សម្រាប់អ្នកប្រើប្រាស់កុំព្យូទ័រភាគច្រើនប្រាកដជាស្គាល់ឈ្មោះកុំព្យូទ័រម៉ាក Dell យ៉ាងច្បាស់ ដែលបច្ចុប្បន្នស្លាកយីហោផលិតផលបច្ចេកវិទ្យាមួយនេះ កំពុងទទួលបានប្រជាប្រិយភាពគាំទ្រយ៉ាងខ្លាំង និងកំពុងប្រកួតប្រជែងគុណភាពជាមួយផលិតកុំព្យូទ័រផ្សេងៗ ។ ក្រុមហ៊ុន Dell បានដាក់ឈ្មោះដោយលោក Michael Dell យកតាមឈ្មោះរបស់គាត់ផ្ទាល់តែម្តង ហើយគេដឹងថាលោកជាមនុស្សដែលច្បាស់លាស់នឹងការងារ ព្រមទាំងមានផែនការជីវិតតាំងពីកុមារភាព ។

បច្ចុប្បន្នលោក Michael Dell មានអាយុ ៥៨ឆ្នាំ ជាស្ថាបនិក និងប្រធានក្រុមប្រឹក្សាភិបាលក្រុមហ៊ុនផលិតបច្ចេកវិទ្យាម៉ាក Dell ព្រមទាំងបានជាប់ឈ្មោះជាមហាសេដ្ឋីបច្ចេកវិទ្យាមានទឹកប្រាក់ប្រមាណជាង ៥០ពាន់លានដុល្លារអាមេរិក ។ ទស្សនាវដ្តី Forbes ដែលចុះផ្សាយពីបុគ្គលឆ្នើមរបស់ពិភពលោក បានផ្តល់ចំណាត់ថ្នាក់លោក Dell ជាបុគ្គលមានប្រជាប្រិយភាពលេខរៀងទី៥៩ ក្នុងចំណោមបុគ្គលមានប្រជាប្រិយភាពរបស់ពិភពលោក និងជាប់ចំណាត់ថ្នាក់ជាមហាសេដ្ឋីលេខរៀងលំដាប់ទី២៣ ។

លោក Michael Dell កើតនៅថ្ងៃទី២៣ ខែកុម្ភៈ ឆ្នាំ១៩៦៥ នៅទីក្រុង Houston រដ្ឋ Texas សហរដ្ឋអាមេរិក ។ អតីតកាលលោក Michael Dell បានចាប់ផ្តើមរៀនធ្វើការតាំងពីអាយុ ១២ឆ្នាំ ដោយគាត់ចាប់ផ្តើមអាជីពដំបូងជាអ្នកលាងចាននៅភោជនីយដ្ឋានមួយ ។ ក្នុងនាមជាសិស្សធ្វើការបណ្តើររៀនបណ្តើរលោកបានបន្តការសិក្សានៅសាកលវិទ្យា Texas ទីក្រុង Austin ។ ជីវិតជានិស្សិតមហាវិទ្យាល័យ លោក Dell មិនមែនជាសិស្សពូកែទេ ហើយបានព្យូរការសិក្សានៅអាយុ ១៩ឆ្នាំ ហើយងាកមកចាប់អារម្មណ៍លើការងារបង្កើតកុំព្យូទ័រ និងចូលរួមសិក្ខាសាលាបច្ចេកវិទ្យាជាច្រើនដែលនិយាយពីកុំព្យូទ័រ ។

យុវជន Michael Dell បានប្រើទុនដំបូងទឹកប្រាក់ចំនួន ១ពាន់ដុល្លារវិនិយោគលើការបង្កើតប្រព័ន្ធកុំព្យូទ័រ ដែលហៅថា PCs Limited នៅឆ្នាំ១៩៨៤ ។ ក្រោយមកលោកបានលក់កុំព្យូទ័រទទួលបានប្រាក់ចំនួន ៨ម៉ឺនដុល្លារ ហើយក៏បានពង្រីកខ្លួនជាបន្តបន្ទាប់ និងចេញមុខជាក្រុមហ៊ុនលក់ផលិតផលជាសាធារណៈនៅឆ្នាំ១៩៨៨ ។ ឆ្នាំដដែលនេះ PCs Limited របស់លោកបានក្លាយជាក្រុមហ៊ុនសាជីវកម្មកុំព្យូទ័រដែលមានឈ្មោះថា Dell Computer Corporation and Ultimately Dell Inc., ហើយបានប្រតិបត្តិការលក់ដោយផ្ទាល់ទៅកាន់អតិថិជន ព្រមទាំងមានក្រុមការងារជំនាញជួសជុលនៅពេលអតិថិជនជួបបញ្ហា ។ ក្រុមហ៊ុនសាជីវកម្មកុំព្យូទ័រនេះមិនប្រើប្រាស់សេវាលក់បែបឈ្មួញកណ្តាលនោះទេ គ្រប់យ៉ាងត្រូវលក់និងទិញដោយផ្ទាល់ពីក្រុមហ៊ុនតែម្តង ។

ថ្វីត្បិតលោក Dell មិនបានសិក្សាកម្រិតថ្នាក់មហាវិទ្យាល័យពាណិជ្ជកម្មក៏ពិតមែន ប៉ុន្តែតាមរយៈការងារដែលលោកស្រឡាញ់ លោកបានរៀបចំផែនការផ្ទាល់ខ្លួន និងផែនការអាជីវកម្មបានយ៉ាងល្អ ព្រមទាំងបង្កើតទស្សនៈវិស័យពាណិជ្ជកម្មដោយឈរលើគោលការណ៍លក់ដោយព្យាយាមកាត់បន្ថយចំណាយ និងផ្តល់សេវាកម្មបន្ថែមប្រកបដោយទំនុកចិត្តដល់អតិថិជន ។ ស្របនឹងជោគជ័យលើគោលដៅការងាររបស់ខ្លួន រាល់វេទិកាសាធារណៈម្តងៗ លោក Dell តែងតែចែករំលែកគន្លឺះគ្រប់គ្រងអាជីវកម្ម និងការកសាងភាពច្បាស់លាស់នៃគោលដៅជីវិតទៅកាន់យុវជន ។

នៅឆ្នាំ២០១៤ លោកបានចាកចេញពីតំណែងជានាយកប្រតិបត្តិក្រុមហ៊ុន និងកាន់តួនាទីជាប្រធានក្រុមប្រឹក្សាភិបាល ព្រមទាំងចាប់ផ្តើមបង្កើតមូលនិធិជួយសង្គមផ្សេងៗ ។ ទន្ទឹមគ្នានេះ លោក Dell ក៏ជាអ្នកផ្តួចផ្តើមឱ្យកើតមានវេទិកាសេដ្ឋកិច្ចពិភពលោក ឬ World Economic Forum និងជាគណៈកម្មាធិការប្រតិបត្តិ នៃក្រុមប្រឹក្សាពាណិជ្ជកម្មអន្តរជាតិ និងជាទីប្រឹក្សារបស់ប្រធានាធិបតីសហរដ្ឋអាមេរិកលើកិច្ចការវិទ្យាសាស្ត្រ និងបច្ចេកវិទ្យា ។

គួររម្លឹកដែរថា នៅឆ្នាំ១៩៩៩ លោក Michael Dell និងភរិយាលោកស្រី Susan បានបង្កើតមូលនិធិសប្បុរធម៌ឈ្មោះថា Michael & Susan Dell Foundation ដើម្បីផ្តល់ថវិកាជួយគាំទ្រដល់ការរស់នៅរបស់កុមារជុំវិញពិភពលោក ដោយមូលនិធិនេះផ្តោតសំខាន់លើការលើកកម្ពស់សុខភាពសាធារណៈ ការអប់រំ សុវត្ថិភាពកុមារ ការអភិវឌ្ឍយុវជន និងកិច្ចការងារគាំពារទារកជាដើម ។ តាមរយៈការបង្កើតមូលនិធិជួយពិភពលោកនេះ លោក Michael Dell និងគ្រួសារបានចំណាយប្រាក់រាប់សិបលានដុល្លារជារៀងរាល់ឆ្នាំដើម្បីកិច្ចការមនុស្សធម៌ ។ គេនៅចាំបានថា ម្តងនោះកាលពីឆ្នាំ ២០០៦ លោក Dell បានបរិច្ចាកថវិកាប្រមាណជាង ៥០លានដុល្លារអាមេរិកឱ្យទៅសាកលវិទ្យាល័យ University of Texas នៅទីក្រុង Austin ដែលលោកធ្លាប់សិក្សា ៕