រដ្ឋាភិបាលដាណឺម៉ាកបានប្រកាសពីកិច្ចព្រមព្រៀងនយោបាយមួយ ដើម្បីហាមឃាត់កុមារអាយុក្រោម ១៥ឆ្នាំ ចូលប្រើប្រាស់ប្រព័ន្ធផ្សព្វផ្សាយសង្គម។

កិច្ចព្រមព្រៀងនេះបានធ្វើឡើងកាលពីសប្តាហ៍មុន ដឹកនាំដោយ ក្រសួងឌីជីថលូបនីយកម្ម ដោយ​នឹងកំណត់អាយុសម្រាប់ការចូលប្រើប្រាស់ប្រព័ន្ធផ្សព្វផ្សាយសង្គម ប៉ុន្តែផ្តល់សិទ្ធិដល់ឪពុកម្ដាយមួយចំនួនក្នុងការគ្រប់គ្រង បន្ទាប់ពីការវាយតម្លៃជាក់លាក់មួយ ដើម្បីផ្ដល់ការយល់ព្រមឱ្យកូនៗរបស់ពួកគេចូលប្រើប្រាស់ប្រព័ន្ធផ្សព្វផ្សាយសង្គម ចាប់ពីអាយុ១៣ឆ្នាំ។

វិធានការនេះ នឹងក្លាយជាជំហានដ៏សំខាន់មួយរបស់រដ្ឋាភិបាលក្នុងសហភាពអឺរ៉ុប ដើម្បីដោះស្រាយកង្វល់អំពីការប្រើប្រាស់ប្រព័ន្ធផ្សព្វផ្សាយសង្គមក្នុងចំណោមក្មេងជំទង់ និងកុមារតូចៗ ដែលបានធ្វើឱ្យមានការព្រួយបារម្ភនៅតំបន់ជាច្រើនក្នុងពិភពអនឡាញ។

វាកើតឡើងបន្ទាប់ពីមានចលនាមួយនៅក្នុងប្រទេសអូស្ត្រាលី ដែលសភាបានអនុម័តការហាមឃាត់ប្រព័ន្ធផ្សព្វ​ផ្សាយ​សង្គម សម្រាប់កុមារជាលើកដំបូងលើពិភពលោក ដោយកំណត់អាយុអប្បបរមាត្រឹម១៦ឆ្នាំ។ ការហាមឃាត់នោះ នឹងចូលជាធរមាននៅថ្ងៃទី១០ ខែធ្នូ ឆ្នាំ២០២៥។

ផែនការរបស់ប្រទេសអូស្រ្តាលីមានន័យថា វេទិកានានាដូចជា TikTok, Facebook, Snapchat, Reddit, Kick, X, Instagram និង YouTube នឹងត្រូវទទួលការពិន័យរហូតដល់ ៥០លានដុល្លារអូស្ត្រាលី (២៨,៣ លានអឺរ៉ូ) ចំពោះការបរាជ័យ ក្នុងការទប់ស្កាត់កុមារអាយុក្រោម ១៦ឆ្នាំ កាន់គណនីបណ្ដាញសង្គម។

សេចក្ដីថ្លែងការណ៍របស់ក្រសួងឌីជីថលូបនីយកម្មដាណឺម៉ាក បានប្រកាសថា អាយុអប្បបរមា ១៥ឆ្នាំ នឹងត្រូវបានណែនាំពីការប្រើប្រាស់បណ្ដាញសង្គមមួយចំនួន ទោះបីជាវាមិនបានបញ្ជាក់ច្បាស់ថា អាយុប៉ុន្មានក៏ដោយ។

ក្រសួងបានសង្កត់ធ្ងន់ថា «ក្នុងនាមជាប្រទេសមួយក្នុងចំណោមប្រទេសដំបូងគេ ក្នុងសហភពអឺរ៉ុបដែលបង្កើតច្បាប់នេះ ដាណឺម៉ាក កំពុងចាត់វិធានការ ដ៏សំខាន់មួយ ឆ្ពោះទៅរកការណែនាំអំពីការកំណត់អាយុលើការប្រើប្រពន្ធផ្សព្វផ្សាយសង្គម។ សកម្មភាពនេះ បានធ្វើឡើងដើម្បីការពារកុមារ និងយុវជនក្នុងពិភពឌីជីថល។»

សម្ព័ន្ធអ្នកតាក់តែងច្បាប់មកពីបក្សនយោបាយស្ដាំនិយម ឆ្វេងនិយម និងកណ្ដាល របស់ដាណឺម៉ាក កំពុងបញ្ជាក់យ៉ាងច្បាស់ថា ​កុមារមិនគួរត្រូវបានគេទុកចោលតែម្នាក់ឯង នៅក្នុងពិភពឌីជីថល ដែលមានខ្លឹមសារបង្កគ្រោះថ្នាក់ និងផលប្រយោជន៍ពាណិជ្ជកម្ម ដែលជាផ្នែកមួយសំខាន់ ក្នុងជីវិតប្រចាំថ្ងៃ និងកុមារភាពរបស់ពួកគេ។

ក្រសួងបានប្រកាសថា កុមារ និងយុវជន មានបញ្ហាដំណេក បាត់បង់សន្តិភាពផ្លូវចិត្ត ពិបាកផ្ដោតអារម្មណ៍ និងប្រឈមសម្ពាធកាន់តែខ្លាំងឡើង ដោយសារការប្រើប្រាស់បច្ចេកវិទ្យាឌីជីថល ដែលគ្មានច្បាប់ទម្លាប់ និងការណែនាំ តម្រង់ទិសពីមនុស្សពេញវ័យ៕