សាលារៀនជាង ៤ពាន់កន្លែង នៅទូទាំងប្រទេសកូរ៉េខាងត្បូងបានបិទទ្វា ដោយសារចំនួនសិស្សថយចុះខ្លាំង ដែលបង្ខំឱ្យបរិវេណសាលារាប់រយកន្លែង ត្រូវបានបោះបង់ចោល ព្រោះអត្រាកំណើតធ្លាក់ចុះ។

យោងតាមទិន្នន័យពីក្រសួងអប់រំកូរ៉េ សាលាបឋមសិក្សា មធ្យមសិក្សា និងវិទ្យាល័យ សរុបចំនួន ៤,០០៨ កន្លែងទូទាំងប្រទេសបានបិទទ្វារ ដោយសារតែចំនួនសិស្សចុះឈ្មោះចូលរៀនធ្លាក់ចុះ, នេះបើយោងតាមការចុះផ្សាយរបស់ Korea Herald។

ក្នុងចំណោមសាលាទាំងអស់ សាលាបឋមសិក្សា មានចំនួនច្រើនជាងគេ ដោយមានចំនួន រហូតដល់ ៣,៦៧៤ បន្ទាប់មកគឺ សាលាមធ្យមសិក្សាចំនួន ២៦៧ និងវិទ្យាល័យចំនួន ៧០។ ក្នុងរយៈពេល ៥ឆ្នាំកន្លងមកនេះ សាលាចំនួន ១៥៨ ត្រូវបានបិទទ្វារ ហើយ ១០៧ កន្លែងទៀត ត្រូវបានគេរំពឹងថា នឹងបិទទ្វារក្នុងរយៈពេល ៥ឆ្នាំខាងមុខ ដោយសារចំនួនសិស្សបន្តធ្លាក់ចុះ, នេះបើយោងតាមការចុះផ្សាយរបស់ Korea Times។

ការបិទទ្វាភាគច្រើន នៅសាលាតាមបណ្ដាខេត្ត, ខេត្ត North Jeolla ត្រូវបានគេព្យាករថា នឹងមានចំនួនសាលាបិទទ្វារខ្ពស់បំផុត នាពេលអនាគត ដោយមានសាលាចំនួន ១៦ បន្ទាប់មកគឺខេត្ត South Jeolla មានចំនួន ១៥, ខេត្ត Gyeonggi មានចំនួន ១២ និងខេត្ត South Chungcheong មាន ១១។ តួលេខទាំងនេះ បង្ហាញពីការធ្លាក់ចុះយ៉ាងខ្លាំង នៃចំនួនប្រជាជននៅតំបន់ជនបទ និងមិនមែនទីក្រុង។

អត្រាកំណើតរបស់ប្រទេសកូរ៉េខាងត្បូងស្ថិតក្នុងចំណោមអត្រាទាបបំផុតនៅលើពិភពលោក។ យោងតាមស្ថិតិកូរ៉េ (KOSTAT) ដែលជាទីភ្នាក់ងារស្ថិតិផ្លូវការរបស់ប្រទេស អត្រាមានកូនសរុប (TFR) របស់ជនជាតិកូរ៉េខាងត្បូងសម្រាប់ឆ្នាំ២០២៤ គឺ ០,៧៤៨ ទាបជាង ២,១ ដែលត្រូវសម្រាប់ជំនួសចំនួនប្រជាជននាពេលបច្ចុប្បន្ន។

ទីតាំងសាលារៀនចាស់ៗជាច្រើនមិនទាន់រកឃើញគោលបំណងថ្មីនៅឡើយទេ។ ក្នុងចំណោម សាលារៀនចំនួន ៤,០០៨ ដែលបានបិទទ្វារ មាន ៣៧៦ ដែលមិនទាន់បានប្រើប្រាស់។ ក្នុងចំណោមនោះ ២៦៦ ត្រូវបានទុកចោលអស់រយៈពេលជាងមួយទសវត្សរ៍មកហើយ ខណៈដែល ៨២ ទៀត ត្រូវបានទុកចោលអស់រយៈពេលជាង ៣០ឆ្នាំ។

លោក Jin បានលើកឡើងថា សាលារៀនជាច្រើនទៀតត្រូវបានគេរំពឹងថា នឹងបិទទ្វារដោយសារតែចំនួនសិស្សធ្លាក់ចុះ ដោយអំពាវនាវឱ្យមានផែនការរយៈពេលវែង ដើម្បីប្រើប្រាស់ឡើងវិញនូវកន្លែងសិក្សាដែលមិនបានប្រើប្រាស់ ដោយប្រែទៅជាទ្រព្យសម្បត្តិសម្រាប់សហគមន៍ក្នុងតំបន់។

សាលារៀនដែលកំពុងដំណើរ ក៏ធ្លាក់ចុះនូវចំនួនសិស្សចុះឈ្មោះចូលរៀនផងដែរ។ ក្រសួងបានប្រកាសកាលពីខែកុម្ភៈថា មុខតំណែងជាគ្រូបង្រៀន សម្រាប់ឆ្នាំសិក្សា២០២៥ នឹងកាត់បន្ថយចំនួន ២,២៣២កន្លែង នៅទូទាំងប្រទេស។ ក្នុងនោះ គ្រូបង្រៀនកម្រិតបឋមសិក្សា នឹងកាត់បន្ថយ ១,២៣២ និងគ្រូបង្រៀនកម្រិតមធ្យមសិក្សា នឹងកាត់បន្ថយ ១,៧០០ នាក់។

ជាការឆ្លើយតប ការិយាល័យអប់រំខេត្ត និងក្រុង បានដាក់ចេញនូវវិធានការបណ្ដោះអាសន្ន រួមទាំងការកាត់បន្ថយទំហំថ្នាក់របស់សាលាមួយចំនួន មកត្រឹមមួយថ្នាក់ មានសិស្ស ១០ ទៅ១៥នាក់៕