ការនាំកុមារឱ្យធ្វើសកម្មភាពដែលពាក់ព័ន្ធនឹងស្ទែម ជាការជំរុញឱ្យក្មេងៗ មានចំណង់ក្នុងការចាប់យកជំនាញវិទ្យាសាស្រ្ត ឬក៏បណ្តុះស្មារតីពួកគេ​ឱ្យត្រឡប់ទៅសិក្សាស្វែងយល់អំពីមុខវិជ្ជាពាក់ព័ន្ធនឹងវិទ្យាសាស្រ្ត តួយ៉ាងដូចជា គណិតវិទ្យា រូបវិទ្យា និងមេរៀនដែលទាក់ទងនឹងការគណនាជាដើម ហើយជំនាញ ឬចំណេះដឹងដែលបានរៀនពីសកម្មភាពទាំងនេះ នាំកុមារបន្តឈ្វេងយល់ពីរបៀបដែលពិភពលោកប្រែប្រួល ហើយនៅពេលអនាគតមុខវិជ្ជាទាំងនេះ មានតម្រូវការស្ទើរតែគ្រប់វិស័យនៃការងារ។

តាមរយៈគេហទំព័រ NewsFolks បានបង្ហាញប្រភេទហ្គេមមួយចំនួនដែលផ្សារភ្ជាប់កុមារនៅនឹងស្ទែម ដោយមានរៀបរាប់លម្អិតនៅខាងក្រោម ៖

១. ផ្គុំវត្ថុឱ្យក្លាយជារូបចម្លាក់ ៖ មានវត្ថុធាតុជាច្រើនដែលអាចឱ្យកុមារបង្កើតបានទៅជារូបចម្លាក់, យ៉ាងណាក៏ដោយ ថ្មជាវត្ថុមួយដែលមាននៅគ្រប់តំបន់ ដូច្នេះមិនគួរមើលរំលងវត្ថុប្រភេទនេះទេ អនុញ្ញាតឱ្យកុមារប្រើប្រាស់ដុំថ្ម ច្នៃឱ្យក្លាយទៅជារូបចម្លាក់ ជារូបមនុស្ស រូបប្រាសាទ។ ដំបូងៗបង្ហាញលំនាំ បន្ទាប់មកទុកពេលឱ្យកុមារមានពេលគិត និងរៀបទៅតាមការស្រមើស្រមៃផ្ទាល់ខ្លួន។ បើអាច សូមទុកចន្លោះបរិវេណផ្ទះឱ្យមានភាពទូលាយ ដើម្បីជំរុញការគិត និងការផ្លាស់ប្តូររូបរាងចម្លាក់ទៅតាមលទ្ធភាព និងសមត្ថភាពរបស់ពួកគេ។

២. បង្កើតផ្ទះ ឬកន្លែងសម្រាប់សត្វនៅ​ ៖ ការចូលរួមរបស់អាណាព្យាបាលមានឥទ្ធិពលវិជ្ជមាន មិនថាការសិក្សា ឬការលេងហ្គេម ហើយការលេងហ្គេមទៀតសោត ស្រដៀងនឹងការនិពន្ធដែរ​ គឺមានទាំងពិត និងប្រតិដ្ឋ តែអ្វីដែលសំខាន់គឺមានជាសកម្មភាព និងការបង្កើតឱ្យលេចចេញជារូបរាង ដោយការកែច្នៃសម្ភារ ឬរបស់លេងក្នុងការផ្គុំជារូបផ្ទះ ឬសណ្ឋាគារ ក៏ដូចជាជម្រក។ ប្រសិនបើក្នុងផ្ទះមានសត្វចិញ្ចឹម គួរនាំកុមារបង្កើតកន្លែងសម្រាប់សត្វទាំងនោះស្នាក់នៅ ក៏ជាសកម្មភាពមួយជំរុញបាននូវការគិត និងការកែច្នៃយ៉ាងសម្បូរបែប។

៣. ការបង្កើតទ្រនំសម្រាប់សត្វ ៖ ជាឱកាសល្អ ប្រសិនបើនៅជុំវិញផ្ទះមានសត្វស្លាបមកទុំនៅ ឬសត្វចិញ្ចឹមដទៃទៀតមករស់នៅ ឆ្លៀតក្នុងពេលនេះ​ គួរបង្រៀនកុមារឱ្យពួកគេរិះរកវិធីយ៉ាងណាក្នុងការបង្កើតទ្រនុំមួយដែលផ្តល់ភាពកក់ក្តៅទៅកាន់សត្វបក្សីទាំងនោះ។ កត្តានេះនឹងជំរុញឱ្យកុមារចាប់ផ្តើមស្វែងយល់អំពីតម្រូវការសត្វ បង្កើនសកម្មភាព និងគិតវិភាគអំពីវិធីសាស្រ្តក្នុងការថែរក្សាបក្សី ដោយការបង្កើតសម្បុកមួយជាទីទាក់ទាញ, ទាំងនេះសុទ្ធសឹងតែជាសកម្មភាពជំរុញភាពច្នៃប្រតិដ្ឋ៕