ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសិក្សាលក្ខណៈវិទ្យាសាស្ត្រ បានបង្ហាញថា ការបណ្ដុះឱ្យកុមារមានផ្នត់គំនិតរីកចម្រើន គឺជាចំណុចចាប់ផ្ដើម នៃការអភិវឌ្ឍជីវិតរបស់ពួកគេ។ ផ្នត់គំនិតរីកចម្រើន ជាចំណែកសំខាន់ក្នុងការពង្រឹងអាកប្បកិរិយារស់នៅ ការទំនាក់ទំនង និងចរិតលក្ខណៈរបស់កុមារ។ អ្នកជំនាញផ្នែកចិត្តសាស្ត្រ បានបង្ហាញចំនួន ៤ ដែលឪពុកម្ដាយអាចជួយកូនជាទីស្រឡាញ់ឱ្យមានផ្នត់គំនិតរីកចម្រើន។
១. ចែករំលែករឿងរ៉ាវ ដែលអ្នកបានឆ្លងកាត់ ៖ ពេលខ្លះ ក្មេងៗមានការខ្មាស់អៀសក្នុងការចែករំលែកអំពីភាពបរាជ័យ និងឧបសគ្គ ដែលគេបានឆ្លងកាត់ ព្រោះពួកគេយល់ថា រឿងទាំងអស់នោះ គឺជាបញ្ហាសាមញ្ញសម្រាប់មនុស្សធំ ។ ប៉ុន្តែនៅពេលដែលម្ដាយឪពុក ឬអ្នកអាណាព្យាបាល ចែករំលែកអំពីរឿងរ៉ាវជីវិត ដែលអ្នកបានឆ្លងកាត់ ទាំងជោគជ័យ និងបរាជ័យ នឹងធ្វើឱ្យពួកគេយល់ថា តាមពិតភាពបរាជ័យ និងឧបសគ្គជីវិត គឺកើតឡើងចំពោះមនុស្សគ្រប់គ្នា។ អ្វីដែលសំខាន់ គឺគេត្រូវមានផ្នត់គំនិតរីកចម្រើន និងរៀនសូត្រពីកំហុសដែលគេបានសាង។
២. និយាយអំពីកំហុសដែលអ្នកចូលចិត្ត ៖ នៅពេលដែលយើងរស់នៅក្នុងផ្នត់គំនិតរីកចម្រើន យើងមិនខ្លាចបង្កកំហុសនោះទេ ព្រោះយើងយល់ថា កំហុសគឺជាឱកាសក្នុងការសិក្សា និងស្វែងយល់ពីបទពិសោធន៍ជីវិត។ ការបង្កើតកំហុស គឺជាផ្នែកមួយដ៏សំខាន់ ដើម្បីកសាងជំនាញ និងភាពប៉ិនប្រសប់ ទៅលើការងារ ឬវិស័យអ្វីមួយ។ ដូច្នេះ ឪពុកម្ដាយ អាចនិយាយពីកំហុសណាមួយ ដែលអ្នកធ្លាប់បានបង្កើតឡើង ហើយបានរៀនសូត្រមេរៀនសំខាន់ៗជាច្រើនពីកំហុសនោះ ឱ្យកូនៗបានស្ដាប់។
៣. លើកទឹកចិត្តកូននៅពេលគេបង្កកំហុស ៖ ក្មេងៗច្រើនតែផ្ដោតលើការបរាជ័យ ឬឧបសគ្គ ដែលពួកគេកំពុងជួបប្រទះក្នុងពេលបច្ចុប្បន្ន ហើយភ្លេចឆ្លុះបញ្ចាំងពីភាពជោគជ័យ ដែលគេបានឆ្លងកាត់កាលពីអតីតកាល។ ប្រសិនបើកូនរបស់អ្នកមានបញ្ហាថប់បារម្ភ ឬបាក់ទឹកចិត្ត សូមចូលខ្លួនធ្វើជាចំណែកនៃការលើកទឹកចិត្តដល់កូនរបស់អ្នក។ កុមារ និងក្មេងៗភាគច្រើនត្រូវការការលើកទឹកចិត្ត និងរំលឹកអំពីសមិទ្ធផល ដែលពួកគេសម្រេចបានពីអតីតកាល ដើម្បីពង្រឹងភាពក្លាហាន ហ៊ានប្រឈមនឹងបញ្ហា និងវិបត្តិ។
៤. សួរកូនពីចំណុច ដែលពួកគេត្រូវការជំនួយ ៖ ការសួរ ឬជជែកជាមួយកូន អំពីចំណុច ដែលពួកគេត្រូវការជំនួយ នឹងជួយឱ្យពួកគេមានអារម្មណ៍កក់ក្ដៅ ហើយក្លាហានស្នើសុំការគាំទ្រ ឬជំនួយ នៅក្នុងពេលចាំបាច់។ ការជួយកុមារ ឱ្យមានផ្នត់គំនិតរីកចម្រើន មិនមែនគ្រាន់តែជំរុញឱ្យពួកគេ ធ្វើកិច្ចការ ឬរឿង ដែលពិបាកៗប៉ុណ្ណោះទេ។ អ្នកក៏អាចធានាសម្រាប់ពួកគេថា ពួកគេមានធនធាន និងការគាំទ្រ ក្នុងកាលៈទេសៈ ដែលពួកគេត្រូវការជំនួយជាចាំបាច់៕
