ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការបង្រៀនអំពីសេចក្ដីសប្បុរសទៅកាន់កុមារ គឺជាសកម្មភាពដែលជួយឱ្យពួកគេរីកចម្រើនអាក្បកិរិយាផ្នែកសង្គមបានឆាប់រហ័ស ជាពិសេសគឺការចែករំលែក ការយល់ចិត្ត និងមានសេចក្ដីមេត្តា ករុណាចំពោះអ្នកដទៃ។ ដើម្បីបង្រៀន និងបង្ហាញភាពជាគម្រូ អំពីសេចក្ដីសប្បុរស ទៅកាន់កុមារ ឪពុកម្ដាយ អាចអនុវត្តទម្លាប់ចំនួន ៥ នៅក្នុងគ្រួសារ។
១. បរិច្ចាគសម្ភារៈផ្សេងៗទៅកាន់មនុស្សខ្វះខាត ៖ ការបរិច្ចាគសម្ភារៈ និងរបស់របរផ្សេងៗទៅកាន់មនុស្សខ្វះខាត ផ្ដល់នូវអត្ថប្រយោជន៍ជាច្រើន សម្រាប់កុមារ ជាពិសេស ធ្វើឱ្យពួកគេស្គាល់អំពីតម្លៃនៃភាពខ្វះខាត និងសារៈសំខាន់របស់សម្ភារៈ ឬរបស់ប្រើប្រាស់ ដែលពួកគេកំពុងមាន។ ចំពោះសកម្មភាព ដែលឪពុកម្ដាយអាចធ្វើបាន អាចជាការប្រមូលប្រដាប់ប្រដាក្មេងលេង សម្លៀកបំពាក់ ឬសៀវភៅ ដែលអាចនៅប្រើប្រាស់បាន បរិច្ចាគទៅកាន់អ្នកដែលមានជីវភាពខ្វះខាត ដាក់ក្នុងបណ្ណាល័យ សាលារៀន ឬកម្មវិធីសប្បុរសធម៌ជាដើម។ យ៉ាងណាក៏ដោយ ឪពុកម្ដាយ អាចពិភាក្សាជាមួយកូន និងផ្ដល់ជម្រើសឱ្យគេ ដើម្បីសម្រេចចិត្ត ជ្រើសរើសអ្វី ដែលគេចង់បរិច្ចាគ។
២. ចេះជួយទុក្ខធុរៈអ្នកដទៃ ៖ ការបង្កើតទម្លាប់ចេះជួយយកអាសារ អ្នកដែលកំពុងត្រូវការជំនួយ អាចជួយកុមារដឹងពីទុក្ខធុរៈអ្នកដទៃ យល់ដឹងពីវិធីសាស្ត្រដោះស្រាយបញ្ហា ព្រមទាំងអាចគ្រប់គ្រង និងបង្ការវិបត្តិផ្សេងៗ ដែលអាចកើតឡើងដោយមិនបានព្រាងទុក។ ឪពុកម្ដាយ អាចលើកបង្ហាញ ឬលើកទឹកចិត្តឱ្យកូន ចេះជួយការងារតូចៗ អ្នកជិតខាង ឬសមាជិកក្នុងគ្រួសារ ដូចជា សម្អាតទីធ្លាក្នុងបរិវេនផ្ទះ ឬជួយការងារក្នុងផ្ទះជាដើម។
៣. ផ្ដល់ក្ដីស្រឡាញ់ដល់សត្វចិញ្ចឹម ៖ ជារឿយៗកុមារចូលចិត្តធ្វើអំពីល្អជាមួយសត្វចិញ្ចឹមរបស់ពួកគេ។ ដូច្នេះ ប្រសិនបើអ្នកមានសត្វចិញ្ចឹមក្នុងផ្ទះ អ្នកអាចអនុញ្ញាតឱ្យកុមារ ជួយអ្នករៀបចំអាហារសម្រាប់សត្វ ឬធ្វើកិច្ចការផ្សេងៗ ដែលពាក់ព័ន្ធនឹងការមើលថែសត្វចិញ្ចឹមជាដើម។ ក្រៅពីជួយឱ្យផ្លូវចិត្តកុមារល្អប្រសើរ សកម្មភាពនេះ ក៏ធ្វើឱ្យកុមាររីកចម្រើនបញ្ញាផ្នែកអារម្មណ៍ (EQ) ផងដែរ។
៤. ជូនអំណោយនរណាម្នាក់ ៖ ការផ្ដល់អំណោយដល់អ្នកដទៃ ជាចំណែកមួយជួយឱ្យកុមារសប្បាយចិត្ត និងយល់កាន់តែស៊ីជម្រៅអំពីតម្លៃនៃអំពើល្អ។ អ្នកអាចលើកទឹកចិត្តកូនរបស់អ្នក ឱ្យផ្ដល់អំណោយ ឬកាដូដល់អ្នកដទៃ ដោយសាររបស់ទាំងនោះ អាចជារបស់សាមញ្ញ ដែលពួកគេអាចធ្វើបាន ដូចជា រូបគំនូរ ការបត់រូបសត្វ ឬសម្ភារៈផ្សេងៗ។
៥. និយាយសរសើរ ៖ ការនិយាយសរសើរ ឬប្រើភាសាល្អៗ ទៅកាន់អ្នកដទៃ ក៏ជាផ្នែកមួយនៃការបង្ហាញសេចក្ដីសប្បុរស ឬអំពើល្អដែរ។ ឪពុកម្ដាយ អាចនិយាយភាសាទាំងនេះទៅកាន់កូន ដើម្បីឱ្យពួកគេ អាចអនុវត្តតាម និងនិយាយភាសានេះ ទៅកាន់អ្នកដទៃ ឬមនុស្សជុំវិញខ្លួន។ ឧទាហរណ៍ ៖ អ្នកអាចនិយាយថា ថ្ងៃនេះអ្នកពិតជារៀបចំខ្លួនបានស្អាតណាស់, ប៉ា/ម៉ាក់ ចូលចិត្តការងាររបស់កូន ឬសក់របស់អ្នក មើលទៅស្អាតណាស់ជាដើម៕
