ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថ្លែងក្នុងឱកាសអញ្ជើញជាអធិបតីក្នុងពិធីប្រគល់សញ្ញាបត្រដល់និស្សិតសាកលវិទ្យាល័យមួយនៅក្នុងខេត្តបន្ទាយមានជ័យកាលពីពេលថ្មីៗនេះ ឯកឧត្តមបណ្ឌិត ហ៊ុន ម៉ាណែត បានលើកឡើងថា ការរៀនសូត្រគឺមិនចេះចប់នោះឡើយ ទាំងនៅក្នុងសាលា និងនៅក្នុងសង្គម ។ ឯកឧត្តមបញ្ជាក់ថា ការរៀនសូត្រនេះទៀតសោត គឺមិនត្រូវប្រកាន់ខ្លួននោះឡើយ ពោលគឺត្រូវរៀនពីគ្រប់មជ្ឈដ្ឋាន និងពីមនុស្សនៅជុំវិញខ្លួន។
ជាមួយគ្នានេះ ឯកឧត្តម ហ៊ុន ម៉ាណែត ក៏បានចែករំលែកនូវទស្សនទានមួយចំនួនដល់និស្សិតដែលទើបបញ្ចប់ការសិក្សា ដើម្បីយកទៅប្រតិបត្តិក្នុងជីវិត រួមមាន បន្តខិតខំរៀនសូត្រ ដោយដាក់ខ្លួនឱ្យសាមញ្ញ និងបើកចំហរទទួលគំនិតពីគ្រប់មជ្ឈដ្ឋាន (រួមទាំងពីថ្នាក់ក្រោម) និង ត្រូវរក្សាផ្នត់គំនិតនៃការលើកទឹកចិត្តខ្លួនឯង អភិវឌ្ឍខ្លួនឯង និងតស៊ូមិនបោះបង់ ទោះមានបញ្ហាប្រឈមលំបាកយ៉ាងណាក្ដី។
ឯកឧត្តមបណ្ឌិត ហ៊ុន ម៉ាណែត
“បង្ហាញខ្លួនយើងជាគ្រាប់ពេជ្រគ្រប់ពេលវេលា ត្រូវមានការលើកទឹកចិត្តខ្លួនឯងកុំចាំគេលើកទឹកចិត្តច្រើនពេក… ការលើកទឹកចិត្តពីគេមាន តែកុំរំពឹងខ្លាំងពេក បើយើងមិនលើកទឹកចិត្តឱ្យតម្លៃខ្លួនឯង គ្មានពីណាឱ្យយើងទេ… ខិតខំអភិវឌ្ឍខ្លួនឯង”
ឯកឧត្តមបណ្ឌិត ហ៊ុន ម៉ាណែត ក៏បានប្រាប់ដល់និស្សិតទាំងអស់ត្រូវមានការប្តេជ្ញាចិត្ត ដោយថា ការងារអ្វីក៏ដោយគឺត្រូវធ្វើឱ្យសម្រេច ។ ឯកឧត្តមបណ្ឌិតក៏បានលើក ពីមតិរបស់ម្ចាស់ក្រុមហ៊ុនជប៉ុនមួយមកធ្វើការបង្ហាញដែរថា ដោយម្ចាស់ក្រុមហ៊ុនជប៉ុននោះលើកឡើងថា ការមានសញ្ញាបត្រគឺល្អហើយ ប៉ុន្តែគេឱ្យអាទិភាពច្រើនទៅលើផ្នត់គំនិត និងការប្តេជ្ញាចិត្តរបស់បុគ្គល ដោយថា ប្រសិនបើបុគ្គលនោះមានការប្តេជ្ញាចិត្ត គឺគេអាចយកទៅបណ្តុះបណ្តាលបាន តែបើមានសញ្ញាបត្រ ហើយគ្មានការប្តេជ្ញាចិត្ត គឺមិនអាចបណ្តុះបណ្តាលបានទេ។
ឯកឧត្តមបណ្ឌិត ក៏បានផ្ដល់ដំបូន្មានដល់សិស្សនិស្សិត និងយុវជន ក្នុងការត្រៀមខ្លួនប្រកួតប្រជែងក្នុងទីផ្សារសេរី ដោយថា យុវជនត្រូវរស់រវើកខ្លួនឯង លើកទឹកចិត្តខ្លួនឯង ប្តេជ្ញាចិត្តខ្លួនឯង ។ «យើងមានពេលវេលាបាក់ទឹកចិត្ត មានពេលវេលាគិតថា យើងធ្វើហើយគេមិនឱ្យតម្លៃ គេមើលមិនឃើញ តែបើយើងទម្លាក់ខ្លួនឯង គឺយើងនឹងចប់ហើយ តែបើយើងបន្តទៀត យ៉ាងហោចណាស់ក៏យើងពង្រឹងសមត្ថភាពខ្លួនយើង បង្កើននូវជម្រើសរបស់យើងដែរ ហើយថ្ងៃណាមួយគេនឹងឃើញ»៕
