សិស្សអូស្ត្រាលី​រាប់លាននាក់ កំពុង​មាន​បញ្ហា​ខ្សោយ​សមត្ថភាព​ផ្នែក​គណិតវិទ្យា ហើយ​អ្នកជំនាញ​ព្រមាន​ថា វាអាច​ធ្វើឱ្យ​ប្រទេសនេះ បាត់បង់​ផលិតភាព និង​ប៉ះពាល់​ដល់កំណើន​សេដ្ឋកិច្ច​រាប់ពាន់​លានដុល្លារ។

របាយការណ៍​ថ្មី​ពីវិទ្យាស្ថាន Grattan ដែលជាស្ថាប័ន​គិតគូរ​អំពីគោល​នយោបាយ​សាធារណៈ​របស់​ប្រទេសអូស្ត្រាលី បាន​រកឃើញ​ថា ១/៣ នៃ​សិស្សអូស្រ្តាលី ដែល​កំពុង​រៀន​ថ្នាក់ទី៣, ៥, ៧ និង៩ ប្រមាណ ១,៣លាននាក់ មិន​មានភាព​ស្ទាត់​ជំនាញ​ក្នុង​ការ​គិតលេខ នេះបើ​យោង​តាមកម្មវិធី​វាយតម្លៃ​ថ្នាក់ជាតិឆ្នាំ​២០២៤ អំពី​អក្ខរកម្ម និង​លេខ (NAPLAN)។

បញ្ហា​នេះ ស្ដែងឡើង​កាន់​តែច្បាស់ ប្រសិន​បើប្រៀប​ធៀប​ទិន្នន័យ​ជា​លក្ខណៈ​អន្តរជាតិ។ របាយការណ៍​បង្ហាញ​ថា មានតែ ១៣% នៃ​សិស្សថ្នាក់ទី៤ របស់​អូស្ដ្រាលី​ប៉ុណ្ណោះ ដែល​ទទួល​បាន​លទ្ធផល​ល្អ ក្នុង​ការសិក្សា​គណិតវិទ្យា និង​វិទ្យាសាស្ត្រ​អន្តរជាតិ (TIMMS) បើ​ប្រៀបធៀប​ទៅនឹង ៤៩% ក្នុង​ប្រទេស​សិង្ហបុរី និង ២២% នៅ​ចក្រភព​អង់គ្លេស។

ស្ទើរតែ​ពាក់កណ្ដាល​នៃកុមារអាយុ ១៥ឆ្នាំ ក្នុង​ប្រទេស​អូស្ត្រាលី​មិនបាន​បំពេញ​លក្ខខណ្ឌ​តាមស្តង់ដារ គណិតវិទ្យា​ទៅ​ក្នុង​កម្មវិធី​២០២២ សម្រាប់​ការ​វាយតម្លៃ​សិស្ស​អន្តរជាតិ (PISA)។

បញ្ហា​សំខាន់​មួយ ដែល​កំណត់​ដោយ​អ្នកស្រាវជ្រាវ គឺ​កង្វះ​ទំនុកចិត្ត និង​ជំនាញ​ក្នុង​ចំណោម​គ្រូបង្រៀន។ ការស្ទង់​មតិ​លើអ្នក​អប់រំ និង​ថ្នាក់ដឹកនាំ​សាលា​ប្រហែល ២,០០០នាក់ បាន​បង្ហាញ​ថា ២១% នៃ​គ្រូបឋមសិក្សា​មានអារម្មណ៍​ថា មិនសូវ​ជឿជាក់​លើការ​បង្រៀន​គណិតវិទ្យានោះទេ បើធៀប​នឹងមុខវិជ្ជា​ផ្សេងទៀត។ អ្វីដែល​គួរ​ឱ្យព្រួយបារម្ភ​ជាងនេះ​ទៅទៀត គឺ​នាយក​សាលា​ចំនួន ៩៤% បាន​បង្ហាញថា គ្រូ​របស់ពួកគេ​ខ្វះទំនុកចិត្ត​ក្នុងការ​បង្រៀន​គណិតវិទ្យា សម្រាប់​កម្រិត​ថ្នាក់ទី៥ និងទី៦។

លោក Jordana Hunter នាយក​ផ្នែក​អប់រំ​ នៃវិទ្យាស្ថាន Grattan បាន​និយាយ​ថា អ្នក​បង្កើត​គោលនយោបាយ​ជាច្រើន​ជឿខុស​គ្នា​ថា គណិតវិទ្យា​កម្រិត​បឋមសិក្សា គឺជាការ​បង្រៀន​ការ​គណនា​ត្រង់ៗ​ធម្មតា។ លោក Hunter បាន​សង្កត់ធ្ងន់​ថា ការ​បង្រៀន​គណិតវិទ្យា​ឱ្យមាន​ប្រសិទ្ធភាព​គ្រប់កម្រិត សូម្បីតែ​កម្រិត​មត្តេយ្យ ក៏ទាមទារ​ជំនាញ​ឯកទេស​ដែរ។

វិទ្យាស្ថាន Grattan ក៏បាន​គូស​បញ្ជាក់ផង​ដែរ​ថា វិធីសាស្ត្រ​សាមញ្ញពេក​ក្នុងការ​បង្រៀន រួមទាំង ការពឹងផ្អែក​ខ្លាំង​លើហ្គេម និង​សកម្មភាព​គណិតវិទ្យា​ធម្មតា បរាជ័យ​ក្នុងការ​កសាងការ​យល់ដឹង អំពី​មូលដ្ឋាន​គ្រឹះ​គណិតវិទ្យា។ លទ្ធផល គឺកុមារ​ជាច្រើន​បាន​ចូលរៀន​ថ្នាក់​មធ្យមសិក្សា ដោយ​គ្មានជំនាញ​ចាំបាច់​ ដើម្បីសម្រេច​ភាព​ជោគជ័យ​ក្នុង​ជីវិត​របស់គេ។

ផលប៉ះពាល់​លើកម្លាំង​ពលកម្ម និង​សេដ្ឋកិច្ច​នាពេល​អនាគត​របស់​អូស្រ្តាលី គឺ​ធំធេង​ណាស់។ ជំនាញ​គណិតវិទ្យា​ខ្សោយ ជាហេតុផល​រួមចំណែក​ដល់អត្រា​នៃការ​បោះបង់​ការសិក្សា​ខ្ពស់ និង​ហានិភ័យ​គ្មានការងារ​ធ្វើនា​ពេល​អនាគត។ ប្រហែល ៧៥%​ នៃ​និយោជក​អូស្ត្រាលី​បានលើក​ឡើងពី​គណិតវិទ្យា និង​ការអាន នៅមាន​កម្រិត​នៅឡើយ​ក្នុង​ចំណោម​បុគ្គលិក​របស់​ខ្លួន ដែលនាំ​ឱ្យមាន​កំហុស​ញឹកញាប់ និង​ប៉ះពាល់​ដល់ផលិត​ភាព​ការងារ, នេះបើ​យោងតាម​របាយការណ៍​របស់ Financial Review ។

យោង​តាម Deloitte Access Economics បាន​បង្ហាញ​ថា ការ​ពង្រឹង​កម្រិត​មធ្យម​ត្រឹម ៥% លើ​ពិន្ទុ​គណិតវិទ្យា PISA របស់​អូស្ត្រាលី អាច​ជំរុញ GDP របស់​ប្រទេស​បាន​ប្រហែល ១៩ពាន់​លាន​ដុល្លារ។

អ្នកជំនាញ​កំពុង​ជំរុញ​​ឱ្យមាន​ការធ្វើ​កំណែទម្រង់​ជាបន្ទាន់។ កម្មវិធី​បង្រៀន​ប្រកប​ដោយ​ប្រសិទ្ធភាព ការរៀបចំ​គម្រោង​ជាប្រព័ន្ធ និង​ការបណ្ដុះបណ្ដាល​គ្រូឱ្យមាន​សមត្ថភាព​ល្អប្រសើរ​ជាងមុន អាច​ជួយកែ​សម្រួល​បញ្ហានេះ។ សាលារៀន​មួយ​ចំនួន កំពុង​អនុវត្ត​យុទ្ធសាស្ត្រ​ទាំងនេះរួច​ហើយ ដោយ​សង្ឃឹមថា​នឹងសម្រេច​ភាព​ជោគជ័យ​នាពេល​អនាគត នឹង​ធ្វើឱ្យ​ប្រសើរ​ឡើង​សមត្ថភាព​សិស្ស និង​សេដ្ឋកិច្ច​អូស្ត្រាលី៕