ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ទំនោររបស់មនុស្សក្នុងការរស់នៅ គឺចាំបាច់ត្រូវផ្សារភ្ជាប់គ្នាទៅវិញទៅមក សូម្បីការស្រាវជ្រាវ ក៏បានបង្ហាញដែរថា ទំនាក់ទំនងក្នុងសង្គមដើរតួនាទីសំខាន់ក្នុងការជំរុញបាននូវសុខភាពផ្លូវកាយ និងផ្លូវចិត្ត។ ប៉ុន្តែមិនមែនមានន័យថាមនុស្សត្រូវការប្រមូលផ្ដុំគ្នាគ្រប់ពេលឡើយ កាលដែលមានពេលវេលានៅម្នាក់ឯងខ្លះ ក៏ជាតម្រូវការមួយជួយឱ្យសុខភាពផ្លូវចិត្តពួកគេមានភាពប្រសើរឡើងដែរ។
មានមនុស្សនៅជុំវិញខ្លួន គឺអាចចាត់ទុកថាជារង្វាន់មួយដែលមិនអាចកាត់ថ្លៃបាន តែទន្ទឹមគ្នានោះ ពេលខ្លះវាក៏បង្កជាអាការស្រ្តេស មកជាមួយគ្នាដែរ។ ព្រោះនៅពេលដែលរុំព័ទ្ធជុំវិញដោយមនុស្សម្នាច្រើន ទោះចង់ឬមិនចង់ អ្នកចាំបាច់ត្រូវបញ្ចេញថាមពលមួយចំនួនដើម្បីយកចិត្តទុកដាក់លើភាពសមគួរ ការគិតរបស់អ្នកដទៃ និងការរក្សាអាកប្បកិរិយាឱ្យបានសមរម្យទៅតាមបរិយាកាសនីមួយៗ។ គេហទំព័រ verywellmind បានបង្ហាញអំពី អ្វីទៅជាអត្ថប្រយោជន៍ នៃការនៅម្នាក់ឯង? ពេលវេលាម្នាក់ឯង បានជួយសម្រួលខ្លួនឯងពីការទទួលរងសម្ពាធតាមរយៈសង្គមកំណត់ឱ្យ មានឱកាសផ្ដោតលើផ្នត់គំនិតផ្ទាល់ខ្លួន អារម្មណ៍ និងជាបទពិសោធន៍មួយដែលមិនគួរឱ្យចាប់អារម្មណ៍។ បន្ថែមពីនោះ នៅមានបីចំណុចសំខាន់ៗដូចខាងក្រោមដែលទទួលបានក្រោយពេលទុកចន្លោះនៅម្នាក់ឯង។
១. ការស្វែងរកខ្លួនឯង ៖ មានផាសុកភាពចំពោះទម្លាប់ និងពេលវេលាម្នាក់ឯង គឺជាឱកាសមួយជួយឱ្យអ្នកមានពេល និងសេរីភាពយ៉ាងជាក់លាក់ក្នុងការស្វែងរកសក្ដានុពលខ្លួនឯង។ បន្ថែមពីនោះ អាចជាវិធីមួយជួយជំរុញខ្លួនឯងឱ្យហ៊ានសាកល្បងថ្មីៗ មានពេលស្រាវជ្រាវប្រធានបទដែលស្របនឹងចំណូលចិត្តផ្ទាល់ខ្លួន បង្កើនចំណេះដឹងទូទៅ រួមទាំងការអនុវត្តន៍អ្វីដែលបានរៀនសូត្រកន្លងមក។
២. បង្កើនភាពច្នៃប្រឌិត ៖ ពេលវេលាម្នាក់ឯង ជាឱកាសដែលអនុញ្ញាតឱ្យខួរក្បាលផ្លាស់ប្ដូរ និងពង្រឹងភាពច្នៃប្រឌិតដោយមិនចាំបាច់ត្រូវព្រួយបារម្ភ ឬក៏ការជជែកឆ្លើយឆ្លងជាមួយបុគ្គលណាម្នាក់ និងអាចរក្សាគម្លាតពីឥទ្ធិពលសង្គមបានមួយរយៈ។
៣. ថាមពល ៖ មានការយល់ឃើញមួយចំនួនអំពីភាពអវិជ្ជមាន នៃការរស់នៅម្នាក់ឯង តែបើតាមការស្រាវជ្រាវ មនុស្សដែលទុកចន្លោះឱ្យមានពេលវេលាម្នាក់ឯង មានឱកាសរកនឹកឃើញនូវគំនិតសម្បូរបែបបានច្រើន។ ហើយទោះបីជាការរស់នៅម្នាក់ឯង អាចកាត់បន្ថយសម្ពាធនៃឥទ្ធិពលសង្គមបាន ប៉ុន្តែការនៅម្នាក់ឯង ជាទម្លាប់មួយដែលពុំងាយនឹងសម្របខ្លួនបានដោយងាយៗនោះដែរ ជាពិសេសអ្នកមិនធ្លាប់មានបទពិសោធន៍។ ដោយឡែក ចំពោះបុគ្គលដែលពិបាកក្នុងការផ្ចិតផ្ចង់ស្មារតី ងាយក្នុងការនិយាយឆ្លើយឆ្លងជាមួយមនុស្សជុំវិញខ្លួន បាត់បង់ចំណូលចិត្តសហការក្រុម និងមានភាពតានតឹង គួរតែផ្ដល់ឱកាសឱ្យខ្លួនឯង មានពេលនៅម្នាក់ឯង ដើម្បីឆ្លុះបញ្ចាំង និងទាញយកថាមពលបន្ថែម៕
