ឯកឧត្តម អ៊ុង បូរាត រដ្ឋលេខាធិការ ក្រសួងអប់រំ យុវជន និងកីឡា មានប្រសាសន៍ថា បើនិយាយអំពីចំណុចសំខាន់ៗ ដែលបង្ហាញអំពីនិយមន័យ​គោលគំនិតរបស់ផែនការ(ទស្សនទាន) សាលារៀនគំរូ គឺភាពឥតខ្ចោះ និងភាពពេញលេញ។  ចំពោះទស្សនទានទីមួយគឺ សំដៅដល់ប្រភេទសាលារៀន ដែលល្អឥតខ្ចោះ។ ប៉ុន្តែការកំណត់បែបនេះក្នុងស្ថានភាពសង្គមខ្មែរបច្ចុប្បន្ន គឺបង្កបាននូវសំណួរផុសឡើងអំពីភាពសុក្រឹត ដោយហេតុថា លទ្ធភាពនៃសាលារៀននីមួយៗ ក៏មានភាពខុសគ្នា ទន្ទឹមគ្នានោះវាបង្កឱ្យសាលាដែលស្ថិតក្នុងស្ថានភាពមិនសូវល្អរារែកក្នុងការប្រព្រឹត្តិ។

ឯកឧត្តម បូរាត លើកឡើងថា និយមន័យ ឬទស្សនទានសាលារៀនគំរូ គឺត្រូវមានភាពបត់បែន ពីព្រោះបើកាលណាប្រកាន់យកនូវភាពល្អឥតខ្ចោះពេក នោះនឹងបង្កើតបាននូវចំណោទបញ្ហាមួយដូចជា ធ្វើឱ្យអ្នកអនុវត្តន៍ អ្នកគ្រប់គ្រងសាលារៀន ឬអ្នកពាក់ព័ន្ធនឹងការប្រតិបត្តិសកម្មភាពទាំងឡាយ មានក្ដីបារម្ភថានឹងផ្តល់ភាពលំបាកក្នុងការចាប់ផ្តើម ឬកើតបាននូវសំណួរថា ហេតុអ្វីបានជាដាក់សាលារៀនល្អឥតខ្ចោះ ឱ្យអនុវត្តន៍ប៉ុនគ្នាទូទាំងប្រទេស ខណៈស្ថានភាពមិនដូចគ្នា? មួយវិញទៀត បើដាក់ទស្សនទានសាលារៀនគំរូថាជាភាពល្អឥតខ្ចោះ គឺជំរុញឱ្យមានគំនិតមួយថា មិនអាចនឹងទៅមុខរួចនោះទេ ជាពិសេសសាលាក្នុងតំបន់ដែលជួបការលំបាក់ គឺកាន់តែមិនងាយទទួលយកនូវការអនុវត្ត ឬក៏បង្កើនភាពតានតឹងបន្ថែម។

ធាតុពិតនៃទស្សនទាន របស់សាលារៀនគំរូ គឺជារូបភាព ពេញលេញ នៃសាលារៀនមួយ! ក៏ដូចជានៅតាមភូមិសិក្សាមត្តេយ្យ បឋម និងមធ្យមសិក្សា។ ដែលមានទាំងការគ្រប់គ្រង ដំណើរការសាលារៀន ការរៀបចំកម្មវិធីក្រៅម៉ោងសិក្សា កិច្ចការសុខភាព អាហារូបត្ថម្ភ ក៏ដូចជាការលើកទឹកចិត្តឱ្យចូលរួមរបស់សហគមន៍។

ឯកឧត្តម អ៊ុង បូរាត រដ្ឋលេខាធិការ ក្រសួងអប់រំ យុវជន និងកីឡា

ឯកឧត្តម អ៊ុង បូរាត បញ្ជាក់ថា សាលារៀនគំរូ គឺជាការអនុវត្ត នូវរូបភាពពេញលេញមួយ ដែលសាលារៀននៅក្នុងព្រះរាជាណាចក្រកម្ពុជានៅសម័យបច្ចុប្បន្ននេះអាចធ្វើបានទាំងអស់គ្នា។ ដូច្នេះហើយ រាល់សាលារៀននីមួយៗ ត្រូវឆ្លុះបញ្ចាំងអំពីស្ថានភាពទីតាំងសាលាដែលខ្លួនកំពុងមាន ថាតើអ្វីខ្លះទៀត ដែលត្រូវការបំពេញ ដើម្បីឱ្យក្លាយទៅជាសាលារៀនគំរូ។ លោក បូរាត សង្កត់សម្ដីធ្ងន់ថា ត្បិតតែសាលារៀនគំរូផ្តោតទៅលើ គុណភាពនៃការសិក្សា ប៉ុន្តែក៏អាស្រ័យទៅលើ ការរៀបចំនៃដំណើរការប្រតិបត្តិដែរ ពីព្រោះថា បើការប្រព្រឹត្តិបានល្អ ក៏នឹងនាំមកនូវលទ្ធផលល្អ៕