ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កូនៗរបស់អ្នក គឺជាអ្នកវិទ្យាសាស្ត្រជំនាន់ថ្មី ដែលធម្មជាតិបានផ្ដល់ឱ្យផែនដី ។ នៅក្នុងវ័យមុនចូលរៀនថ្នាក់មត្តេយ្យសិក្សា ពួកគេមានលក្ខណៈពិសេសមួយគឺ ចង់ដឹងចង់យល់ពីធម្មជាតិ ។ ពួកគេចូលចិត្តសាកល្បងអ្វីដែលថ្មី ចូលចិត្តពិសោធន៍ និងរៀនតាមរយៈការអនុវត្តជាក់ស្ដែង។ លក្ខណៈពិសេសនេះ គឺជាដើមទន់ធ្វើឱ្យពួកគេអាចមានសមត្ថភាពសង្កេតដោយខ្លួនឯងបាន នៅពេលពួកគេចូលរៀនថ្នាក់មត្តេយ្យ។
បើទោះជាកម្មវិធីសិក្សារបស់សាលានីមួយៗអាចមានភាពខុសគ្នាក៏ដោយ អ្នកនៅតែអាចបង្រៀនកូនរបស់អ្នកឱ្យយល់ពីមូលដ្ឋានគ្រឹះនៃការពិសោធន៍វិទ្យាសាស្តសំខាន់ៗមួយចំនួនដូចជា៖
- វិទ្យាសាស្ត្ររូបវន្ត (គីមីវិទ្យា, រូបវិទ្យា, និងតារាសាស្ត្រ)
- វិទ្យាសាស្ត្រផែនដី (អាកាសធាតុ, រដូវ, ភព, និងប្រព័ន្ធព្រះអាទិត្យ)
- វិទ្យាសាស្ត្រជីវិត (សិក្សាពីមនុស្ស, រុក្ខជាតិ, និងសត្វ)
ខាងក្រោមនេះ ជាមេរៀនសំខាន់ៗចំនួន៥ ដែលអ្នកអាចបង្រៀនអ្នកវិទ្យាសាស្ត្រជំនាន់ថ្មីរបស់អ្នកនៅផ្ទះបាន៖
១. អាកាសធាតុ និងរដូវ ៖ កុមារថ្នាក់មត្តេយ្យផ្ដើមស្វែងយល់ពីផែនដី ដោយសង្កេតមើលបាតុភូតធម្មជាតិ ដែលពួកគេជួបប្រទះរាល់ថ្ងៃ។ អ្នកអាចប្រាប់ ឬពន្យល់ពួកគេអំពីការផ្លាស់ប្ដូររដូវ អានរឿងអំពីអាកាសធាតុ និងពេលវេលាខុសៗគ្នានៃថ្ងៃជាដើម។ នេះប្រហែលជាពេលមួយ ដែលពួកគេអាចយល់អំពីអាកាសធាតុ និងលក្ខណៈផែនដី ដូចជា បញ្ហាខ្យល់ព្យុះ គ្រោះរញ្ជួយដី និងបន្ទុះភ្នំភ្លើងជាដើម។
២. បង្ហាញពីលក្ខណៈរាងកាយ ៖ កុមារតូចៗចង់ដឹងចង់ឮបន្ថែមអំពីរាងកាយរបស់គេ ។ ដូច្នេះ ការសិក្សា «អំពីខ្លួនឯង» គឺជាប្រធានបទដ៏ល្អមួយ ដែលអ្នកអាចបង្រៀនកូនៗ ។ តាមរយៈការពន្យល់អំពីវិទ្យាសាស្ត្រជីវិតនេះ ពួកគេនឹងចាប់ផ្ដើមចេះសង្កេតមើលភាវៈរស់លូតលាស់ និងការអភិវឌ្ឍផងដែរ។
៣. ពន្យល់អំពីសត្វ និងរុក្ខជាតិ ៖ នៅក្នុងថ្នាក់មត្តេយ្យសិក្សា កុមារនឹងសិក្សាអំពីសត្វ និងរុក្ខជាតិនៅលើផែនដី។ ដូច្នេះ អ្នកអាចបង្រៀនពួកគេអំពីការប្រៀបធៀប និងតម្រៀបសត្វប្រភេទសត្វ ដោយផ្អែកលើការចាត់ថ្នាក់ដូចជា ថនិកសត្វ សត្វថ្នាក់ល្មូន និងបក្សី។
៤. បង្ហាញលក្ខណៈសម្ភារៈ ៖ ជាផ្នែកមួយនៃការសិក្សាអំពីពិភពរូបវន្ត កុមារត្រូវចេះពន្យល់អំពីអ្វីៗដែលនៅជុំវិញខ្លួនគេ ។ ពួកគេនឹងប្រើញាណរបស់គេ ដើម្បីកំណត់អត្តសញ្ញាណវត្ថុ និងពិពណ៌នារបស់ទាំងនោះដោយប្រើពាក្យដូចជា ភ្លឺ រលោង រដិបរដុប ទន់ និងរឹងជាដើម។
៥. បង្ហាត់ជំនាញពិសោធន៍ ៖ ថ្នាក់វិទ្យាសាស្ត្រកម្រិតមត្តេយ្យ ជាដំណាក់កាលមួយដែលត្រូវណែនាំកុមារឱ្យស្គាល់ជំនាញវិទ្យាសាស្ត្រមូលដ្ឋាន ដែលពួកគេអាចប្រើពេញមួយជីវិត។ ជំនាញទាំងនោះរួមមាន៖
- ការសង្កេត
- ការព្យាករណ៍
- ការតេស្តសាកល្បង
- ការវាយតម្លៃ
តាមរយៈការជំរុញ និងបង្ហាញអំពីវិធីអនុវត្តជំនាញទាំងនេះនៅផ្ទះ នឹងធ្វើឱ្យកុមារមានសមត្ថភាព ព្យាករណ៍អំពីអ្វីដែលអាចកើតឡើង ហ៊ានសាកល្បង និងពិសោធន៍ ព្រមទាំងចេះគិតប្រកបដោយភាពប្រុងប្រយ័ត្ន៕
