កង្វះខាតជាសកលនៃកម្លាំងពលកម្មជំនាញផ្នែកវិទ្យាសាស្ត្រ វិស្វកម្ម បច្ចេកវិទ្យា និងគណិតវិទ្យា (STEM) បាននាំឱ្យមានការចោទជាសំណួរសំខាន់ៗមួយចំនួនដូចជា ៖

•  តើប្រទេសសេដ្ឋកិច្ចឈានមុខគេ នឹងចាប់យកឱកាសក្នុងសម័យឌីជីថលដោយរបៀបណា ប្រសិនបើមិនមានធនធានមនុស្សគ្រប់គ្រាន់នោះទេ?

•  តើអ្នកបង្កើតគោលនយោបាយនឹងចូលរួមចំណែកក្នុងកាគាំទ្រការបង្កើតថ្មីដោយរបៀបណា?

•  តើក្រុមហ៊ុននីមួយៗនឹងបំពេញតម្រូវការ នៃការចង់បានបុគ្គលិកដែលមានជំនាញ STEM បានយ៉ាងដូចម្ដេច?

បុគ្គលិកដែលស្ទាត់ជំនាញក្នុងវិស័យ STEM គឺកំពុងខ្វះខាតស្ទើរតែគ្រប់ទីកន្លែង។ នៅអឺរ៉ុបស្ទើរតែពាក់កណ្ដាលនៃអាជីវកម្មកំពុងជួបការលំបាកក្នុងការជ្រើសរើសមនុស្ស មានជំនាញ STEM ដែលពួកគេត្រូវការ។ ខណៈនៅសហរដ្ឋអាមេរិក ៤៥ភាគរយ នៃបុគ្គលិក STEM ដែលមាន PhD គឺជាជនជាតិបរទេស។

សូម្បីតែក្នុងទ្វីបអាស៊ី ជាកន្លែងដែលរដ្ឋាភិបាលជាច្រើន បានវិនិយោគយ៉ាងសម្បើមក្នុងវិស័យអប់រំ ដូចជាប្រទេសជប៉ុន ក៏បានរកឃើញថា ចំនួននៃការបញ្ចប់ការសិក្សាលើជំនាញ STEM មិនមានភាពទៀងទាត់ដែរ ក្នុងរយៈពេលប៉ុន្មានឆ្នាំថ្មីៗនេះ ហើយផលវិបាកនៃការកង្វះខាតនេះ អាចនឹងកាន់តែធ្ងន់ធ្ងរ។

ស្វ័យប្រវត្តិកម្ម និងបញ្ញាសិប្បនិម្មិត (AI) នឹងជួយគាំទ្រ ដល់បុគ្គលិកកាន់តែខ្លាំងឡើង ដោយជួយបំពេញការងារ ដែលធ្វើដោយដៃ និងចំណាយពេលវេលាច្រើន។ ប៉ុន្តែនេះក៏ជាចំណុចមួយ ដែលកំពុងបង្ហាញថា ជំនាញដែលមានតម្រូវការ កំពុងផ្លាស់ប្ដូរផងដែរ។ បុគ្គលិក ដែលមិនមានជំនាញ STEM សម្រាប់សម័យទំនើប កំពុងតែប្រឈមនឺងការប្រកួតប្រជែងក្នុងទីផ្សារការងារកាន់តែខ្លាំង។

វេទិកាសេដ្ឋកិច្ចពិភពលោក (WE Forum) បានឱ្យដឹងថា អក្ខរកម្មអំពីវិទ្យាសាស្ត្រ បច្ចេកវិទ្យាព័ត៌មាន និងទំនាក់ទំនង (ICT) គឺជាជំនាញមូលដ្ឋាន ដែលបុគ្គលិកក្នុងសតវត្សរ៍ទី ២១ ត្រូវការ។ ទន្ទឹមនឹងនេះ និយោជកកំពុងមានភាពលំបាក ក្នុងការបំពេញតួនាទីថ្មី ដែលទាមទារជំនាញក្នុងវិស័យដូចជា ការវិភាគទិន្នន័យ ម៉ាស៊ីនចេះរៀន (Machine Learning) និងវិស្វកម្មកម្មវិធីកុំព្យូទ័រ (Software engineering)។

ប្រជាសាស្ត្របុគ្គលិក STEM

បុគ្គលិក ដែលត្រូវបានជ្រើសរើសភាគច្រើន គឺជាបុគ្គលិកវ័យក្មេង ប៉ុន្តែក៏មិនអាចធ្វេសប្រហែសនឹងប្រជាសាស្ត្រផ្សេងទៀតដែរ។ ការសិក្សាស្រាវជ្រាវរបស់ SThree បង្ហាញថា អ្នកជំនាញ STEM ដែលមានអាយុលើសពី ៥០ឆ្នាំ ទំនងជាមិនសប្បាយចិត្តជាមួយនឹងជីវិតការងាររបស់គេនោះទេ នោះដោយសារតែកត្តាមួយចំនួន រួមមាន ការភ្ជាប់ទំនាក់ទំនង និងការលើកទឹកចិត្ត ដែលពួកគេទទួលបាន។ ពួកគេក៏ទំនងជាមិនពេញចិត្តនឹងប្រាក់ខែ ការប្រាក់រង្វាន់ផ្សេងៗ និងការទទួលស្គាល់ផងដែរ។

វប្បធម៌សិក្សាពេញមួយជីវិត និងការអភិវឌ្ឍវិជ្ជាជីវៈត្រូវបានផ្ដល់តម្លៃយ៉ាងខ្ពស់ ពីសំណាក់បុគ្គលិក STEM ទាំងអស់ បន្ទាប់ពីវិស័យនេះមានការវិវឌ្ឍយ៉ាងឆាប់រហ័ស។ បុគ្គលិកម្នាក់ក្នុងចំណោម ៦នាក់ ត្រូវទំនេរពីការងារក្នុងផ្នែកកុំព្យូទ័រ និងគណិតវិទ្យាក្នុងឆ្នាំ ២០០៧ បន្ទាប់ពីជំនាញមួយចំនួន ត្រូវបានក្រុមហ៊ុនលែងប្រើក្នុងឆ្នាំ២០១៩។

នេះជាមូលហេតុ ដែលស្ទើរតែពាក់កណ្ដាលនៃអ្នកជំនាញ STEM ចង់ធ្វើការក្នុងតួនាទីមួយ ដែលពួកគេរៀនជំនាញចុងក្រោយបំផុត បើទោះបីជាជំនាញនោះទទួលបានប្រាក់ចំណូលតិចក៏ដោយ។

ការជ្រើសរើស និងរក្សាទុកបុគ្គលិក

ក្រោយពីជ្រើសរើសបុគ្គលិកបាន និយោជកក៏ត្រូវខិតខំប្រឹងប្រែង ដើម្បីរក្សាទុកបុគ្គលិកឆ្នើមលើវិស័យ STEM ដែលពួកគេទាក់ទាញផងដែរ។

ចាប់ផ្ដើមពីការយល់ដឹងលម្អិតបន្ថែមទៀតអំពី អ្វីដែលធ្វើឱ្យកន្លែងធ្វើការមានភាពទាក់ទាញសម្រាប់បុគ្គលិក ៖

•  តើអត្ថប្រយោជន៍អ្វីខ្លះ ដែលបុគ្គលិកទទួលបានជាផ្នែកនៃកញ្ចប់ទឹកប្រាក់បំណាច់រួម?

•  តើកន្លែងការងារផ្ដល់ឱកាសការងារឱ្យបុគ្គលិក ធ្វើការងារ ដែលមានលក្ខណៈបត់បែនឬយ៉ាងណា?

•  តើអ្នកអាចបង្កើតវប្បធម៌ការងារដែលចូលរួម និងលើកទឹកចិត្តបុគ្គលិក ដោយរបៀបណា?

ផ្តោតលើយុទ្ធសាស្តអង្គភាពដែលមានលក្ខណៈស៊ីជម្រៅ ហើយអ្នកនឹងទទួលបានអត្ថប្រយោជន៍ប្រកបដោយគុណធម៌ ជាមួយនឹងការជ្រើសរើសបុគ្គលិក ក៏ប្រសើរឡើងផងដែរ។

អ្វីដែលនិយោជកអាចធ្វើបានបន្ទាប់មកទៀត

ចំណុចសំខាន់ដែលនិយោជកត្រូវធ្វើគឺ ឈប់និយាយអំពីគម្លាតទេពកោសល្យក្នុងវិស័យ STEM ហើយចាប់ផ្ដើមធ្វើការឆ្ពោះទៅរកការបិទគម្លាតនេះ តាមរយៈសកម្មភាពមួយចំនួនដូចជា៖

•  កំណត់ឱ្យបានច្បាស់នូវតួនាទីដែលបច្ចេកវិទ្យាថ្មីអាចជួយគាំទ្របាន និងតួនាទីថ្មី ដែលត្រូវជ្រើសរើសបុគ្គលិក

•  ស្វែងយល់អំពីរបៀបប្រើប្រាស់ និងបង្ហាញលក្ខណៈពិសេសរបស់ខ្លួនក្នុងនាមជានិយោជក

•  បង្កើតបរិយាកាសការងារ ដែលមានលក្ខណៈបត់បែនសម្រាប់បុគ្គលិក

•  បន្តប្រើប្រាស់បុគ្គលិកវ័យចំណាស់ តាមរយៈការពង្រឹងជំនាញសម្រាប់ពួកគេ (Upskilling)

•  បង្កើតឱ្យមានភាពចម្រុះនៅពេលពេលជ្រើសរើស និងរក្សាទុកបុគ្គលិក៕