ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការរុះរើទម្លាប់ចាស់ៗ ហើយផ្លាស់យកនូវទម្លាប់ថ្មីៗ ជាប្រធានបទមួយ ដែលយុវជនត្រូវការ ដើម្បីពន្លឿនការដើរឱ្យទាន់បច្ចុប្បន្នភាពនៃសង្គម។ ប្រយោជន៍ដែលទាញបានពីការកែច្នៃខ្លួនឯងឡើងវិញមានដូចជា ការអភិវឌ្ឍន៍ស្មារតីផ្ទាល់ខ្លួន វិសាលភាពនៃទស្សនៈ និងអាជីពការងារ សុភមង្គលនិងការបំពេញន័យឱ្យជីវិតទទួលយកភាពចម្រុះ សុខភាព និងសុខុមាលភាពទូទៅ។ ការអភិវឌ្ឍន៍ ឬក៏ការព្យាយាមកែច្នៃខ្លួនឯងអាចកាត់បន្ថយស្រ្តេស ជំរុញចិត្តឱ្យស្ងប់ មានតុល្យភាពជីវិត និងសម្រួលទៅកាន់សុខភាពផ្លូវកាយ និងផ្លូវចិត្ត ហើយការកែខៃខ្លួនឯង ក៏រាប់បញ្ចូលអំពីការសម្របខ្លួនជាមួយទម្លាប់ដែលផ្តល់នូវសុខភាពល្អ ទំនាក់ទំនងល្អ របបអាហារ ការហាត់ប្រាណបានទៀងទាត់ និងការរៀបកាលវិភាគ នៃការគេងបានត្រឹមត្រូវនិងទៀងទាត់។
ការកែច្នៃខ្លួនឯងឡើងវិញទៀតសោត មិនមែនមានន័យថា ត្រូវបំភ្លេចចោលរាល់ហេតុការណ៍ពីមុនៗ ឬក៏ការកាត់បន្ថយភាពឈឺចាប់នោះទេ ប៉ុន្តែជាការផ្តល់តម្លៃបន្ថែមចំពោះគោលដៅ និងភាពសុខដុមរមនាក្នុងការបំពេញបេសកកម្មជីវិត តាមរយៈការឆ្លុះបញ្ចាំងបទពិសោធន៍ចាស់ៗ ការពេញចិត្តជាមួយបច្ចុប្បន្នភាព ក៏ដូចជាការបោះចោលទម្លាប់ទាំងឡាយណាដែលពុំចម្រើនទៅកាន់ការអភិវឌ្ឍខ្លួន។ តាមរយៈគេហទំព័រ Calm បានបង្ហាញសកម្មភាព ៦ជំហាន ដែលអាចជំរុញឱ្យរក្សាស្មារតីក្នុងបច្ចុប្បន្នភាពក្នុងដំណើរជីវិត និងការកែច្នៃខ្លួនឯងឡើងវិញ។
១. អប់រំចិត្តជាប្រចាំ ៖ ទទួលបានការអប់រំចិត្តជាប្រចាំ ជាឱកាសក្នុងការជំរុញស្មារតី អាចស្ថិតក្នុងបច្ចុប្បន្នភាព និងជាច្រកមួយបើកឱកាសឱ្យសម្រេចបាននូវសេចក្ដីប៉ងប្រាថ្នា តាមរយៈការសមាធិជាប្រចាំ។ ជាមួយគ្នានោះ ការអនុវត្តសកម្មភាពអប់រំចិត្តបានទៀងទាត់ មិនត្រឹមតែជួយខ្លួនឯងឱ្យចេះរស់ក្នុងពេលបច្ចុប្បន្នប៉ុណ្ណោះទេ ប៉ុន្តែជាការពេញចិត្តចំពោះអ្វីដែលខ្លួនមាន រួមទាំងភាពជាក់លាក់នៃការផ្ចិតផ្ចង់ស្មារតីចំពោះភារកិច្ចដែលកំពុងតែធ្វើ។
២. សង្កេតស្ថានភាពផ្លូវចិត្ត និងគុណតម្លៃខ្លួនឯង ៖ ការទុកចន្លោះដើម្បីសញ្ជឹងគិតពីជីវិត ឬក៏របៀបរស់នៅប្រចាំថ្ងៃ ជាកត្តានាំឱ្យស្គាល់នូវគុណតម្លៃនៃការរស់នៅ ក៏ដូចជាកាត់បន្ថយអារម្មណ៍ច្របូកច្របល់។ ហើយដើម្បីសង្កេតស្ថានភាពផ្លូវចិត្ត និងគុណតម្លៃខ្លួនឯង គឺចាំបាច់ត្រូវចំណាយពេលខ្លះៗ ក្នុងមួយថ្ងៃៗដើម្បីឆ្លុះបញ្ចាំង ដោយការសរសេរកំណត់ហេតុ អំពីភាពភ័យខ្លាច សរសេរអំពីការរឭកដឹងគុណ សរសេរអំពីអ្វីដែលផ្តល់នូវក្ដីសង្ឃឹម និងការដាក់សំណួរបំផុសទៅកាន់ខ្លួនឯង ក៏ដូចជាការនិយាយជាមួយខ្លួនឯងឱ្យបានជាប្រចាំ ដែលសកម្មភាពទាំងនេះ នឹងជំរុញឱ្យយើងស្គាល់ពីអារម្មណ៍នៃខ្លួនឯង និងការអភិវឌ្ឍន៍ខ្លួនជារៀងរាល់ថ្ងៃ។
៣. កំណត់និយមន័យគោលដៅមួយដែលច្បាស់ថាទៅរួច ៖ ស្ថិតក្នុងពេលវេលាសមស្របមួយ គួរកំណត់គោលដៅដែលមានភាពជាក់លាក់ និងច្បាស់ថា អាចសម្រេចជាការបាន បន្ទាប់មកបង្កើតទម្លាប់ប្រចាំថ្ងៃដែលមានភាពពាក់ព័ន្ធនឹងទស្សនវិស័យនៃគោលដៅរបស់ខ្លួន។ មិនថាគោលដៅនោះបង្កើតឡើងសម្រាប់កិច្ចការផ្ទាល់ខ្លួន ឬក៏សម្រាប់អាជីពវិជ្ជាជីវៈនោះទេ ការកំណត់គោលដៅនិងទម្លាប់ដែលផ្តល់ការគាំទ្រចក្ខុវិស័យ គឺជាការពង្រីកមជ្ឈដ្ឋាននៃរីកចម្រើន។
៤. មានការផ្លាស់ប្តូរ ៖ ការផ្លាស់ប្តូរជាចំណុចដែលមិនអាចរំលងបានឡើយ កំឡុងពេលត្រូវការកែច្នៃខ្លួនឯង បំបែកការផ្លាស់ប្តូរ ដោយការបើកចិត្ត និងរក្សាផ្នត់គំនិតប្រកបដោយការបត់បែន។ បន្សាំខ្លួនបន្តិចម្តងៗឱ្យសម្រេចដំណើរការអ្វីមួយ មានភាពរលូន មិនថាការប្តូររបៀបធ្វើការ ឬក៏ការសាកល្បងបែបបទកំណត់ការរស់នៅប្រចាំថ្ងៃក្នុងវិធីថ្មីៗ។
៥. ភ្ជាប់ទំនាក់ទំនងជាមួយមនុស្សដែលផ្តល់ការគាំទ្រ ៖ នៅក្បែរមនុស្សដែលផ្តល់ការគាំទ្រ ផ្តល់ការបារម្ភ និងលើកទឹកចិត្តឱ្យអ្នកមានភាពរីកចម្រើនទៅមុខ ព្រោះការទទួលបានការគាំទ្រយ៉ាងពេញលេញ បានបង្កើនភាពកក់ក្តៅផ្នែកទស្សនៈវិស័យ និងការរកឃើញភាពខ្លាំងរបស់ខ្លួន។
៦. ចាប់ផ្តើមពីតូចៗ និងអបអរសាទរសមិទ្ធផលតូចៗ ៖ ចាប់ផ្តើមពីជំហានតូចៗ ដើម្បីឆ្ពោះទៅកាន់គោលដៅ និងសាទរចំពោះសមិទ្ធផល ដែលបានផលិត ទោះបីជាវាតូចតាចយ៉ាងណាក្ដី គួរចងចាំថា ដំណើរការនៃការផ្លាស់ប្តូរខ្លួនឯង គឺទទួលបានមកពីកិច្ចការតូចៗដោយការប្តេជ្ញាចិត្តបន្តធ្វើពីមួយពេលទៅមួយពេល។ ចូរកត់សម្គាល់រាល់គោលដៅប្រចាំថ្ងៃ និងបង្ហាញការដឹងគុណចំពោះអ្វីដែលបានអនុវត្តន៍កន្លងមក៕
