ក្នុងករណីកំពុងគិតអំពីការពន្លឿនផលិតភាពសម្រាប់ឆ្នាំថ្មី ជាដំបូងគួរផ្តោតការចាប់អារម្មណ៍ពាក់ព័ន្ធនឹងជំនាញទន់​ ដែលភាគច្រើនមានភាពប្រទាក់ក្រឡាទៅនឹងភាពជាអ្នកដឹកនាំ​ ជាពិសេសក្នុងទំនួលខុសត្រូវផ្ទាល់ខ្លួន។ ផលិតភាព​ ជាជំនាញដែលគេនិយាយគ្នាស្ទើរតែរាល់ឆ្នាំ និងរាល់ពេល​ ជាពិសេសនៅពេលប្រាថ្នាសម្រេចគោលដៅ ឬក៏ការដាក់នូវក្ដីរំពឹងណាមួយ មិនថាការសិក្សា ឬការងារ។ តាមរយៈគេហទំព័រ​ Inc បានឱ្យដឹងថា ការបង្កើនផលិតភាព​ មិនគួររំលងចំណេះដឹងមូលដ្ឋានគ្រឹះ ទោះបីមើលទៅមានភាពសាមញ្ញ​ ហើយខាងក្រោមជាជំនាញបង្កើតផលិតភាពដែលអ្នកគួរដឹងនៅក្នុងឆ្នាំ២០២៥។

១. ការផ្ទេរមុខងារ ៖​ ការបែងចែក​ ឬការផ្ទេរមុខងារ ទំនួលខុសត្រូវ​ គឺជាចំណែកសំខាន់ចំពោះសហគ្រិនទាំងឡាយ ការរៀនសូត្រអំពីរបៀប នៃការផ្ទេរប្រភេទការងារ គឺមានភាពចំបាច់ត្រូវតែអនុវត្តន៍ឱ្យបាន។ ការផ្ទេរភារកិច្ចទទួលខុសត្រូវ​ មិនមែនបានន័យថា បង្ហាញពីភាពកម្សោយរបស់ខ្លួន ឬក៏អត់សមត្ថភាពក្នុងការគ្រប់គ្រងស្ថានការណ៍នោះទេ ប៉ុន្តែវាបានបង្ហាញពីការគិតគូរយ៉ាងហ្មត់ចត់តាមរយៈការជ្រើសរើសធនធានមកប្រើប្រាស់។

២. ការចាត់តាំងអ្វីទៅជាអាទិភាព​ ៖​ ការចាត់ចែងការងារ ទៅតាមអាទិភាព​ គឺជាកត្តានាំឱ្យជៀសនូវភាពខកខានក្នុងការបំពេញភារកិច្ចសំខាន់ៗ ហើយការបែងចែកទៀតសោត ត្រូវរកឱ្យឃើញថា អ្វីខ្លះជាកិច្ចការសំខាន់ៗ និងប្រញាប់ខ្លាំង? យ៉ាងណាមិញ ជាគន្លឹះដោះស្រាយនឹងចំណោទបញ្ហាមួយនេះ សូមអង្គុយចុះហើយសួរខ្លួនឯងថា តើក្នុងមួយថ្ងៃនេះសកម្មភាពអ្វីដែលខ្ញុំត្រូវធ្វើឱ្យបាន? ឬក៏សួរថា តើការងារអ្វីដែលមិនអាចរង់ចាំដល់ថ្ងៃស្អែកបាន? ភាពសំខាន់ និងបន្ទាប់ហាក់មានភាពច្រឡំគ្នា ហើយមានតែបុគ្គល ឬក្រុមនីមួយៗប៉ុណ្ណោះ​ ទើបអាចវិភាគបានថា តើអ្វីទៅជាចំណែកអាទិភាព។ ការកំណត់អាទិភាពទៀតសោត បើអាចធ្វើទុកមុនឱ្យបានមួយថ្ងៃ ឬមួយសប្តាហ៍ មួយខែ ឬក៏មួយឆ្នាំ រឹងរឹតតែប្រសើរ។

៣. ការប្រាស្រ័យទាក់ទង ៖ ការប្រាស្រ័យទាក់ទងមានច្រើនរបៀប ដូច្នេះត្រូវរើសវិធីសាស្រ្តមួយ ដែលយល់ថាមានភាពងាយស្រួល​ ឬក៏ភាពលេចធ្លោចំពោះខ្លួនឯង។ ហើយក្នុងការប្រាស្រ័យទាក់ទងនាពេលបច្ចុប្បន្នមានចម្រុះបែបដូចជា ការហៅទូរស័ព្ទនិយាយឆ្លើយឆ្លង ការផ្ញើសារ ឬអ៊ីមែល និងកាន់តែមានប្រសិទ្ធភាពនោះ គឺការណាត់ជួបផ្ទាល់និយាយគ្នាផ្ទាល់ៗតែម្តង។ បន្ថែមពីនោះ ដើម្បីអភិវឌ្ឍន៍ដំណើរប្រាស្រ័យទាក់ទង គឺចាប់ផ្តើមសកម្មភាព ពីថ្ងៃនេះតាមរយៈការមានទម្លាប់ស្តាប់ដ៏សកម្ម មានគោលបំណង មានការឆ្លើយតប និងការជំរុញឱ្យមានការចូលរួមពីគ្រប់ភាគីទាំងអស់។

៤. ត្រិរិះពិចារណា ៖ ការគិតបែបស៊ីជម្រៅ​ ឬក៏ការវិភាគពិចារណា ក៏ត្រូវបានជជែកជាច្រើនឆ្នាំមកហើយ តែយ៉ាងដើម្បីរក្សាគោលជំហរ ឬក៏ការវិភាគនៅត្រង់ចំណុចនេះ គួរឧស្សាហ៍កត់សម្គាល់លទ្ធផលដែលបានដៅទុក ឬក៏របៀបនៃការគ្រប់គ្រងការងារ ការធ្វើផែនការ និងការវាយតម្លៃជាដើម។

៥. ការគ្រប់គ្រងពេលវេលា ៖ ការគ្រប់គ្រងពេលវេលា មិនមែនសំដៅតែលើការសម្លឹងមើលទៅនាឡិកាមួយមុខនោះទេ ប៉ុន្តែវាពាក់ព័ន្ធយ៉ាងស៊ីជម្រៅអំពីការកំណត់កាលវិភាគដែល មានរយៈពេលជាក់លាក់ទៅក្នុងសកម្មភាពនីមួយៗ រួមទាំងការតាមដានជាប្រចាំឱ្យច្បាស់ថា តើការខិតខំប្រឹងប្រែងពិតជាបានផ្តល់ផលវិជ្ជមានពិតប្រាកដទេ? ការគ្រប់គ្រងពេលវេលា​ គឺការកំណត់ផែនការត្រូវតែមានការឆ្លើយតបចំពោះភាពរីកចម្រើន៕