ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ៖ ខណៈជំងឺផ្លូវដង្ហើមកូវីដ-19 កំពុងរីករាលដាលនៅក្នុងសហគមន៍ សាលារៀនស្ទើរតែទាំងអស់នៅប្រទេសកម្ពុជា បានជ្រើសរើសយកមធ្យោបាយសិក្សាពីចម្ងាយតាមប្រព័ន្ធអ៊ីនធឺណេត ឬរៀនតាមអនឡាញ ជំនួសឱ្យការរៀនផ្ទាល់ក្នុងថ្នាក់។ មធ្យោបាយសិក្សារបៀបថ្មីនេះ ជាជំនួយដ៏សំខាន់ដែលសិស្សានុសិស្សកំពុងអនុវត្តន៍។
កញ្ញា អាត វួចណេង ជានិស្សិតឆ្នាំទី2 នៃវិទ្យាស្ថានហិរញ្ញវត្ថុ និងគណនេយ្យ បាននិយាយថា
“ការសិក្សាតាមអនឡាញមានភាពងាយស្រួល លឿនរហ័ស និងចំណេញថវិកា“
កញ្ញា អាត វួចណេង
តាមរយៈបទពិសោធន៍សិក្សារបស់ខ្លួន វួចណេង យល់ថា សិស្សានុសិស្សជួបការលំបាកច្រើន ប្រសិនបើរៀននៅក្នុងសាលា។
“រៀនតាមប្រព័ន្ធអ៊ីនធឺណេត សិស្សមិនបាច់ចំណាយពេលច្រើន មិនចាំបាច់ចំណាយលុយសម្រាប់ការធ្វើដំណើរទៅមក ហើយមិនចំណាយពេលរៀបចំខ្លួន ឬស្លៀកពាក់ឯកសណ្ឋានទេ ព្រោះរៀននៅផ្ទះដោយផ្ទាល់តែម្ដង”
កញ្ញា អាត វួចណេង
និស្សិតសិក្សាជំនាញហិរញ្ញវត្ថុ និងគណនេយ្យ រូបនេះ បានបន្តរៀបរាប់ទៀតថា តាមរយៈការរៀនតាមប្រព័ន្ធអនឡាញ សិស្សអាចបង្កើនចំណេះដឹង និងជំនាញសិក្សាថ្មីៗបន្ថែម ដើម្បីពង្រឹងសមត្ថភាពនិងប្រសិទ្ធិភាពសិក្សា។
“ពួកគេចាប់ផ្ដើមយល់ដឹង និងបន្សាំខ្លួនជាមួយនឹងការប្រើប្រាស់បច្ចេកវិទ្យាបានយ៉ាងមានប្រសិទ្ធិភាពដូចជា ការប្រើប្រាស់កម្មវិធី និងគេហទំព័រផ្សេងៗ ជាដើម។ ម្យ៉ាងវិញទៀតសិស្សានុសិស្សអាចស្រាវជ្រាវមេរៀនដោយខ្លួនឯងបានកាន់តែច្រើន ដោយមិនពឹងពាក់ទាំងស្រុងលើការបង្រៀនរបស់លោកគ្រូអ្នកគ្រូ”
កញ្ញា អាត វួចណេង
ទាក់ទងនឹងការប្រើប្រាស់មធ្យោបាយសិក្សាតាមអនឡាញនេះ យុវជន ម៉េងឈាង សិស្សថ្នាក់ទី12 នៃវិទ្យាល័យបាក់ទូក ក៏បានឲ្យដឹងដែរថា សិក្សាតាមអនឡាញផ្តល់ប្រយោជន៍យ៉ាងច្រើនដល់រូបគេ ជាពិសេសសុវត្ថិភាពផ្នែកសុខភាពនៅក្នុងដំណាក់កាលជំងឺកូវីដ-19 ការរីករាលដាលជាសកលនេះ។
ម៉េងឈាង បានបញ្ជាក់ថា ៖
“បច្ចុប្បន្នប្រទេសយើងកំពុងស្ថិតនៅក្នុងបរិបទកូវីដ-19 ដូច្នេះការសិក្សាគឺនៅផ្ទះ។ ខ្ញុំប្រាកដក្នុងចិត្តថា យើងមិនឆ្លងជំងឺពីអ្នកដទៃ ហើយអ្នកដទៃក៏មិនចម្លងមេរោគខ្ញុំវិញ”
ម៉េងឈាង
សិស្សថ្នាក់ទី12 រូបនេះបានបន្ថែមទៀតថា រៀនតាមអនឡាញនៅផ្ទះ ជួយកាត់បន្ថយការកកស្ទះចរាចរណ៍ ព្រមទាំងកាត់បន្ថយការបំពុលបរិយាកាសដែលកើតពីផ្សែងឡាន-ម៉ូតូ។
ជាការកត់សម្គាល់ ខណៈកម្ពុជាកំពុងប្រឈមមុខនឹងការរាតត្បាតនៃជំងឺកូវីដ-19 លោកគ្រូអ្នកគ្រូនិងសិស្សានុសិស្ស បានជ្រើសរើសមធ្យោបាយរៀននិងបង្រៀនតាមប្រព័ន្ធអនឡាញជាដំណោះស្រាយ។ មធ្យោបាយសិក្សាថ្មីនេះ បានកាត់បន្ថយការជួបជុំដោយផ្ទាល់ រក្សាសុវត្ថិភាពសុខភាព និងគោរពតាមវិធានការណ៍របស់ក្រសួងសុខាភិបាល។
ឯកឧត្តមបណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា មានប្រសាសន៍ក្នុងវេទិកាអប់រំតាមប្រព័ន្ធអេឡិចត្រូនិក លើកទីមួយនៅកម្ពុជា កាលពីថ្ងៃទី 03 ខែធ្នូ ឆ្នាំ2020 ថា ការសិក្សាតាមប្រព័ន្ធអនឡាញជាចំណែកសំខាន់ក្នុងលើកកម្ពស់វិស័យអប់រំនៅកម្ពុជា។
ឯកឧត្តមបណ្ឌិត សាន វឌ្ឍនា បានបញ្ជាក់ថា ៖
“ការរៀនតាមប្រព័ន្ធអនឡាញ មិនមែនជាឧបសគ្គតាមរយៈកង្វះខាតឧបករណ៍ ឬក៏កង្វះខាតប្រព័ន្ធអ៊ីនធឺណេតទៀតទេ ប៉ុន្តែវាជាការសម្រេចចិត្តរបស់ប្អូនៗនីមួយៗ។ ខ្ញុំសូមលើកទឹកចិត្តកុំឲ្យប្អូនៗទាំងអស់មើលឃើញការរៀនអនឡាញនេះជាឧបសគ្គតទៅទៀត។ សូមប្អូនៗចាប់យកឱកាសនេះ ហើយប្រើប្រាស់វាជាជម្រើសសម្រាប់ផ្លូវដើរទៅថ្ងៃអនាគតវិញ។ ការអប់រំបែបឌីជីថលពុំមែនជាជំរើសទៀតទេ ប៉ុន្តែជាផ្លូវដើរទៅថ្ងៃអនាគត ដូច្នេះហើយយើងត្រូវសម្របខ្លួនជាមួយបរិបទថ្មីនៃការអបរំនេះ”
ឯកឧត្តមបណ្ឌិត សាន វឌ្ឍនា
សូមជម្រាបថា កន្លងទៅក្រសួងអប់រំ យុវជន និងកីឡា បានបង្កើតកម្មវិធីរៀន និងបង្រៀនតាមបែបឌីជីថលដល់សិក្សានុសិស្ស និងបុគ្គលិកសិក្សា នៅក្នុងបរិបទនៃការរីករាលដាលជាសកលជំងឺផ្លូវដង្ហើមកូវីដ-19។ ឯកឧត្តមរដ្ឋមន្ត្រីក្រសួងអបរំ យុវជន និងកីឡា ក៏ធ្លាប់បានលើកឡើងដែរថា ការរៀនតាមបែបឌីជីថលនៅកម្ពុជាបច្ចុប្បន្ន ដើរលឿនទៅមុខដប់ឆ្នាំ លើសពីការរំពឹងទុកក្រសួង៕
ជីវប្រវត្តិ: កញ្ញា សៅ សុធារ៉ា កំពុងសិក្សាផ្នែកប្រព័ន្ធផ្សព្វផ្សាយនិងសារគមនាគមន៍ នៅសាកលវិទ្យាល័យភូមិន្ទភ្នំពេញ។ កញ្ញាធ្លាប់ជាអ្នកសរសេរអត្ថបទជាភាសាខ្មែរ និងបកប្រែឲ្យស្ថាប័នឯកជនមួយកន្លែង។ បច្ចុប្បន្ន សុធារ៉ា ជាអ្នកយកការព័ត៌មានអប់រំឲ្យសារព័ត៌មាន AMS Education។
របាយការណ៍សំខាន់
ព័ត៌មានទូទៅ
កម្ពុជា បង្ហាញអាទិភាព៤ចំណុច ក្នុងការអភិវឌ្ឍធនធានមនុស្សសម្រាប់អនាគត
ក្រសួងអប់រំ បណ្តុះបណ្តាលគ្រូ២រយនាក់ លើជំនាញអប់រំបង្កើតហ្គេម
ឆ្លើយតបតម្រូវការឧស្សាហកម្មទំនើប រដ្ឋមន្រ្តីក្រសួងការងារ ជំរុញវិស័យឯកជន សហការជាមួយរាជរដ្ឋាភិបាល លើការបណ្តុះបណ្តាល TVET
វិធីសាស្រ្តធម្មជាតិ ៧ យ៉ាង ដើម្បីកាត់បន្ថយអាការតឹងច្រមុះ
រៀនថ្នាក់សញ្ញាបត្របច្ចេកទេស និងវិជ្ជាជីវៈ១ ឥតគិតថ្លៃ ចំនួន១៨០កន្លែង នៅវិទ្យាស្ថានពហុបច្ចេកទេសខេត្តព្រះវិហារ
ឯកឧត្តម ហ៊ុន ម៉ានី លើកទឹកចិត្តយុវជនផលិតមាតិកាវប្បធម៌ ជាសិល្បករឌីជីថល ផ្សព្វផ្សាយ និងការពារតម្លៃវប្បធម៌ខ្មែរ
ក្រសួងអប់រំធ្វើកំណែទម្រង់កម្មវិធីសិក្សា និងសៀវភៅសិក្សា ដើម្បីលើកកម្ពស់លទ្ធផលតេស្ត PISA
តើការទទួលទានទឹកក្តៅឧណ្ហៗ ផ្តល់ផលល្អដល់សុខភាព និងការរំលាយអាហារ ?
អាហារូបករណ៍ ICCR ទៅសិក្សានៅប្រទេសឥណ្ឌា ឆ្នាំសិក្សា២០២៦-២០២៧
អ្នកនាំពាក្យ ៖ និស្សិតកម្ពុជាជាង២០០នាក់ កំពុងចុះកម្មសិក្សានៅអ៊ីស្រាអ៊ែល មានសុវត្ថិភាព ខណៈនិស្សិត ៤នាក់ជាប់គាំងនៅឌូបៃ
កម្មវិធីពិសេសរបស់ AMS EDUCATION
ព័ត៌មានសង្ខេប
