ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការប្រឡង មិនត្រឹមតែជាពេលវេលាដ៏តានតឹងសម្រាប់សិស្សានុសិស្សប៉ុណ្ណោះទេ ប៉ុន្តែក៏ជាសមរភូមិផ្លូវចិត្តសម្រាប់មាតាបិតាគ្រប់រូបផងដែរ។ ការរំពឹងទុកខ្ពស់លើលទ្ធផលសិក្សាអាចបង្កើតជាសម្ពាធដោយមិនដឹងខ្លួន ដែលធ្វើឱ្យកូនៗជួបប្រទះនូវវិបត្តិផ្លូវចិត្ត និងការភ័យខ្លាច។ យោងតាមគោលការណ៍អប់រំបែបវិជ្ជមាន (Positive Parenting) ការជួយកូនៗឱ្យទទួលបានជោគជ័យ មិនមែនជាការដាក់សម្ពាធឱ្យពួកគេទទួលបាននិទ្ទេសល្អឥតខ្ចោះនោះទេ ប៉ុន្តែគឺការកសាងកម្លាំងចិត្ត និងសុខភាពផ្លូវចិត្តដ៏រឹងមាំ។
ខាងក្រោមនេះជាវិធីសាស្ត្រគន្លឹះ និងការអនុវត្តបែបវិជ្ជមាន ដែលមាតាបិតាគ្រប់រូបគួរស្វែងយល់ ដើម្បីជ្រោមជ្រែងកូនៗឱ្យឆ្លងកាត់រដូវកាលប្រឡងដោយទំនុកចិត្ត៖
១. សរសើរពីការខិតខំប្រឹងប្រែង ជាជាងលទ្ធផល
នៅពេលអ្នកកោតសរសើរចំពោះការអត់ធ្មត់ វិន័យក្នុងការរំលឹកមេរៀន និងការព្យាយាមកម្ចាត់ភាពខ្ជិលច្រអូស កូនៗនឹងយល់ថា តម្លៃពិតប្រាកដរបស់ពួកគេស្ថិតលើ «ការព្យាយាម» មិនមែននៅលើក្រដាសពិន្ទុឡើយ។ ការធ្វើបែបនេះ ជួយកាត់បន្ថយការភ័យខ្លាចចំពោះបរាជ័យបានយ៉ាងច្រើន។
២. បង្កើតបរិយាកាសស្ងប់ស្ងាត់ និងកក់ក្តៅនៅក្នុងផ្ទះ
ផ្ទះគួរតែជា «ជម្រកសុវត្ថិភាព» មិនមែនជាថ្នាក់រៀនទីពីរដែលពោរពេញដោយការដេញដោលនោះទេ។ មាតាបិតាអាចជួយកូនបានតាមរយៈការរៀបចំកន្លែងសិក្សាឱ្យមានភាពស្ងប់ស្ងាត់ រៀបចំអាហារដែលមានអាហាររូបត្ថម្ភល្អៗ និងមើលថែទម្លាប់នៃការគេងរបស់ពួកគេឱ្យបានគ្រប់គ្រាន់។ ការហុចទឹកមួយកែវ ឬការរៀបចំអាហារសម្រន់ដែលកូនចូលចិត្ត គឺជាការបង្ហាញក្តីស្រលាញ់ដ៏មានន័យ និងកាត់បន្ថយភាពតានតឹងបានភ្លាមៗ។
៣. ជៀសវាងការប្រៀបធៀបដាច់ខាត
ការប្រៀបធៀបសមត្ថភាពកូនទៅនឹង «កូនគេ» ឬបងប្អូនបង្កើត គឺជាអាវុធដ៏មុតស្រួចដែលបំផ្លាញទំនុកចិត្តរបស់កូន។ យោងតាមទ្រឹស្តី Positive Parenting កូនម្នាក់ៗមានចង្វាក់នៃការលូតលាស់ និងទេពកោសល្យផ្ទាល់ខ្លួន។ ការប្រៀបធៀបមិនបានធ្វើឱ្យកូនប្រឹងប្រែងជាងមុននោះទេ ប៉ុន្តែវាបង្កើតនូវការឈឺចាប់ ភាពសង្ស័យលើសមត្ថភាពខ្លួនឯង និងធ្វើឱ្យពួកគេបាក់ទឹកចិត្តយ៉ាងធ្ងន់ធ្ងរ។
៤. ធ្វើជាអ្នកស្តាប់ដ៏ល្អ ដោយក្តីយល់ចិត្ត
នៅពេលកូនបង្ហាញអារម្មណ៍ភ័យខ្លាច តានតឹង ឬរអ៊ូរទាំថា «មេរៀនពិបាកណាស់» កុំប្រញាប់ប្រញាល់ស្តីបន្ទោស ឬទូន្មានមេរៀនជីវិតវែងឆ្ងាយ។ អ្វីដែលពួកគេត្រូវការនៅពេលនោះ គឺអ្នកស្តាប់ដែលយល់ចិត្ត។ ការឱបយ៉ាងកក់ក្តៅ រួមជាមួយនឹងពាក្យសម្តីសាមញ្ញៗដូចជា «ប៉ាម៉ាក់យល់ថាវាពិបាក ប៉ុន្តែប៉ាម៉ាក់ជឿជាក់លើកូន ហើយនឹងនៅក្បែរកូនជានិច្ច» អាចជាឱសថសម្រួលផ្លូវចិត្តដ៏មានប្រសិទ្ធភាពបំផុត។
៥. បញ្ជាក់ពីក្តីស្រឡាញ់ដោយគ្មានលក្ខខណ្ឌ
ចំណុចដ៏សំខាន់បំផុតដែលមាតាបិតាត្រូវបញ្ជាក់ឱ្យកូនបានដឹងមុនថ្ងៃប្រឡងមកដល់ គឺ «តម្លៃរបស់កូនមិនស្ថិតនៅលើក្រដាសប្រឡងឡើយ»។ ក្តីស្រឡាញ់ និងមោទនភាពរបស់គ្រួសារចំពោះពួកគេ មិនអាស្រ័យលើនិទ្ទេស ឬលទ្ធផលចាញ់ឈ្នះនោះទេ។ នៅពេលកូនៗដឹងថា ពួកគេមានមាតាបិតារង់ចាំទទួលដោយក្តីស្រឡាញ់ដោយគ្មានលក្ខខណ្ឌ ទោះជាមានរឿងអ្វីកើតឡើងក៏ដោយ ពួកគេនឹងចូលបន្ទប់ប្រឡងដោយស្មារតីប្រកបដោយភាពក្លាហាន និងផ្លូវចិត្តស្ងប់ស្ងាត់៕
