បាយណា ប្រធាន​ក្រុមប្រតិបត្តិយុទ្ធនាការ #BeyondTheGames មានប្រសាសន៍ថា ជាផែនការក្រុមការងារគ្រោងប្រមូល​បេះដូង​ឱ្យ​បាន​ចំនួន១លាន ដែលមួយ​បេះដូងសមមាត្រ​ជាថវិកា​ចំនួន ៥០០រៀល ដែលសរុបជាថវិកា ៥០០លានរៀល ដោយមានដៃគូបរិច្ចាគចំនួន៥ ស្ម័គ្រចិត្ត​ចូលរួម​បរិច្ចាគ ជូន​កីឡាករ កីឡាការិនី ដែល​មានពិការភាព តាមរយៈគណៈកម្មាធិការជាតិប៉ារ៉ាឡាំពិក​កម្ពុជា។

បើតាម​ប្រសាសន៍របស់ ឯកឧត្តម សុខ សប្បាយណា ការបត់បេះដូងនេះ គឺលើសពី​បេះដូងក្រដាសធម្មតា ព្រោះបេះដូងទាំងនេះបង្ហាញ​ឱ្យ​ឃើញពីទំហំទឹកចិត្តនៃការ​គាំទ្ររបស់ប្រជាពលរដ្ឋទាំងអស់ទៅ​កាន់កីឡាករ កីឡាការិនី ហើយ​វាប្រៀបបានទៅនឹង​ការងារសង្គមមួយ ដែលប្រជាពលរដ្ឋ​គ្រប់រូប​អាចចូលរួម​បាន​ដើម្បីរកថវិកាសម្រាប់កីឡាករ កីឡាការិនី ដែលខិតខំប្រឹងប្រែងហ្វឹកហាត់។

គួរ​បញ្ជាក់ថា ការបំបែកឯតទគ្គកម្មពិភពលោក «បេះដូងច្រើនជាងគេលើពិភពលោក» ត្រូវ​បានផ្តួចផ្តើម​ឡើងក្នុង​គោល​បំណងបង្កើត​ជាវេទិកាឱ្យ​មានការ​ចូលរួម​យ៉ាង​ទូលំទូលាយពីសំណាក់មហាជន​គ្រប់មជ្ឈដ្ឋាន ដើម្បីបង្ហាញឱ្យ​ឃើញពី​ការ​រួមសហការគ្នា​របស់កម្ពុជា ក្នុង​ការ​ចែករំលែក​ក្តីស្រឡាញ់ ការ​លើកទឹកចិត្ត និង​ការ​គាំទ្រដើម្បីបុព្វហេតុ​រួម​សម្រាប់ជាតិមាតុភូមិ ។ មិនត្រឹមតែជាការបត់បេះដូងក្រដាសធម្មតានោះទេ ការបត់បេះដូងនេះ ក៏នឹងអនុញ្ញាតឱ្យ​ដៃគូសប្បុរសមានឱកាសអាចចូលរួមបរិច្ចាគជាថវិកាសម្រាប់ជូនទៅដល់គណៈកម្មាធិការជាតិប៉ារ៉ាឡាំពិកកម្ពុជា ដើម្បីជាការ​គាំទ្រដល់កីឡាករ និង​កីឡាការិនីដែលមានពិការភាព ដោយបេះដូងដែលទទួលបានពីការចូលរួមរបស់មហាជនគ្រប់រូប នឹង​ក្លាយ​ទៅជាកម្មវត្ថុក្នុងការ​ស្វែងរកការបរិច្ចាគថវិកា ក្នុងនោះ​មួយបេះដូងមានតម្លៃសមមាត្រទៅនឹងថវិកាចំនួន៥០០រៀល​ ។

បច្ចុប្បន្ន​មានការ​បំបែក​កំណត់ត្រាប្រភេទនេះ​នៅ​ប្រទេស​អង់គ្លេស​ដែលមានបេះដូងបត់ និង​បានដាក់បង្ហាញ​ចំនួន ៥៣៧០៤បេះដូង ។ សម្រាប់ប្រទេសកម្ពុជា គ្រោង​នឹង​បត់​ឱ្យ​បាន ១លានបេះដូង ដូច្នេះសាធារណជន​គ្រប់​មជ្ឈដ្ឋាន អាចចូលរួម​បំបែក​ឯតទគ្គកម្មនេះ ដោយ​​អាច​ចូលរួម​បត់បេះដូង​​នៅ​ទីតាំង​អចិន្រ្តៃ អគារ The Kampus ឬ​នៅ​គ្រប់ស្ថានីយ៍បេះដូង​ទាំង​ ៨៤ទីតាំង ដែលមាន​និមិត្តសញ្ញាតំណាង​របស់​យុទ្ធនាការ #BeyondTheGames ជាសម្គាល់ ។

បេះដូងដែលទទួលពីការចូលរួមបំបែកឯតទគ្គកម្មនេះ នឹងត្រូវ​យក​ទៅ​ដាក់បង្ហាញ​ក្នុង​ព្រឹត្តិការណ៍អង្គរសង្រ្កាន្តឆ្នាំ​២០២៣ បន្ទាប់​មក​ បេះដូងទាំងនោះ នឹង​យកទៅ​ដាក់បង្ហាញ​ក្នុង​ការ​ប្រកួត​កីឡាអាស៊ីអាគ្នេយ៍​លើកទី៣២ និង​អាស៊ានប៉ារ៉ាហ្គេម​លើកទី១២ ឆ្នាំ​២០២៣៕