នៅក្នុងពិភពលោកមួយដែលពោរពេញដោយភាពរីកចម្រើននៃបច្ចេកវិទ្យា វត្តមាន​បញ្ញាសិប្បនិម្មិត (AI) និងការផ្លាស់ប្ដូរនៃបរិបទសង្គមយ៉ាងឆាប់រហ័ស ទាមទារឱ្យសិស្សបច្ចុប្បន្ន ត្រូវរៀនពីរបៀបសម្របខ្លួន ចេះសួរសំណួរ និងការបង្កើតថ្មី។

បើតាមវេទិកាសេដ្ឋកិច្ចពិភពលោក (WE Forum) បានលើកឡើងថា ចំណុចខ្សោយនៃប្រព័ន្ធអប់រំបច្ចុប្បន្ន គឺសាលាស្ទើរតែទូទាំងពិភពលោក កំពុងបង្រៀនសិស្សតាមរបៀបដែលហួសសម័យ ដើម្បីបណ្ដុះបណ្ដាលពួកគេចូលទៅក្នុងសង្គម ដែលប្រែប្រួលជាប្រចាំ និងគ្មានភាពប្រាកដប្រជាផងដែរ។ ខណៈពេលដែលសិស្សកំពុងស្វែងអំពីរបៀបប្រើប្រាស់ឧបករណ៍ AI និងវេទិកាឌីជីថលដោយខ្លួនឯង អ្នកអប់រំត្រូវបានគេរំពឹងថា នឹងបណ្ដុះបណ្ដាល ហើយ​រៀបចំសិស្ស សម្រាប់អនាគត ទាំងដែលពួកគាត់ជាគ្រូបង្រៀន មិនទទួលបានការបណ្ដុះបណ្ដាល សម្រាប់ការត្រៀមខ្លួនឆ្ពោះទៅកាន់អនាគត។ នេះគឺជាពេលដែលត្រូវគិតឡើងវិញអំពីការអភិវឌ្ឍន៍គ្រូបង្រៀន ដោយវាមិនមែនជាការងារបន្ថែមទេ ប៉ុន្តែជាការវិនិយោគប្រកបដោយយុទ្ធសាស្ត្រ។

ប្រសិនបើយើងរំពឹងថា គ្រូបង្រៀននឹងរៀបចំសិស្សសម្រាប់ទីផ្សារការងារនាពេលអនាគត យើងត្រូវផ្ដល់ទីកន្លែង ពេលវេលា និងឧបករណ៍សម្រាប់លោកគ្រូអ្នកគ្រូបន្តការសិក្សាផងដែរ។ នោះមានន័យថា ការផ្លាស់ប្ដូរ គឺលើសពីការរៀបចំសិក្ខាសាលាម្ដងម្ដាល ឬការបន្ថែមទំនួលខុសត្រូវ។ គេត្រូវការរចនាសម្ព័ន្ធ និងពេលវេលា ដើម្បីបង្កើតកាលវិភាគ សម្រាប់គ្រូបង្រៀនទទួលការបណ្ដុះបណ្ដាលពីអ្នកជំនាញ និងរក្សាការតាមដានជាប់លាប់ជាមួយនឹងការផ្លាស់ប្ដូររបស់ពិភពលោក។ ប្រសិនបើចង់បណ្ដុះបណ្ដាលអ្នកសិក្សាដែលរហ័សរហួន យើងត្រូវការគ្រូបង្រៀន ដែលមានភាពរហ័សរហួន និងប្រព័ន្ធដែលបន្តបណ្ដុះបណ្ដាលគ្រូបង្រៀនដូចគ្នានឹងការបណ្ដុះបណ្ដាលសិស្សដែរ។

ការហាមឃាត់មិនឱ្យប្រើប្រាស់ AI ក្នុងថ្នាក់រៀន គឺប្រៀបដូចជាការព្យាយាមបញ្ឈប់រលកយក្សស៊ូណាមិដូច្នេះដែរ។ យើងមិនអាចបញ្ឈប់ ឬរារាំងមិនឱ្យរលកនៃបច្ចេកវិទ្យានេះ ចូលមកក្នុងការប្រើប្រាស់របស់សិស្ស និងថ្នាក់រៀនបាននោះទេ ប៉ុន្តែយើងអាចបង្រៀនសិស្សឱ្យចេះហែលទឹកបាន។

នោះមានន័យថា គ្រូបង្រៀន ត្រូវបណ្ដុះបណ្ដាលជំនាញត្រិះរិះពិចារណា ភាពច្នៃប្រឌិត និងហេតុផលសីលធម៌ ដល់សិស្ស ព្រោះពួកគេ នឹងមិនអាចសម្គាល់ព័ត៌មានមិនពិត ឬវាយតម្លៃអំពីភាពលំអៀងនៃចម្លើយរបស់​ AI នោះទេ ប្រសិនបើគ្រូបង្រៀន មិនបានបណ្ដុះបណ្ដាលពួកគេ។

ក្រៅពីជំនាញមូលដ្ឋាននៃការប្រើប្រាស់ AI ការអភិវឌ្ឍជំនាញទន់ និងសមត្ថភាពស្គាល់ពីខ្លួនឯង ដូចជា ជំនាញដោះស្រាយបញ្ហា ការប្រាស្រ័យទាក់ទង អ្នកសំយោគគំនិត ឬអ្នកបង្កើតថ្មី ដល់សិស្ស នឹងជួយឱ្យពួកគេពង្រឹងសមត្ថភាពផ្ទាល់ខ្លួនបានឆាប់រហ័ស និងជួយឱ្យស្គាល់ពីខ្លួនឯងកាន់តែច្រើន៕