ការដើរជាលំហាត់ប្រាណ គេអាចដឹងជាទូទៅថា សកម្មភាពមួយនេះ បានរួមចំណែកពង្រឹងសុខភាពរាងកាយ អាចរក្សាគីឡូឱ្យមានតុល្យភាព រួមទាំងកាត់បន្ថយការកើតមាននូវជំងឺរ៉ាំរ៉ៃ ។ សកម្មភាពមួយនេះតម្រូវឱ្យអ្នក​ចាប់ផ្តើមពីជំហានតូចៗ ឬក៏ភាពឈ្លាសវៃនៃការជ្រើសរើសឧបករណ៍ជំនួយដើម្បីកាត់បន្ថយភាពនឿយហត់ តួយ៉ាងដូចជាការស្តាប់តន្រ្តីជាដើម។ តាមរយៈគេហទំព័រ Mens health បានបង្ហាញយុទ្ធសាស្រ្ត៤ចំណុចដើម្បីជំរុញសកម្មភាពដើរ ឱ្យក្លាយទៅជាទម្លាប់ប្រចាំថ្ងៃ។

១. ដើរនៅកន្លែងធ្វើការ ៖ ប្រសិនបើកិច្ចការ តម្រូវឱ្យអង្គុយធ្វើនៅមួយកន្លែងយូរៗ គួរណាតែសាកល្បងកំណត់នាទីដើម្បីដើរចុះឡើងយ៉ាងហោចណាស់ ធ្វើវាបានម្តងក្នុងមួយថ្ងៃ។

២. ប្រើប្រាស់កម្មវិធីឆ្លាតវៃ ៖ ដើម្បីតាមដានស្ថានភាពប្រចាំថ្ងៃ ការប្រើប្រាស់កម្មវិធីបច្ចេកវិទ្យាក្នុងការតាមដានសុខភាព (ឧទាហរណ៍នាឡិកាឆ្លាតវៃ) ដែលមានតួនាទីវាស់វែងជំហានដែលបានដើរ ជាកត្តាមួយជំរុញចិត្តឱ្យដើរបន្ត រួមទាំងអាចតាមដានគុណភាពនៃការគេង ចង្វាក់បេះដូង និងការកំណត់កាលវិភាគសម្រាប់រំលឹកបេសកកម្មប្រចាំថ្ងៃ។ បន្ថែមពីនោះ ការបំពាក់ឧបករណ៍តាមដានសុខភាពនៅជាប់ខ្លួន អាចជួយដាស់តឿនរាល់សកម្មភាពដែលមិនចម្រើនទៅកាន់សុខភាព ជំនួសមកវិញនូវការលើកទឹកចិត្តឱ្យឆ្ពោះទៅរកសកម្មភាពវិជ្ជមានចំពោះសុខភាព។

៣. និយាយបណ្តើរ ដើរបណ្តើរ ៖ ប្រសិនបើការពិភាក្សាអាចធ្វើបានដោយការជជែកគ្នាតាមរយៈទូរស័ព្ទជំនួសឱ្យការបើកជជែកតាមវីឌេអូ នេះគឺជាចំណុចមួយល្អចំពោះសុខភាពរាងកាយ ព្រោះនៅពេលជជែកគ្នាយូរៗ អារម្មណ៍ធុញទ្រាន់អាចកើតមាន ពេលនោះហើយគេអាចដឹងថា ការដើរចុះឡើងៗកំឡុងពេលនិយាយ អាចកាត់បន្ថយភាពនឿយណាយ។

៤. ការចតយានជំនិះ ៖ ការធ្វើលំហាត់ប្រាណតាមរយៈការដើរ មិនចាំបាច់ទាល់តែកំណត់គោលដៅដើរបែបផ្លូវការនោះទេ សូម្បីតែការព្យាយាមចតយានជំនិះឱ្យឆ្ងាយពីកន្លែងធ្វើការ ពីផ្ទះ ពីផ្សារ និងកន្លែងប្រើប្រាស់ដទៃទៀត សុទ្ធសឹងជាឱកាសអាចដើរបានច្រើន ហើយការដើរទាំងនេះ នឹងរាប់បញ្ចូលទៅជាជំហានទ្រទ្រង់សុខភាពទាំងអស់។  ទន្ទឹមគ្នានោះ នៅមានសកម្មភាពបន្ថែមមួយចំនួនទៀតដូចជា ការឡើងតាមជណ្តើរជើងជំនួសឱ្យជណ្តើរយន្តក្នុងករណីមិនប្រញាប់ខ្លាំង និងការចូលរួមជាមួយក្រុមមនុស្សដែលមានការប្តេជ្ញាចិត្តដើរ គឺដើម្បីស្រូបយកថាមពលវិជ្ជមានមកកាន់ខ្លួនឯង ៕