សាកលវិទ្យាល័យ Tsinghua របស់ចិន បានក្លាយជាសាកលវិទ្យាល័យកំពូលរបស់ពិភពលោក លើជំនាញវិទ្យាសាស្ត្រកុំព្យូទ័រ វ៉ាដាច់សាកលវិទ្យាល័យអាមេរិកដែលធា្លប់តែឈានមុនគេ ក្នុងវិស័យនេះជាយូរ។

សាកលវិទ្យាល័យចិន បានកាន់កាប់តំណែងកំពូលនៅក្នុងតារាងសកលពីរ គឺ CSRankings និង U.S. News Best Global Universities ដែលលទ្ធផលនេះ ជាការផ្លាស់ប្តូរដ៏សំខាន់ នៃការអប់រំថ្នាក់ឧត្តមសិក្សាក្នុងវិស័យវិទ្យាសាស្ត្រកុំព្យូទ័ររបស់ពិភពលោក។

នៅក្នុង CSRankings ដែលវាយតម្លៃស្ថាប័នផ្អែកលើ ការបោះពុម្ពផ្សាយរបស់មហាវិទ្យាល័យនៅក្នុងសន្និសីទឈានមុខគេក្នុងវិស័យដូចជា បញ្ញាសិប្បនិម្មិត ប្រព័ន្ធកុំព្យូទ័រ ទ្រឹស្តី និងការស្រាវជ្រាវអន្តរកម្មសិក្សា, សាកលវិទ្យាល័យ Tsinghua បានវ៉ាដាច់សាកលវិទ្យាល័យ Carnegie Mellon ដែលជាស្ថាប័នឈានមុខក្នុងវិស័យវិទ្យាសាស្ត្រកុំព្យូទ័ររបស់អាមេរិក។

យោងតាមការធ្វើបច្ចុប្បន្នភាព CSRankings កាលពីខែមុន សាកលវិទ្យាល័យចំនួន ៨ ក្នុងចំណោមសាកលវិទ្យាល័យកំពូលទាំង ១០ ក្នុងវិស័យវិទ្យាសាស្ត្រកុំព្យូទ័រ មានមូលដ្ឋាននៅអាស៊ី។ ដោយឡែក សាកលវិទ្យាល័យជាប់ចំណាត់ថ្នាក់កំពូលទាំង ៥ រួមមាន ៖ សាកលវិទ្យាល័យ Tsinghua, ចំណាត់ថ្នាក់លេខ ២ផ្ទួនគ្នាបានទៅលើ សាកលវិទ្យាល័យ Shanghai Jiao Tong និង Carnegie Mellon, តាមពីក្រោយដោយ សាកលវិទ្យាល័យ Zhejiang ជាប់ចំណាត់ថ្នាក់លេខ ៤ និងលេខ៥ ផ្ទួនគ្នាចំនួន ៤ រួមមាន សាកលវិទ្យាល័យវិទ្យាសាស្រ្ត និងបច្ចេកវិទ្យាហុងកុង, សាកលវិទ្យាល័យជាតិសិង្ហបុរី, សាកលវិទ្យាល័យប៉េកាំង និងសាកលវិទ្យាល័យ Illinois របស់អាមេរិក។

CSRankings វាយតម្លៃចំណាត់ថ្នាក់សាកលវិទ្យាល័យ ដោយផ្អែកលើ ចំនួនឯកសារស្រាវជ្រាវ ដែលបានបោះពុម្ព និងចំនួនមហាវិទ្យាល័យ ដែលបោះពុម្ពឯកសារនៅក្នុងសន្និសីទ និងទិនានុប្បវត្តិ ដែលមានកិត្យានុភាពបំផុត នៅក្នុងវិស័យនេះ។ ចំណាត់ថ្នាក់នេះ ផ្ដោតលើការស្រាវជ្រាវ ក្នុងផ្នែកសំខាន់ៗចំនួន ៤ នៅក្នុងវិទ្យាសាស្ត្រកុំព្យូទ័រ រួមមាន បញ្ញាសិប្បនិម្មិត (AI), ប្រព័ន្ធ (System), ទ្រឹស្តី និងវិស័យអន្តរកម្មសិក្សា។

ដោយឡែកនៅក្នុងចំណាត់ថ្នាក់ ដែលរៀបចំដោយ U.S. News Best Global Universities លើជំនាញវិទ្យាសាស្ត្រកុំព្យូទ័រ ដែលបានចេញផ្សាយកាលពីខែមិថុនា បានបង្ហាញថា សាកលវិទ្យាល័យចិន បានដណ្ដើមយកចំណាត់ថ្នាក់កំពូលទាំង ៥ ក្នុងចំណោម ១០។ សាកលវិទ្យាល័យ Tsinghua ទទួលចំណាត់ថ្នាក់លេខ១ បន្ទាប់មកគឺ សាកលវិទ្យាល័យ Nanyang Technological University របស់សិង្ហបុរី, សាកលវិទ្យាល័យ Peking, សាកលវិទ្យាល័យ Zhejiang, សាកលវិទ្យាល័យជាតិសិង្ហបុរី និងសាកលវិទ្យាល័យ Shanghai Jiao Tong ។ ខណៈសាកលវិទ្យាល័យ Stanford របស់អាមេរិក ឈរនៅចំណាត់ថ្នាក់ទី ៨។

ការលេចត្រដែតឡើងរបស់ចិន ក្នុងនាមជាប្រទេសឈានមុខគេ ផ្នែកបញ្ញាសិប្បនិម្មិត (AI) កាន់តែមានភាពច្បាស់លាស់។ ប្រទេសនេះ មានគោលបំណងធ្វើឱ្យខ្លួនឯង ក្លាយជាមជ្ឈមណ្ឌលនវានុវត្តន៍ចម្បងសម្រាប់វិស័យបច្ចេកវិទ្យា ដោយពង្រីកឧស្សាហកម្ម AI ស្នូលរបស់ខ្លួន ឱ្យមានតម្លៃ ១៤០ពាន់លានដុល្លារនៅឆ្នាំ ២០៣០ និងជំរុញវិស័យ ដែលពាក់ព័ន្ធដល់ ១,៤ ពាន់ពាន់លានដុល្លារ នៅអំឡុងពេលដូចគ្នា, នេះបើយោងតាមរបាយការណ៍របស់វេទិកាសេដ្ឋកិច្ចពិភពលោក (WEF) ដែលបានចេញផ្សាយនៅក្នុងខែមករា។

ក្នុងរយៈពេលមួយទសវត្សកន្លងមកនេះ ប្រទេសចិនបានកសាងមូលដ្ឋានគ្រឹះដ៏រឹងមាំមួយ ដើម្បីគាំទ្រដល់សេដ្ឋកិច្ច AI របស់ខ្លួន និងកំពុងធ្វើសមាហរកម្មជាយុទ្ធសាស្ត្រ នៃបច្ចេកវិទ្យា AI ទៅក្នុងវិស័យផ្សេងៗក្នុងល្បឿនដ៏លឿនបំផុតមួយ។

យោងតាមវេទិកាសេដ្ឋកិច្ចពិភពលោក មានកត្តាសំខាន់ ៣ កំពុងជំរុញការអភិវឌ្ឍបច្ចេកវិទ្យា AI បានឆាប់រហ័ស។ ទី១ រដ្ឋាភិបាលដើរតួនាទីយ៉ាងសកម្ម ក្នុងការអភិវឌ្ឍបច្ចេកវិទ្យានេះ ដោយបានបង្កើតផែនការយុទ្ធសាស្ត្រយ៉ាងរឹងមាំ និងការអនុវត្តប្រកបដោយប្រសិទ្ធភាព។ ទី២ ចិន បានកសាងប្រព័ន្ធអេកូឡូស៊ី AI ដែលលើកកម្ពស់កិច្ចហការ និងការបង្កើតថ្មី ដោយជំរុញឱ្យមានការទទួលយកបច្ចេកវិទ្យា AI យ៉ាងទូលំទូលាយ និងចំណុចទី ៣ ក្រុមហ៊ុនល្បីៗ និងឈានមុខរបស់ចិន កំពុងវិនិយោគទឹកប្រាក់យ៉ាងច្រើន លើបច្ចេកវិទ្យា AI ដើម្បីដោះស្រាយបញ្ហាប្រឈមផ្សេងៗ ក្នុងឧស្សាហកម្ម និងជំរុញកិច្ចខិតខំប្រឹងប្រែងរបស់ខ្លួនបន្ថែមទៀត នៅក្នុងវិស័យអាជីវកម្មសំខាន់ៗ។

ការរះឡើងរបស់សាកលវិទ្យាល័យ Tsinghua គឺជាសក្ខីភាពមួយ ដែលបង្ហាញពីប្រសិទ្ធភាពនៃការវិនិយោគជាយុទ្ធសាស្ត្ររបស់ចិនក្នុងវិស័យអប់រំ និងបច្ចេកវិទ្យាជាន់ខ្ពស់។ កិច្ចការសំខាន់ ដែលសាកលវិទ្យាល័យនេះ ផ្ដោតធ្វើ គឺការបោះពុម្ពផ្សាយនៅក្នុងទស្សនាវដ្ដី និងសន្នសីទថ្នាក់កំពូល រួមជាមួយនឹងគំនិតផ្ដួចផ្ដើម ដែលទាក់ទាញធនធានមនុស្សមានទេពកោសល្យបច្ចេកវិទ្យាមកពីជុំវិញពិភពលោក បានជំរុញឱ្យស្ថាប័ននេះ ឈានមុខគេក្នុងផ្នែក AI និងប្រព័ន្ធកុំព្យូទ័រ៕