ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បើចង់រៀនខ្ពស់ ត្រូវរៀនបន្តថ្នាក់សាកលវិទ្យាល័យ, បើចង់បានប្រាក់ខែភ្លាមៗ រកការងារធ្វើ, បើចង់រៀនបន្តនៅក្រៅប្រទេស ត្រូវពង្រឹងសមត្ថភាពភាសាបរទេសណាមួយ ហើយស្វែងអាហារូបករណ៍ និងបើចង់ឆាប់មានជំនាញ ត្រូវរៀនជំនាញបច្ចេកទេស ឬវគ្គខ្លី។ នេះជាការលើកឡើងរបស់លោក កែវ ធារី អ្នកសម្របសម្រួលកម្មវិធីជាន់ខ្ពស់ នៃ CGTI ក្នុងកម្មវិធីបន្ទាប់បាក់ឌុប កាលពីពេលថ្មីៗនេះ។
លោក កែវ ធារី បានចែករំលែកវិធីសាស្ត្រសម្រេចចិត្ត ក្រោយចប់បាក់ឌុបថា ជាដំបូងយុវជនត្រូវរៀបចំផែនការជីវិតសម្រាប់ខ្លួនឯងឱ្យបានច្បាស់ ព្រោះក្នុងនាមជាយុវជន ត្រូវចេះបង្កើតឱកាស ចាប់ឱកាស និងស្វែងរកឱកាស សម្រាប់កសាងជីវិតខ្លួនឯង។
លោកថា ដើម្បីអាចរៀបចំផែនការជីវិតខ្លួនឯងបានល្អ យុវជនត្រូវវាយតម្លៃ និងស្គាល់ពីចំណុចខ្លាំង និងចំណុចខ្សោយខ្លួនឯងឱ្យបានច្បាស់។ ព្រោះការស្គាល់ពីសមត្ថភាពខ្លួនឯងច្បាស់ គឺជាគន្លឹះសំខាន់ ដើម្បីឱ្យយុវជនអាចកំណត់ពីប្រភេទការងារ ឬអាជីព ដែលចង់ធ្វើ ព្រមទាំងអាចស្វែងរកការងារ ស្របតាមតម្រូវការទីផ្សារ។
បើតាមលោក កែវ ធារី ក្រោយបញ្ចប់ការសិក្សាថ្នាក់ទី១២ យុវជនមានជម្រើសចំនួន ៣ ដើម្បីសម្រេចចិត្ត។ ជម្រើសទី១ គឺ ការប្រមូលព័ត៌មានអំពីសាកលវិទ្យាល័យ ដើម្បីងាយស្រួលជ្រើសរើសសាកលវិទ្យាល័យ ដែលចាប់អារម្មណ៍ តាមរយៈការសិក្សាពីសាកលវិទ្យាល័យនីមួយៗបានឱ្យច្បាស់។ ជម្រើសទី២ សម្រាប់អ្នកមិនទាន់ចង់រៀនបន្តភ្លាមៗ អាចយកពេល ១ឆ្នាំ ឬ២ឆ្នាំ ដើម្បីពង្រឹងសមត្ថភាពខ្លួនឯងបន្ថែម ជាពិសេស គឺសមត្ថភាពភាសា និងបច្ចេកវិទ្យា។
ជម្រើសទី៣ គឺការជ្រើសរើសរៀនជំនាញបច្ចេកទេស និងវិជ្ជាជីវៈ ដើម្បីឆាប់មានជំនាញ និងឆាប់ទទួលបានឱកាសចេញធ្វើការ។
លោក កែវ ធារី សង្កត់ធ្ងន់ថា រឿងសំខាន់មួយទៀត ដែលយុវជនត្រូវគិតគូរ គឺការរៀបចំផែនការហិរញ្ញវត្ថុ ព្រោះការបន្តការសិក្សា ត្រូវការចំណាយលើការថ្លៃសាលា សៀវភៅ និងការរស់នៅប្រចាំថ្ងៃ។ ដូច្នេះ ផែនការចំណាយ ប្រចាំថ្ងៃ ប្រចាំសប្ដាហ៍ និងប្រចាំឆ្នាំ ពិតជាមានសារៈសំខាន់ណាស់ ក្នុងការធានាឱ្យបានជីវិតមួយ ដែលមិនខ្វះមុខខ្វះក្រោយ៕
