វេទិកាយុវជន និង​ធុរកិច្ច​ឆ្នាំ២០២៥ ដែល​រៀបចំ​ឡើង​ដោយ​ក្រុមយុវជន នៃក្លឹបធុរកិច្ច (Business Society) របស់សាកលវិទ្យាល័យអាមេរិកាំងភ្នំពេញ ក្រោម​មូលបទ បម្លែងវិបត្តិជាឱកាស ៖ «លើកតម្កើងអត្តសញ្ញាណជាតិខ្មែរ និងលើកកម្ពស់សក្ដានុពលយុវជនតាមរយៈពាណិជ្ជកម្មក្នុងស្រុក» (Turning Crisis into Opportunities: Shaping Cambodianess and Empowering Youth Through Local Business) ដែលបានប្រព្រឹត្តឡើងកាលពីថ្ងៃសុក្រ ថ្ងៃទី២១ ខែ វិច្ឆិកា ឆ្នាំ ២០២៥ កន្លងទៅមជ្ឈមណ្ឌលបច្ចេកវិទ្យា (AUPP Tech Center) នៃសាកលវិទ្យាល័យអាមេរិកាំងភ្នំពេញ ទទួលបានការគាំទ្រគួរជាទីកត់សម្គាល់ ដោយមានការ​ចូលរួមពីសិស្ស-និស្សិត និងសាធារណជន​ជាង ៣០០នាក់។

ក្រុមយុវជន នៃក្លឹបធុរកិច្ច (Business Society) នៃសាកលវិទ្យាអាមេរិកកាំងភ្នំពេញ ត្រូវ​បានបង្កើតឡើងក្នុងគោលបំណងជំរុញ លើកទឹកចិត្ត និងប្រមូលផ្ដុំយុវជនពោរពេញដោយទេពកោសល្យ ជាពិសេសផ្នែកជំនាញធុរកិច្ចដើម្បីទទួលបានឱកាសស្វែងយល់ ចែករំលែកបទពិសោធន៍ ចំណេះដឹង និងទស្សនៈផ្ទាល់ខ្លួន ក្នុងគោលបំណងចម្បងធំមួយ គឺរួមចំណែកលើកស្ទួយខឿនសេដ្ឋកិច្ចប្រទេសកម្ពុជា ស្របតាមយុទ្ធសាស្រ្តរាជរដ្ឋាភិបាលដឹកនាំដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។

បញ្ហាដែលកំពុងកើតឡើងនៅក្នុងសង្គមបច្ចុប្បន្ន ពិសេសបញ្ហាជម្លោះព្រំដែនកម្ពុជា-ថៃ ដែលនាំឱ្យមានការសម្ដែងការមិនពេញចិត្ត និងពហិការផលិតផលនានា បានជំរុញឱ្យក្រុមការងាររៀបចំ «វេទិកាយុវជននិងធុរកិច្ច ឆ្នាំ២០២៥» ឡើង ក្នុងគោលបំណងជំរុញនូវឆន្ទៈ មនសិការ និងស្មារតីស្នេហាជាតិ និងលើកកម្ពស់ចំណេះដឹងអំពីសហគ្រិនភាព នវានុវត្តន៍ និងការអភិវឌ្ឍជំនាញ ដើម្បីចាប់យកកាលានុវត្តភាពថ្មីៗ សម្រាប់យុវជនខ្មែរគ្រប់រូប។

ក្នុងនោះផងដែរ វេទិកាមួយនេះទទួលបានការចូលរួមពីសំណាក់វត្តមាន ឯកឧត្តមសំ សិទ្ធិស័ក្តិ អនុរដ្ឋលេខាធិការនៃក្រសួងពាណិជ្ជកម្ម និងជាតំណាងដ៏ខ្ពង់ខ្ពស់ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម អមដោយការចូលរួមពីសំណាក់ លោកស្រីបណ្ឌិត លិន កន្និកា និង លោកបណ្ឌិត Keith Sharp អនុប្រធាននៃសាកលវិទ្យាល័យអាមេរិកកាំងភ្នំពេញ។

ទន្ទឹមនឹងនេះ នៅក្នុងកម្មវិធីក៏ទទួលបានការចូលរួមពីវាគ្មិនកិត្តិយស ឧកញ៉ា ប៉ិច បូឡែន ប្រធានសមាគម​សហគ្រិន​វ័យក្មេងកម្ពុជា ដែលចូលរួម ចែករំលែកជុំវិញប្រធានបទ ៖ «លើកកម្ពស់សក្ដានុពលយុវជន ដើម្បីអនាគតពាណិជ្ជកម្មកម្ពុជា» ដោយ ឧកញ៉ាប្រធាន បានលើកឡើងចំណុចជាច្រើនជុំវិញគន្លឹះក្នុងការចាប់យកអាជីវកម្មបង្កើតថ្មី ការតាមដានដោយយកចិត្តទុកដាក់លើស្ថានភាពសេដ្ឋកិច្ច និងឱកាសវិនិយោគមួយចំនួន ដែលអ្នកចូលរួមអាចទទួលបានការយល់ដឹងដោយផ្ទាល់អំពីការត្រៀមលក្ខណៈសម្រាប់អនាគតនៃឧស្សាហកម្មនិងពាណិជ្ជកម្មរបស់កម្ពុជា។

ពិសេសជាងនេះទៅទៀត យើងបានរៀបចំនូវកិច្ចពិភាក្សាដ៏មានសារសំខាន់ ដោយមានការអញ្ជើញចូលរួម៖

• លោក ជា សុខហ៊ី បីល នាយកគ្រប់គ្រងក្រុមហ៊ុន Omohub និង TedxPhnom Penh
• លោក ញ៉ែម ដាវីត អ្នកឯកទេសអភិវឌ្ឍន៍ជំនាញ នៃមូលនិធិអភិវឌ្ឍន៍ជំនាញ
• កញ្ញា ដែក ដារី ស្ថាបនិក 360 Events
• លោកបណ្ឌិត Sing Ong Yu ព្រឹទ្ធបុរសមហាវិទ្យាល័យធុរកិច្ច និងគ្រប់គ្រង

ដោយបានចែករំលែកនិងពិភាក្សាទៅលើបានផ្ដល់នូវទំនុកចិត្តដល់យុវជនកម្ពុជាក្នុងការពង្រឹងអត្តសញ្ញាណជាតិនិងមោទនភាពជាតិរបស់យើងតាមរយៈសហគ្រិនភាព នវានុវត្តន៍ និងឌីជីថល។

គោលបំណងសំខាន់របស់ វេទិកាយុវជន និងធុរកិច្ច គឺ លើកកម្ពស់ចំណេះដឹងទាក់ទងនឹងសហគ្រិនភាព ការច្នៃប្រឌិត និងការអភិវឌ្ឍជំនាញ ដើម្បីចាប់យកឱកាសថ្មីៗសម្រាប់យុវជនកម្ពុជា។ ដោយយើងជឿជាក់យ៉ាងមុតមាំថា “មានតែការរួបរួមគ្នា ទើបយើងរឹងមាំ” ជាពិសេសក្នុងនាមយុវជនជំនាន់ក្រោយ យើងសង្ឃឹមថាកម្មវិធីនេះនឹងផ្តល់តម្លៃក្នុងការលើកស្ទួយអត្តសញ្ញាណជាតិខ្មែរយើង និងទទួលបានការចូលរួមយ៉ាងច្រើនពីសហគ្រិន អាជីវកម្មថ្មី សិស្ស និស្សិត និងសាធារណជនពីគ្រប់មជ្ឈដ្ឋាន៕