ប្រទេសវៀតណាមបានប្រកាសពីការសាងសង់សកលវិទ្យាល័យលំដាប់ពិភពលោក ចន្លោះពី ៣ ទៅ ៥កន្លែង នៅត្រឹមឆ្នាំ២០២៧ ជាអ្វីដែលខ្លួនហៅថា ការចាប់ផ្តើមកំណែទម្រង់អប់រំ ប្រកបដោយមហិច្ឆិតា។

យោងតាមការចុះផ្សាយ របស់ទីភ្នាក់ងារព័ត៌មាន VNexpress បានឱ្យ​ដឹងថា ការដំឡើងថ្នាក់ឧត្តមសិក្សា ដល់កម្រិតនេះ សំដៅលើការបណ្តុះទេពកោសល្យជាតិ និងលើកកម្ពស់ការប្រកួតប្រជែងជាសកល ផ្អែកលើកម្មវិធីសកម្មភាពរបស់រដ្ឋាភិបាល ដែលត្រូវបានប្រកាស កាលពីថ្ងៃទី១៥ ខែកញ្ញា។

តាមផែនការ ក្រសួងអប់រំ និងបណ្តុះបណ្តាល នឹងរៀបចំរចនាសម្ព័ន្ធប្រព័ន្ធឧត្តមសិក្សាទាំងមូលឡើងវិញ ដោយផ្ទេរសកលវិទ្យាល័យមួយចំនួនទៅឱ្យ​ស្ថិតក្រោមការគ្រប់គ្រងរបស់រដ្ឋាភិបាលក្នុងតំបន់ និងរៀបចំឡើងវិញ ពីរបៀបដែលស្ថាប័នត្រូវបានផ្តល់មូលនិធិ និងដំណើរការ។ សកលវិទ្យាល័យទាំងនេះនឹងត្រូវបានធ្វើឱ្យ​ក្លាយជាមជ្ឈមណ្ឌលស្រាវជ្រាវដ៏រឹងមាំ ជាមួយនឹងទំនាក់ទំនង កាន់តែតឹងរ៉ឹង រវាងការបង្រៀន, ការស្រាវជ្រាវ និងឧស្សាហកម្ម។

ស្តង់ដារវាយតម្លៃ នឹងរួមបញ្ចូលតាមបែបវិទ្យាសាស្ត្រ, គុណវុឌ្ឍិ និងគុណភាព របស់មហាវិទ្យាល័យ ព្រមទាំង អ្នកស្រាវជ្រាវ, សមត្ថភាពផ្តល់មូលនិធិស្រាវជ្រាវ, ប្រព័ន្ធអេកូឡូស៊ីនវានុវត្តន៍, ហេដ្ឋារចនាសម្ព័ន្ធ, ឧបករណ៍មន្ទីរពិសោធន៍, កិច្ចសហប្រតិបត្តិការអន្តរជាតិ និងផលប៉ះពាល់សង្គម។

សម្រាប់គោលដៅ រយៈពេលវែងនៅឆ្នាំ២០៣០ វៀតណាមគ្រោងនឹងមានសកលវិទ្យាល័យសាធារណៈល្បីឈ្មោះ ចន្លោះពី ១៥ ទៅ ២០ កន្លែង ដែលត្រូវបានគេស្គាល់លើភាពខ្លាំង នៃការស្រាវជ្រាវ និងកម្មវិធីរបស់ពួកគេ ជាពិសេស នៅក្នុងបច្ចេកវិទ្យាអាទិភាព និងវិទ្យាសាស្ត្រ។ ក្នុងចំណោមនេះ យ៉ាងហោចណាស់ ២សកលវិទ្យាល័យ នឹងទទួលបានមូលនិធិពិសេស, យន្តការច្បាប់ និងស្វ័យភាពដើម្បីបានឡើងឋានៈជាសកលវិទ្យាល័យ លំដាប់ពិភពលោក។

យោងតាម លោក Tran Nam Tu អនុប្រធាននាយកដ្ឋានវិទ្យាសាស្ត្រ បច្ចេកវិទ្យា និងព័ត៌មាន បានឱ្យ​ដឹងថា គំនិតនៃការបង្កើតសាកលវិទ្យាល័យលំដាប់ពិភពលោក ផ្តោតសំខាន់លើការស្រាវជ្រាវ ដ៏រឹងមាំ។

សម្រាប់ឆ្នាំ២០២៥ ដល់២០២៦ វៀតណាមក៏មានគោលបំណងបង្កើតមជ្ឈមណ្ឌលបណ្តុះបណ្តាលកម្រិតខ្ពស់ ដែល​ផ្តោត​លើបញ្ញាសិប្បនិម្មិត ក៏ដូចជា មជ្ឈមណ្ឌលឧត្តមភាពសម្រាប់ការស្រាវជ្រាវ ការច្នៃប្រឌិត និងសហគ្រិនភាព នៅសាកលវិទ្យាល័យសំខាន់ៗ៕

ប្រែសម្រួល ៖ សារ៉ាត