ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មនុស្សយន្តមានរូបរាងដូចមនុស្សរបស់ចិន នឹងមិនអាចជំនួសកម្មករ ដែលជាមនុស្ស និងបង្កឱ្យមានភាពអត់ការងារធ្វើច្រើននោះទេ, នេះបើយោងតាមមន្ត្រីចិន ដែលគ្រប់គ្រងមជ្ឈមណ្ឌលបច្ចេកវិទ្យាក្នុងទីក្រុងប៉េកាំង ចំពេលមានការពង្រីកយ៉ាងឆាប់រហ័សក្នុងវិស័យនេះ និងការផ្ដល់មូលនិធិរដ្ឋសម្រាប់ការអភិវឌ្ឍបច្ចេកវិទ្យាមនុស្សយន្ត។
លោក Liang Liang នាយករង នៃតំបន់អភិវឌ្ឍសេដ្ឋកិច្ច-បច្ចេកវិទ្យាក្រុងប៉េកាំង ដែលជាមជ្ឈមណ្ឌលបច្ចេកវិទ្យាដ៏ធំបំផុតមួយរបស់ចិន បាននិយាយនៅក្នុងកិច្ចសម្ភាសន៍មួយកាលពីថ្ងៃសុក្រសប្ដាហ៍មុន ជាមួយប្រព័ន្ធផ្សព្វផ្សាយបរទេសថា លោកមិនជឿថាមនុស្សយន្តដែលមានរូបរាងដូចមនុស្ស (Humanoid) នឹងជំនួសការងារមនុស្សដែលបង្កើតវានោះទេ ប៉ុន្តែនឹងបង្កើនផលិតភាព និងប្រតិបត្តិការងារ ក្នុងស្ថានភាពគ្រោះថ្នាក់។
“យើងមិនជឿថា មនុស្សយន្តនឹងមិនធ្វើឱ្យមនុស្សអត់ការងារធ្វើនោះទេ ប៉ុន្តែពួកគេនឹងបង្កើនប្រសិទ្ធភាព ឬធ្វើការងារដែលមនុស្សមិនចង់ធ្វើ ដូចជា ការរុករកទ្រង់ទ្រាយធំ ឬការស្រាវជ្រាវក្រោមបាតសមុទ្រដែលមានជម្រៅជ្រៅ ដែលមនុស្សមិនអាចទៅបាន, ហេតុនេះ ម៉ាស៊ីនអាចជួយមនុស្សក្នុងការរុករកនេះ”
អ្នកជំនាញរូបនេះបន្ថែមថា នៅពេលយប់ មនុស្សត្រូវការពេលសម្រាក ប៉ុន្តែម៉ាស៊ីនអាចបន្តដំណើរការ ដោយផ្ដល់ឱ្យមនុស្សនូវផលិតភាពកាន់តែប្រសើរ ចំណាយថ្លៃដើមទាប និងងាយស្រួលប្រើជាងមុន។ ដូច្នេះ យើងមើលឃើញថា នេះជាទិសដៅការអភិវឌ្ឍន៍សម្រាប់អនាគត។
លោក Liang បានពន្យល់ថា មនុស្សយន្ត ដែលបានចូលរួមកម្មវិធីរត់ពាក់កណ្ដាលម៉ារ៉ាតុងដំបូងគេបង្អស់នៅលើពិភពលោក ដែលធ្វើឡើងនៅទីក្រុងប៉េកាំង ត្រូវបានបង្កើតឡើង ក្នុងចេតនាបង្ហាញពីក្ដីសង្ឃឹមរបស់លោក និងមន្ត្រីផ្នែកបច្ចេកវិទ្យាដទៃទៀតថា មនុស្សយន្តទាំងនេះ នឹងគាំទ្រ និងជួយមនុស្សជាជាងជំនួសមនុស្ស។
មនុស្សយន្តទាំងនេះ គឺជាផ្នែកមួយនៃមហិច្ឆតារបស់ប្រទេសចិន ក្នុងការនាំមុខគេក្នុងវិស័យបច្ចេកវិទ្យាមនុស្សយន្ត និងបញ្ញាសិប្បនិម្មិត។ ខណៈរដ្ឋាភិបាលក៏កំពុងព្យាយាមបន្ធូរបន្ថយការព្រួយបារម្ភរបស់សាធារណៈជនអំពីការរំខាន ដែលអាចកើតមានចំពោះកម្លាំងពលកម្មមនុស្សផងដែរ៕
