ទិវាសុខភាពផ្លូវចិត្តពិភពលោក ឬ World Mental Health Day តែងប្រារព្ធនៅថ្ងៃទី១០ ខែតុលាជារៀងរាល់ឆ្នាំ ។ ទិវានេះមានគោលបំណងបង្ហាញពីសារៈសំខាន់នៃសុខភាពផ្លូវចិត្ត, បង្ហាញពីកិច្ចខិតខំប្រឹងប្រែងរបស់អ្នកពាក់ព័ន្ធគាំទ្រដល់សកម្មភាពអប់រំសុខភាពផ្លូវចិត្ត, បង្កើនការយល់ដឹងពីវិធីដោះស្រាយសុខភាពផ្លូវចិត្ត, និងការតស៊ូមតិដើម្បីសុខុមាលភាពផ្លូវចិត្តជាដើម ។

ទិវាសុខភាពផ្លូវចិត្តពិភពលោកឆ្នាំ២០២៣ ប្រារព្ធឡើងក្រោមប្រធានបទ “សុខភាពផ្លូវចិត្ត គឺជាសិទ្ធិមនុស្សសកល” ដែលជាសញ្ញាអាចបញ្ជាក់ថា បញ្ហាសុខភាពផ្លូវចិត្តរបស់មនុស្សគ្រប់រូបជាបញ្ហាសិទ្ធិមនុស្ស ដែលគ្រប់គ្នាត្រូវយកចិត្តទុកដាក់ ការពារ គាំទ្រ ព្រមទាំងពង្រឹងសេវាសុខភាពផ្លូវចិត្តឱ្យមានគុណភាពល្អ ។

អង្គការសុខភាពពិភពលោក (WHO) បានលើកឡើងថា សុខភាពផ្លូវចិត្តគឺជាសិទ្ធិជាមូលដ្ឋានរបស់មនុស្សគ្រប់រូប “ចិត្តរបស់យើង សិទ្ធិយើង – Our minds, our rights” ។ មនុស្សគ្រប់រូបទោះនៅទីណាក៏ដោយ មានសិទ្ធិទទួលបានស្តង់ដារសុខភាពផ្លូវចិត្តខ្ពស់បំផុត ។ សិទ្ធិនេះរាប់បញ្ចូលទាំងសិទ្ធិទទួលបានការការពារពីហានិភ័យសុខភាពផ្លូវចិត្ត ព្រមទាំងការថែទាំប្រកបដោយគុណភាព និងសិទ្ធិទទួលបានសេរីភាព ឯករាជ្យភាព និងការដាក់បញ្ចូលក្នុងសហគមន៍ ។

សុខភាពផ្លូវចិត្តល្អមានសារៈសំខាន់ចំពោះសុខុមាលភាពទូទៅ ។ បច្ចុប្បន្នមនុស្សម្នាក់ក្នុងចំណោមប្រាំបីនាក់នៅទូទាំងពិភពលោកកំពុងរស់នៅជាមួយនឹងស្ថានភាពប៉ះទង្គិចសុខភាពផ្លូវចិត្ត ដែលអាចប៉ះពាល់ដល់សុខភាពផ្លូវកាយ សុខុមាលភាពនៃការរស់នៅរបស់ពួកគេ ។ ស្ថានភាពសុខភាពផ្លូវចិត្តក៏កំពុងជះឥទ្ធិពលខ្លាំង និងមានអត្រាកកំណើនខ្ពស់ទៅលើកុមារ និងមនុស្សវ័យជំទង់ផងដែរ ។

គួរបញ្ជាក់ថា តាមការចុះផ្សាយរបស់ World Economic Forum បានឱ្យដឹងថា ប្រជាជន ៥១% នៃមនុស្សវ័យក្មេងដែលមានអាយុពី ២២ ទៅ ២៧ ឆ្នាំបានស្វែងរកជំនួយសម្រាប់បញ្ហាផ្លូវចិត្ត ឬកើតមានបញ្ហាសុខភាពផ្លូវចិត្តក្នុងឆ្នាំកន្លងមក ។ បញ្ហាសុខភាពផ្លូវចិត្តកើតឡើងកាន់តែធ្ងន់ធ្ងរសម្រាប់ប្រជាជនដែលងាយរងគ្រោះ ដូចជា ជនអន្តោប្រវេសន៍ និងអ្នកទទួលរងការរើសអើងនានា។ សុខុមាលភាពផ្លូវចិត្តរបស់យុវជន និងមនុស្សវ័យជំទង់កំពុងលេចចេញជាកង្វល់ដ៏សំខាន់មួយ ដែលឆ្លុះបញ្ចាំងគុណភាពជីវិត និងសកម្មភាពរស់នៅរបស់ពួកគេ ។

ទោះយ៉ាងណាក៏ដោយគេនៅតែអាចរកឃើញដំណោះស្រាយសម្រាប់បញ្ហាផ្លូវចិត្ត ។ ដំណោះស្រាយសមស្របដែលគ្រប់គ្នាអាចធ្វើបាន ដើម្បីលើកកម្ពស់សុខភាពផ្លូវចិត្តមនុស្សនៅជុំវិញខ្លួន គឺចាត់ទុកសុខភាពផ្លូវចិត្តរបស់មនុស្សគ្រប់រូបប្រៀបដូចជាអាយុជីវិតបុគ្គល និងជាក្តីសង្ឃឹមរបស់សហគមន៍ ។ ប្រសិនបើនរណាម្នាក់មានអារម្មណ៍បាក់ទឹកចិត្ត ឬធ្លាក់ទឹកចិត្ត ឬមានជំងឺផ្លូវចិត្តណាមួយ គួរផ្តល់យោបល់ដើម្បីឱ្យបុគ្គលយល់ដឹងអំពីវិធីសាស្ត្រអន្តរាគមន៍បង្ការបញ្ហាសុខភាពផ្លូវចិត្ត, ទប់ស្កាត់ការរើសអើងទៅលើបុគ្គលដែលមានបញ្ហាផ្លូវចិត្ត, និងជំរុញឱ្យមានការចូលរួមពីស្ថាប័នពាក់ព័ន្ធយកចិត្តទៅលើការថែទាំ ការព្យាបាលឱ្យបានត្រឹមត្រូវ និងទាន់ពេលវេលា ។

សូមជម្រាបថា ទិវាអន្តរជាតិសម្រាប់ការអប់រំសុខភាពផ្លូវចិត្តសកលលោក ឬទិវាសុខភាពផ្លូវចិត្តពិភពលោកបានប្រារព្ធឡើងជាលើកដំបូងនៅក្នុងឆ្នាំ១៩៩២ ជាគំនិតផ្តួចផ្តើមរបស់សហព័ន្ធពិភពលោកសម្រាប់សុខភាពផ្លូវចិត្ត ដែលជាអង្គការសុខភាពផ្លូវចិត្តពិភពលោកមានសមាជិក និងទំនាក់ទំនងនៅក្នុងប្រទេសជាង១៥០៕