បរទេស – សារព័ត៌មាន Reuters បាន​រាយការណ៍​កាលពីថ្ងៃទី៣០ មីនាថា មជ្ឈមណ្ឌលក្រុមក្រមសីលធម៌វិជ្ជាជីវៈបច្ចេកវិទ្យាសម្រាប់បញ្ញាសប្បនិម្មិត និងគោលនយោបាយឌីជីថល (CAIDP) បានស្នើសុំឱ្យគណៈកម្មការពាណិជ្ជកម្មសហព័ន្ធសហរដ្ឋអាមេរិក (U.S Federal Trade Commission) បញ្ឈប់ក្រុមហ៊ុន Open AI ចំពោះការចេញផ្សាយពាណិជ្ជកម្មថ្មីអំពី Chart GPT-4 ដោយថា វាអាចបង្កើតហានិភ័យជាច្រើនចំពោះសង្គម។

នៅក្នុងពាក្យបណ្ដឹង ក្រុមអ្នកតស៊ូមតិបានលើកឡើងថា “GPT-4 នឹងបង្កឱ្យមានភាពលំអៀង ការឆបោក និងមានហានិភ័យខ្ពស់ចំពោះឯកជនភាព និងសុវត្ថិភាពទិន្នន័យសាធារណៈ។”

ពាក្យបណ្ដឹងផ្លូវការដែលដាក់ស្នើទៅកាន់ FTC គឺធ្វើឡើង តាមលិខិតបើកចំហមួយដែលចុះហត្ថលេខាដោយលោក Elon Musk ដែលគេស្គាល់ថាជាអ្នកជំនាញផ្នែកបញ្ញាសប្បនិម្មិត បានអំពាវនាវឱ្យមានការផ្អាកដំណើរការអភិវឌ្ឍបច្ចេកវិទ្យាថ្មី GPT-4 ដែលបង្កើត​ឡើង​ដោយ​មជ្ឈមណ្ឌលស្រាវជ្រាវ Open AI ទើបតែដាក់ដំណើរការ ក្រោមហេតុដែលលើកឡើងថា បច្ចេកវិទ្យានេះអាចបង្កើតហានិភ័យជាច្រើនចំពោះសង្គម។

ក្រុមអ្នកតស៊ូមតិបានបញ្ជាក់នៅក្នុងពាក្យបណ្ដឹងថា Chat GPT-4 មិនបានបំពេញតាមលក្ខខណ្ឌស្ដង់ដារបស់ FTC ដែលតម្រូវឱ្យមាន “តម្លាភាព យុត្តិធម៌ ភាពអាចគ្រប់គ្រងបាន និងមានទំនួលខុសត្រូវខ្ពស់” ឡើយ។ ជាក់ស្ដែង OpenAI បានលាតត្រដាងប្រវត្តិឆាតឯកជនជាច្រើនទៅកាន់អ្នកប្រើប្រាស់ដទៃ។ ចំណែកអ្នកស្រាវជ្រាវ AI ម្នាក់ដែលជាសមាជិកក្រុមអ្នកតស៊ូមតិ បានលើកឡើងក្នុងពាក្យបណ្ដឹងថា “ Chat GPT-4 អាចចូលទៅកាន់កាប់គណនីឯកជនរបស់នរណាម្នាក់បាន វាអាចមើលប្រវត្តិឆាតរបស់ម្ចាស់គណនី និងប្រើព័ត៌មានវិក្ក័យបត្រដោយមិនឱ្យម្ចាស់គណនីដឹង”។

លោក Marc Rotenberg ប្រធានមជ្ឈមណ្ឌលក្រុមក្រមសីលធម៌វិជ្ជាជីវៈបច្ចេកវិទ្យាសម្រាប់បញ្ញាសប្បនិម្មិត និងគោលនយោបាយឌីជីថល (CAIDP) បានលើកឡើងថា

“ខ្ញុំមានការព្រួយបារម្ភថា សម្ពាធពាណិជ្ជកម្ម និងការផ្សព្វផ្សាយជំរុញឱ្យក្រុមហ៊ុន Open AI ដាក់ឱ្យប្រើប្រាស់នូវផលិតផល ដែលមិនទាន់អភិវឌ្ឍរួចរាល់។” ក្នុងនាមជាអ្នកចុះហត្ថលេខាម្នាក់ ក្នុងចំណោមជាង ១ពាន់ហត្ថលេខី នៃពាក្យបណ្ដឹងជំរុញឱ្យផ្អាកការអភិវឌ្ឍបច្ចេកវិទ្យា AI លោក Rotenberg បន្ថែមថា “ Open AI គឺមិនបានអនុលោមតាមគោលការណ៍របស់ FTC នោះទេ ផលិតផលនេះអាចបង្ករឱ្យមានរឿងអយុត្តិធម៌ និងបញ្ហាបោកប្រាស។” 

ក្រុមអ្នកដាក់ពាក្យបណ្ដឹងបានជំរុញឱ្យ FTC បើកការស៊ើបអង្កេតចំពោះក្រុមហ៊ុន Open AI ពាក់ព័ន្ធនឹងពាណិជ្ជកម្មនៃការដាក់ឱ្យប្រើប្រាស់បច្ចេកវិទ្យា Chart GPT-4 និងធានាឱ្យបាននូវការបង្កើតប្រព័ន្ធសុវត្ថិភាពជាចាំបាច់សម្រាប់អ្នកប្រើប្រាស់ អាជីវកម្ម និងទីផ្សារពាណិជ្ជកម្ម។

គួរបញ្ជាក់ផងដែរថា មជ្ឈមណ្ឌលស្រាវជា្រវ Open AI មានមូលដ្ឋាននៅរដ្ឋ California សហរដ្ឋអាមេរិក និងមានការគាំទ្រពីសំណាក់ក្រុមហ៊ុនបច្ចេកវិទ្យាយក្សរបស់អាមេរិកគឺ Microsoft Corp. ។ មជ្ឈមណ្ឌលនេះបានបង្ហាញបច្ចេកវិទ្យា AI GPT (Generative Pre-trained Transformer) របស់ខ្លួន កាលពីដើមខែមីនា និងបង្ករភាពភ្ញាក់ផ្អើលយ៉ាងខ្លាំងពីសំណាក់សាធារណជនចំពោះសមត្ថភាពពិសេសរបស់បច្ចេកវិទ្យានេះ ដែលអាចសន្ទនាជាមួយមនុស្ស តែងបទចម្រៀង និងសង្ខេបឯកសារវែងៗជាដើម៕