យោងតាម WE Forum បានបង្ហាញថា ភាពឯកាត្រូវបានកំណត់ថា ជាអារម្មណ៍នៃទុក្ខព្រួយ ដែលបណ្ដាលមកពីភាពខុសគ្នានៃទំនាក់ទំនងសង្គម ដែលអ្នកចង់បាន និងទិដ្ឋភាពជាក់ស្ដែងនៃជីវិតអ្នក។ វាអាចជះឥទ្ធិពលយ៉ាងខ្លាំង ទៅលើសុខភាពផ្លូវចិត្ត និងរាងកាយរបស់យើង ហើយថែមទាំងត្រូវបានផ្សារភ្ជាប់ទៅនឹងលក្ខខណ្ឌសុខភាពជាច្រើនទៀតផងដែរ ក្នុងនោះមានទាំងជំងឺធ្លាក់ទឹកចិត្ត ការញៀនស្រា ការថយចុះមុខងារយល់ដឹងនៃខួរក្បាល និងជំងឺបេះដូង។

ការស្រាវជ្រាវបានបង្ហាញថា ខណៈពេលដែលការបំពុលបរិយាកាស ជំងឺធាត់ និងការប្រើប្រាស់គ្រឿងស្រវឹងច្រើនហួសប្រមាណ បានបង្កើនហានិភ័យនៃការស្លាប់របស់មនុស្សក្នុងអត្រា ៦ភាគរយ, ២៣ភាគរយ និង៣៧ភាគរយរៀងៗគ្នា ភាពឯកាអាចបង្កើនហានិភ័យនៃការស្លាប់ដល់ទៅ ៤៥ភាគរយ។ ខណៈកត្តាសង្គម ហិរញ្ញវត្ថុ និងបច្ចេកវិទ្យា គឺជាកត្តាចម្បងសំខាន់ ភស្តុតាងនៃការស្រាវជ្រាវក៏បានបង្ហាញផងដែរថា បម្រែបម្រួលនៃនគរូបនីយកម្ម គឺជាកត្តាសំខាន់ចម្បងមួយទៀត។

ជាងពាក់កណ្ដាល នៃចំនួនប្រជាជនពិភពលោករស់នៅក្នុងទីក្រុង ហើយចំនួននេះកំពុងបន្តកើនឡើងជារៀងរាល់ឆ្នាំ។ នៅឆ្នាំ ២០៥០ គេរំពឹងថា ៦៦ភាគរយ នៃចំនួនប្រជាជនពិភពលោក នឹងរស់នៅតំបន់ទីក្រុង។ រហូតមកដល់ពេលនេះ យើងបានដឹងតិចតួចណាស់អំពីការរស់នៅក្នុងទីក្រុង មានឥទ្ធិពលមកលើបទពិសោធនៃភាពឯការបស់មនុស្ស។

វេទិកាសេដ្ឋកិច្ចពិភពលោក (WE Forum) បានបង្កើតកម្មវិធីទូរស័ព្ទ ដើម្បីស៊ើបអង្កេតទំនាក់ទំនងរវាងការរស់នៅក្នុងទីក្រុង និងភាពឯកាក្នុងពេលវេលាជាក់ស្ដែង។ កម្មវិធីនេះប្រើបច្ចេកទេសមួយហៅថា ការវាយតម្លៃមួយភ្លែតអេកូឡូស៊ី (ecological momentary assessment) ដោយអញ្ជើញអ្នកដែលរស់នៅទីក្រុងឱ្យចូលរួមឆ្លើយសំណួរអំពីបទពិសោធន៍នៃការរស់នៅបច្ចុប្បន្នរបស់ពួកគេ។ ការវាយតម្លៃសរុបចំនួន ១៦,៦០២ ត្រូវបានបញ្ចប់ដោយមនុស្ស ៧៥៦នាក់នៅទូទាំងពិភពលោក។

ជាលទ្ធផលរកឃើញថា ការស្ថិតក្នុងបរិយាកាសចង្អៀតអាចបង្កើនភាពឯកាដល់ទៅ ៣៨ភាគរយ។ ក្រៅពីនេះ កត្តា អាយុ ភេទ ជាតិសាសន៍ កម្រិតវប្បធម៌ និងមុខរបរ។ ផ្ទុយទៅវិញ ការចូលរួមក្នុងសង្គម ការមានឱកាសជជែក និងចែករំលែកអារម្មណ៍ ធ្វើឱ្យថយចុះអារម្មណ៍ឯកា ២១ភាគរយ។ នេះបង្ហាញថា ការរក្សាទំនាក់ទំនងដែលមានគុណភាពពិតជាមានសារៈសំខាន់សម្រាប់មនុស្ស។

រឿងដែលគួរឱ្យចាប់អារម្មណ៍មួយទៀត ការសិក្សាបង្ហាញថា មនុស្សមាន ២៨ភាគរយ ដូចជាមិនសូវមានអារម្មណ៍នៅក្នុងទីក្រុងដែលសម្បូរទៅដោយធម្មជាតិ ដូចជា ដើមឈើ រុក្ខជាតិ និងសត្វសា្លប នេះគឺជាលក្ខណៈពិសេស ដែលជាទីក្រុងជាច្រើនកំពុងបាត់បង់។

ប្រសិនបើភាពឯកាត្រូវបានកាត់បន្ថយ ដោយការភ្ជាប់ទំនាក់ទំនងជាមួយធម្មជាតិ ដោយពង្រឹងគុណភាព តំបន់ពណ៌បៃតង និងពណ៌ខៀវ ដូចជា ឧទ្យាន និងទន្លេ នៅក្នុងទីក្រុងឱ្យបានច្រើន នឹងអាចជួយមនុស្សឱ្យមានអារម្មណ៍ឯកាតិច។ ទន្ទឹមនឹងនេះ ការសិក្សាមុនៗ បានបង្ហាញថា ធម្មជាតិអាចផ្ដល់នូវអត្តប្រយោជន៍ជាច្រើន សម្រាប់សុខភាពផ្លូវចិត្ត៕