ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បរទេស ៖ យោងទៅតាមប្រភពពី Greenetwork បានបង្ហាញថា កោះ Semakau មិនដូចកន្លែងចាក់សំរាមកខ្វក់ធម្មតាទេ ប៉ុន្តែវាលេចចេញជាដីពណ៌បៃតងខៀវស្រងាត់ ដែលប្រភេទសត្វស្លាប និងសត្វល្អិតផ្សេងៗប្រមូលផ្តុំគ្នានៅជាប្រព័ន្ធអេកូឡូស៊ីដែលមានសុខភាពល្អ។
កោះចាក់សំរាម Semakau មានទីតាំងនៅប្រទេសសិង្ហបុរី ដែលជាកន្លែងទាក់ទាញទេសចរណ៍ធម្មជាតិមួយពោរពេញទៅដោយដើមឈើ សត្វស្លាបជាច្រើនប្រភេទ និងជីវចម្រុះដ៏សម្បូរបែប។ វាត្រូវហ៊ុំព័ទ្ធដោយថ្មប៉ប្រះទឹកផ្កាថ្មដ៏ស្រស់ស្អាត ដែលអាចមើលឃើញតាមរយៈទឹកសមុទ្រថ្លា។ កោះចាក់សំរាម Semakau ស្ថិតនៅចម្ងាយប្រហែល ៨ គីឡូម៉ែត្រនៅភាគខាងត្បូងនៃប្រទេសសិង្ហបុរី និង មានផ្ទៃដី ៣៥០ ហិកតា ព្រមទាំងត្រូវបានសាងសង់នៅឆ្នេរសមុទ្រដែលតភ្ជាប់កោះ Semekau និងកោះ Sengkang។ កន្លែងនេះត្រូវបានបង្កើតឡើងដើម្បីធានាថា សំរាមមិនហូរចូលទៅក្នុងសមុទ្រក្នុងកម្រិតខ្ពស់ និងបង្កើតទៅជាបរិស្ថានប្រកបដោយនិរន្តរភាព។
កោះ Semakau គឺជាកន្លែងចាក់សំរាមតែមួយគត់នៅក្នុងប្រទេសសិង្ហបុរី ដែលបានរួមចំណែកធ្វើឱ្យប្រទេសកោះមួយនេះល្បីល្បាញជុំវិញពិភពលោកថា ជាទីក្រុងស្អាតផងដែរ។ កន្លែងចាក់សំរាមនេះត្រូវបានរចនា សាងសង់ និងគ្រប់គ្រងដោយទីភ្នាក់ងារបរិស្ថានជាតិសិង្ហបុរី (NEA)។ កាកសំណល់ដែលប្រមូលបានត្រូវឆ្លងកាត់ដំណាក់កាលជាបន្តបន្ទាប់ មុននឹងបញ្ជូនទៅកន្លែងចាក់សំរាម។ កាកសំណល់ត្រូវបានដុតជាលើកដំបូងនៅក្នុងរោងចក្រដុតបំផ្លាញដោយកាត់បន្ថយបរិមាណរបស់វាប្រមាណ ៩០%។ ដំណើរការចំហេះនេះក៏ត្រូវបានប្រើដើម្បីជំរុញទួរប៊ីន និងដើម្បីផលិតថាមពលអគ្គិសនីផងដែរ។
គោលការណ៍សំខាន់នៃដំណើរការទាំងមូល គឺការប្រែក្លាយកាកសំណល់ទៅជាថាមពល ហើយផេះពីដំណើរការចំហេះត្រូវបានដឹកជញ្ជូនទៅចាក់នៅ Semakau Landfill ដោយកប៉ាល់ដឹកទំនិញ។ ដោយសារផេះទាំងនោះលាយជាមួយដី វាបានបង្កើតជាស្មៅ និងរុក្ខជាតិដុះ ហើយវាបានប្រែកន្លែងចាក់សំរាមមួយនេះ ទៅជាវាលស្មៅបៃតង ។ ដីបៃតងធម្មជាតិបានទាក់ទាញប្រភេទសត្វកម្រ និងសត្វល្អិតជាច្រើនប្រភេទ។ សព្វថ្ងៃនេះ Semakau Landfill បានក្លាយជាទីតាំងដ៏ល្អបំផុតមួយនៅក្នុងប្រទេសសិង្ហបុរីសម្រាប់ការមើលបក្សី។
ទីលានចាក់សំរាម Semakau ត្រូវបានសាងសង់ឡើងក្នុងឆ្នាំ ១៩៩៩ អាចផ្ទុកកាកសំណល់បានរហូតដល់ ៦៣ លានម៉ែត្រគូប ហើយត្រូវបានគេរំពឹងថានឹងពេញនៅឆ្នាំ ២០៣៥ ។ តែយ៉ាងណា ទីភ្នាក់ងារបរិស្ថានជាតិសិង្ហបុរី NEA រំពឹងថា នឹងពង្រីកកន្លែងចាក់សំរាមនៅ Semakau ដោយជៀសវាងការចំណាយដ៏ច្រើនក្នុងការការសាងសង់កន្លែងចាក់សំរាមនៅឆ្នេរសមុទ្រមួយផ្សេងទៀតនាពេលអនាគត ។
កន្លែងចាក់សំរាម Semakau ក៏មានការបើកឱ្យភ្ញៀវទេសចរចូលទស្សនាផងដែរ និងបើកសម្រាប់ការស្រាវជ្រាវដើម្បីសិក្សាអំពីការគ្រប់គ្រងកាកសំណល់នៅ Semakau Landfill ។ គួរបញ្ជាក់ផងដែរថា ប្រព័ន្ធគ្រប់គ្រងកាកសំណល់របស់ប្រទេសសឹង្ហបុរីផ្តោតទៅលើ 3Rs គឺ ប្រើប្រាស់តាមតម្រូវការ (កាត់បន្ថយ), ប្រើប្រាស់សម្រាប់គោលបំណងដូចគ្នា ឬថ្មី (ការប្រើប្រាស់ឡើងវិញ) និងបំប្លែងកាកសំណល់ទៅជាផលិតផលមានប្រយោជន៍ (កែច្នៃឡើងវិញ) ឆ្ពោះទៅរកចក្ខុវិស័យនៃ Zero Waste Nation៕
