ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ចំណាត់ថ្នាក់សាកលវិទ្យាល័យកំពូលរបស់ពិភពលោកសម្រាប់ឆ្នាំ២០២៥ ដែលរៀបចំដោយ Times Higher Education បានប្រកាសជាផ្លូវការហើយ ដោយសាកលវិទ្យាល័យក្នុងសហរដ្ឋអាមេរិក និងចក្រភពអង់គ្លេស នៅតែមានឈ្មោះជាសាកលវិទ្យាល័យកំពូលរបស់ពិភពលោក។
សាកលវិទ្យាល័យ Oxford បានបំបែកឯតទគ្គកម្មថ្មីមួយទៀត ដោយបានជាប់ចំណាត់ថ្នាក់ជាសាកលវិទ្យាល័យកំពូល ក្នុងរយៈពេល ៩ឆ្នាំជាប់ៗគ្នា, នេះបើយោងតាម Times Higher Education ។
សម្រាប់ចំណាត់ថ្នាក់បន្ទាប់ បានទៅលើវិទ្យាស្ថានបច្ចេកវិទ្យាម៉ាសាជូសេត (MIT), សាកលវិទ្យាល័យហាវឺត, និងសាកលវិទ្យាល័យ ព្រីស្ដុន របស់សហរដ្ឋអាមេរិក។ សាកលវិទ្យាល័យ Cambridge នៅតែស្ថិតនៅលេខ ៥ដដែល ខណៈសាកលវិទ្យាល័យ Stanford បានធ្លាក់ពីចំណាតថ្នាក់លេខ ២ មកលេខ ៦នៅឆ្នាំ ២០២៥ នេះ។
ចំណាត់ថ្នាក់សាកលវិទ្យាល័យកំពូលទាំង ១០របស់ពិភពលោក បានទៅលើសាកលវិទ្យាល័យមកពីសហរដ្ឋអាមេរិក និងចក្រភពអង់គ្លេស។ ខណៈសាកលវិទ្យាល័យចំនួន ៧ ក្នុងចំណោម ១០នោះមកពីសហរដ្ឋអាមេរិក។
ចំពោះការកំណត់ចំណាត់ថ្នាក់ ស្ថាប័ន THE បានកំណត់លើសាកលវិទ្យាល័យចំនួន ២០០០ មកពី ១១៥ ប្រទេស និងតំបន់។ ចំណាត់ថ្នាក់ គឺផ្អែកលើសូចនាករអនុវត្តចំនួន ១៨ ដោយបែងចែកជា ៥ប្រភេទ រួមមាន ការបង្រៀន បរិយាកាសស្រាវជ្រាវ គុណភាពស្រាវជ្រាវ ទស្សនវិស័យអន្តរជាតិ និងឧស្សាហកម្ម។
ចំពោះចំណាត់ថ្នាក់ ក្នុងឆ្នាំ២០២៥នេះ ក៏បានបង្ហាញពីរបត់នៃការផ្លាស់ប្ដូរដ៏សំខាន់ដែរ ដោយសាកលវិទ្យាល័យអឺរ៉ុបជាច្រើនបានធ្លាក់ចំណាត់ថ្នាក់ ខណៈដែលសាកលវិទ្យាល័យនៅតំបន់អាស៊ី កំពុងបន្តអភិវឌ្ឍខ្លួនយ៉ាងឆាប់រហ័ស។
បើតាមពិន្ទុរួមនៅក្នុងចំណាត់ថ្នាក់ THE 2025 សាកលវិទ្យាល័យកំពូលទាំងបី នៅអឺរ៉ុប គឺសុទ្ធតែមកពីចក្រភពអង់គ្លេស ក្នុងនោះរួមមាន សាកលវិទ្យាល័យ Oxford, សាកលវិទ្យាល័យ Cambridge និង Imperial College London ។
សម្រាប់សាកលវិទ្យាល័យមកពីអាស៊ី ជាពិសេសមកពីប្រទេសចិនដីគោក ជប៉ុន និងកូរ៉េខាងត្បូង បាននិងកំពុងអភិវឌ្ឍចំណាត់ថ្នាក់ខ្លួន កាន់តែប្រសើរឡើងជាបន្តបន្ទាប់ ខណៈឆ្នាំ ២០២៤ និង២០២៥ សាកលវិទ្យាល័យមកពីអាស៊ី ជាប់ចំណាត់ថ្នាក់នៅក្នុងតារាងរបស់ THE ច្រើនបំផុត៕
