ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
គិតត្រឹមខែតុលា ឆ្នាំ២០២៤ ជនមានពិការភាពសរុបចំនួន ៩៥០០នាក់ កំពុងតែបម្រើការងារនៅតាមក្រសួងស្ថាប័ន រដ្ឋ និងវិស័យឯកជនទូទាំងប្រទេស ដោយទទួលបានប្រាក់ចំណូល និងអត្ថប្រយោជន៍សង្គម ទៅតាមមុខតំណែងតួនាទី និងការងារស្របតាមសមត្ថភាព និងទេពកោសល្យរៀងៗខ្លួន។
របាយការណ៍របស់ក្រសួងសង្គមកិច្ច អតីតយុទ្ធជន និងយុវនីតិសម្បទា បានលម្អិតថា ក្នុងចំណោមជនមានពិការភាពទាំងជិត១ម៉ឺននាក់នោះ ពួកគេកំពុងតែធ្វើការនៅក្នុងក្រសួងស្ថាប័នរដ្ឋចំនួន ៣៨១៦នាក់ ក្នុងនោះស្រ្តីមានពិការភាពចំនួន ៨៨២នាក់ ជនមានពិការភាពកម្រិតធ្ងន់ចំនួន ២៣៥១នាក់ បើគិតជាភាគរយគឺស្មើនឹង ២,០៤%។ ដោយឡែកវិស័យឯកជនរួមមាន ធនាគារ គ្រឹះស្ថានមីក្រូហិរញ្ញវត្ថុ សណ្ឋាគារ និងរោងចក្រ ដែលបានចុះបញ្ជីកា និងទទួលបានវិញ្ញាបនបត្រលើការអនុវត្តច្បាប់ស្តីពីកិច្ចការពារ និងលើកកម្ពស់សិទ្ធិជនពិការទូទាំងប្រទេសមានចំនួន ២៨៧។ វិស័យឯកជនទាំងនោះ បានទទួលយកជនមានពិការភាពឱ្យចូលបម្រើការងារចំនួន ៥៦៨៤នាក់ ក្នុងនោះស្រ្តីមានពិការភាពចំនួន ៣៥៧៨នាក់។
ក្នុងសារលិខិតអបអរទិវាជនមានពិការភាពកម្ពុជាលើកទី២៦ និងអន្តរជាតិលើកទី៤២ ក្រោមប្រធានបទ “បរិយាបន្នពិការភាពលើគ្រប់វិស័យក្នុងយុគសម័យបរិវត្តកម្មឌីជីថល” សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានកិត្តិយសក្រុមប្រឹក្សាសកម្មភាពជនពិការ បានបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលក្នុងការលើកកម្ពស់សុខុមាលភាព និងសិទ្ធិជនមានពិការភាពគ្រប់រូប ដោយមិនមានការរើសអើង ពណ៌សម្បុរ សាសនា ឋានៈ និងនិន្នាការនយោបាយណាមួយឡើយ។
សម្តេចធិបតីបានលើកឡើងថា កាលពីឆ្នាំ២០២៣ វិស័យពិការភាពនៅកម្ពុជាទទួលបានជោគជ័យដ៏ត្រចះត្រចង់ ជាមួយភាពល្បីរន្ទឺលើឆាកជាតិ និងអន្តរជាតិ ក្នុងការធ្វើជាម្ចាស់ផ្ទះរៀបចំព្រឹត្តិការណ៍សំខាន់ៗជាប្រវត្តិសាស្រ្តចំនួន៣ គឺ ទី១.ជោគជ័យក្នុងការរៀបចំកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២, ទី២.ការរៀបចំកីឡាជាតិលើកទី៣ និងកីឡាជនមានពិការភាពលើកទី១ និង ទី៣.ការរៀបចំសន្និសីទជនមានពិការភាពប្រចាំតំបន់អាស៊ី និងប៉ាស៊ីហ្វិកស្តីពីការអភិវឌ្ឍសហគមន៍ប្រកបដោយបរិយាបន្ន។ សម្តេចបញ្ជាក់ថា ជោគជ័យទាំង៣នេះ បានជំរុញកម្ពុជាឱ្យទទួលបានកិត្យានុភាពថ្មីៗបន្ថែមទៀតស្មើមុខ ស្មើមាត់ ជាមួយនឹងអន្តរជាតិ ជាពិសេសបានឆ្លុះបញ្ចាំងអំពីសក្តានុពល និងវឌ្ឍនភាព ការវិវត្តវិស័យពិការភាពនៅកម្ពុជា មិនចាញ់បណ្តាប្រទេសនានានៅក្នុងតំបន់ និងអន្តរជាតិឡើយ។
ដើម្បីចូលរួមអបអរសាទរទិវាជនមានពិការភាពកម្ពុជាលើកទី២៦ និងអន្តរជាតិលើកទី៤២ និងពិធីដាក់ឱ្យអនុវត្តផែនការយុទ្ធសាស្រ្តជាតិស្តីពីពិការភាពឆ្នាំ២០២៤-២០២៨ សម្តេចធិបតីបានធ្វើការអំពាវនាវដល់គ្រប់ក្រសួងស្ថាប័នទាំងអស់ ត្រូវខិតខំកសាងសមត្ថភាពមន្រ្តីរាជការរួមទាំងមន្រ្តីមានពិការភាពឱ្យចេះប្រើប្រាស់ឌីជីថលនៅក្នុងសម័យកាលថ្មីនេះ ដើម្បីជាប្រយោជន៍ដល់ការងាររបស់អង្គភាព និងសកម្មភាពរស់នៅប្រចាំថ្ងៃ។ គ្រប់ក្រសួងស្ថាប័ន អាជ្ញាធរគ្រប់ផ្នែក អង្គការដៃគូពាក់ព័ន្ធ និងវិស័យឯកជន ដែលមានការទទួលខុសត្រូវលើសំណង់អគារ និងទីធ្លាសាធារណៈនានា ត្រូវចាប់ផ្តើមកែសម្រួល ឬរៀបចំផាសុកវត្ថុសម្រាប់ជនមានពិការភាពនៅតាមសំណង់អគារ និងទីធ្លាសាធារណៈទាំងនោះ ដើម្បីឱ្យជនមានពិការភាពគ្រប់ប្រភេទអាចចេញចូលចុះឡើង និងប្រើប្រាស់បាន ស្របតាមច្បាប់ស្តីពីកិច្ចការពារ និងលើកកម្ពស់សិទ្ធិជនពិការ ដោយឈរលើបទដ្ឋានបច្ចេកទេសហេដ្ឋារចនាសម្ព័ន្ធរូបវន្តបង្កលក្ខណៈងាយស្រួលសម្រាប់ជនមានពិការភាព។
ក្រសួងសុខាភិបាល និងក្រសួងសាធារណការ និងដឹកជញ្ជូន ត្រូវបន្តសហការគ្នាឱ្យបានល្អជាមួយក្រសួងសង្គមកិច្ច អតីតយុទ្ធជន និងយុវនីតិសម្បទា ដើម្បីផ្តល់បណ្ណបើកបរដល់ជនមានពិការភាពដោយគ្មានឧបសគ្គ ឬការរើសអើងអ្វីឡើយ ឱ្យស្របតាមប្រកាសអន្តរក្រសួង ស្តីពីលក្ខខណ្ឌនៃការចេញបណ្ណបើកបរសម្រាប់ជនមានពិការភាព។ ក្រសួង ស្ថាប័ន អាជ្ញាធរពាក់ព័ន្ធនានា រួមទាំងវិស័យឯកជនដែលទទួលខុសត្រូវលើមធ្យោបាយដឹកជញ្ជូនសាធារណៈទាំងតាមផ្លូវគោក ផ្លូវទឹក និងផ្លូវអាកាស ត្រូវរៀបចំ ឬកែសម្រួលមធ្យោបាយដឹកជញ្ជូនសាធារណៈទាំងអស់នោះ ដើម្បីឱ្យជនមានពិការភាពអាចប្រើប្រាស់បាន។
សូមបញ្ជាក់ដែរថា បើតាមទិន្នន័យរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា បច្ចុប្បន្នប្រទេសកម្ពុជាមានពលរដ្ឋដែលមានពិការភាពចំនួន ៣៥១ ២៧៦នាក់ ក្នុងនោះស្រ្តីចំនួន ១៦៦ ០៣៤នាក់ ។ ជនមានពិការភាពទាំងជាង ៣៥ម៉ឺននាក់ ត្រូវបានកំណត់អត្តសញ្ញាណកម្មតាមរយៈជនបង្គោលឃុំ/សង្កាត់ទូទាំងប្រទេស ហើយបានផ្តល់បណ្ណសម្គាល់ជនមានពិការភាពបានចំនួន ២៥០ ៧៣០បណ្ណ៕
