ក្នុងចំណោមសាកលវិទ្យាល័យកំពូលចំនួន ១០ ដែលផលិតនិស្សិតបញ្ចប់ការសិក្សាឱ្យមានការងារធ្វើច្រើនបំផុតក្នុងពិភពលោក មានសាកលវិទ្យាល័យមកពីអាមេរិកចំនួន ៥ ទៅហើយ, នេះបើយោងតាមចំណាត់ថ្នាក់ការងារសាកលវិទ្យាល័យសកលឆ្នាំ ២០២៥។

ចំណាត់ថ្នាក់ ដែលចេញផ្សាយដោយ Time Higher Education (THE) បានបង្ហាញឱ្យឃើញពីសាកលវិទ្យាល័យ ដែលក្រុមហ៊ុនធំៗជឿជាក់ថា ល្អបំផុត សម្រាប់ការជ្រើសរើសនិស្សិតដែលបញ្ចប់ការសិក្សានៅទីនោះ ឱ្យបំពេញការងារ នៅក្រុមហ៊ុនពួកគេ។

សាលាមកពីសហរដ្ឋអាមេរិកចំនួន ៤ រួមមាន វិទ្យាស្ថានបច្ចេកវិទ្យាម៉ាសាជូសេត (MIT), វិទ្យាស្ថានបច្ចេកវិទ្យាកាលីហ្វ័រញ៉ា (Caltech), សាកលវិទ្យាល័យស្ទែនហ្វដ និងសាកលវិទ្យាល័យហាវ៉ាដ គឺឈរនៅលំដាប់កំពូលទាំង ៤បន្តបន្ទាប់គ្នា។ គ្រឹះស្ថានអប់រំទាំងបួននេះ តាមពីក្រោយដោយ សាកលវិទ្យាល័យខេមព្រីច របស់អង់គ្លេស និងសាកលវិទ្យាល័យ ព្រីនស្តុន ដែលជាស្ថាប័នអប់រំ ដ៏មានកិត្យានុភាពមួយទៀតរបស់អាមេរិក។

ស្ថាប័ន The THE បានប្រើទិន្នន័យពីក្រុមហ៊ុនប្រឹក្សាធនធានមនុស្សរបស់បារាំង Emerging ដើម្បីចាត់ចំណាត់ថ្នាក់សាកលវិទ្យាល័យចំនួន ២៥០ មកពី ៤២ប្រទេស ដោយមាននិយោជកបោះឆ្នោតឱ្យស្ថាប័នអប់រំ ទាំងក្នុងប្រទេស និងអន្តរជាតិ។

នេះគឺជាលើកទី ១៤ នៃការបង្កើតឱ្យមានការចាត់ចំណាត់ថ្នាក់នេះឡើង ដោយមានការបោះឆ្នោតពីអ្នកគ្រប់គ្រងផ្នែកប្រតិបត្តិការ មកពីប្រទេសចំនួន ៣៣ ដែលធ្វើឱ្យការចាត់ថ្នាក់នេះ ក្លាយជាកម្មវិធីចាត់ចំណាត់ថ្នាក់ដ៏ធំបំផុតមួយនាពេលបច្ចុប្បន្ន។

ចំណុចសំខាន់ នៃការវាយតម្លៃចំណាត់ថ្នាក់នៅឆ្នាំនេះ គឺសារៈសំខាន់នៃបទពិសោធន៍ការងារ។ និយោជក ឱ្យតម្លៃកាន់តែខ្លាំងឡើងដល់និស្សិតបញ្ចប់ការសិក្សា ដែលធ្លាប់ឆ្លងកាត់ការអនុវត្តការងារជាក់ស្ដែង ក្រៅពីជំនាញដែលរៀនពីសាលា និងជំនាញជីឌីថល។ ការស្រាវជ្រាវបង្ហាញថា ប្រហែល ៤៦ភាគរយ នៃនិយោជក សង្កត់ធ្ងន់លើសមត្ថភាពក្នុងការរៀន និងសម្របខ្លួនទៅនឹងបច្ចេកវិទ្យា និងនិន្នាការថ្មីៗ ខណៈដែល ៤៥ភាគរយ ឱ្យតម្លៃខ្ពស់លើជំនាញសហការដូចជា ជំនាញទំនាក់ទំនង និងធ្វើការងារក្រុម។

លោកស្រី Seeta Bhardwa ការីនិពន្ធនៃ The Student បានលើកឡើងថា បច្ចុប្បន្ននិយោជកកំពុងស្វែងរកអ្នកជំនាញជាច្រើន ជាពិសេសគឺនិស្សិតដែលទើបតែបញ្ចប់ការសិក្សាថ្មីៗ និងមានជំនាញឌីជីថល បទពិសោធន៍ការងារ និងយល់ដឹងពីសង្គម។ លើសពីនេះ រឿងដែលគួរឱ្យចាប់អារម្មណ៍នោះគឺ សាកលវិទ្យាល័យនៅទូទាំងពិភពលោក កំពុងពង្រឹងកម្មវិធីសិក្សា និងផ្ដួចផ្ដើមគំនិតថ្មីៗ ដើម្បីបំពេញតម្រូវការទាំងនេះ ខណៈពេលដែលសាកលវិទ្យាល័យរបស់អាមេរិក និងអង់គ្លេស កំពុងឈានមុខគេក្នុងសកម្មភាពនេះ។ ទន្ទឹមនឹងនេះ សាកលវិទ្យាល័យនៅតំបន់អាស៊ី និងអឺរ៉ុបដីគោក ក៏កំពុងរីកចម្រើនគួរឱ្យកត់សម្គាល់ដែរ។

ស្របគ្នានឹងសាកលវិទ្យាល័យមកពីអាមេរិក និងអង់គ្លេស, សាកលវិទ្យាល័យមកពីបារាំង អាល្លឺម៉ង់ និងចិន ក៏កំពុងទទួលបានចំណាត់ថ្នាក់ល្អ ក្នុងតារាងចំណាត់ថ្នាក់ដែរ។

សាកលវិទ្យាល័យកំពូលរបស់ចិនទាំងពីគឺ សាកលវិទ្យាល័យប៉េកាំងជាប់ចំណាត់ថ្នាក់លេខ ១១ និងសាកលវិទ្យាល័យ Tsinghue ជាប់ចំណាត់ថ្នាក់លេខ១៩។ នៅក្នុងតារាងចំណាត់ថ្នាក់ សាកលវិទ្យាល័យមកពីអាស៊ី មានភាពលេចធ្លោគួរឱ្យកត់សម្គាល់ ក្នុងចំណោមសាកលវិទ្យាល័យ​ដែលបានចូលរួមវាយតម្លៃចំនួន ២៥០ មានសាកលវិទ្យាល័យមកពីអាស៊ី ចំនួន ៥២។

ក្នុងចំណោមសាកលវិទ្យាល័យទាំង៥២ ប្រទេសឥណ្ឌា មានសាកលវិទ្យាល័យចំនួន ១០ និងមាន ២ស្ថិតក្នុងចំណោមចំណាត់ថ្នាក់ កំពូលទាំង ៥០ ក្នុងនោះ វិទ្យាស្ថានបច្ចេកវិទ្យាឥណ្ឌាដេលី (ចំណាត់ថ្នាក់ ២៨) និងវិទ្យាស្ថានវិទ្យាសាស្ត្រឥណ្ឌា (ចំណាត់ថ្នាក់ ៤៧) ត្រូវបានគេចាត់ទុកថា ជាគ្រឹះស្ថានអប់រំឯកទេសបច្ចេកវិទ្យាដ៏ជោគជ័យបំផុតមួយរបស់ឥណ្ឌា៕