ដោយមានការគាំទ្រពីក្រសួងអប់រំ យុវជន និងកីឡា ពិព័រណ៍ជំនាញ និងសាកលវិទ្យាល័យ នៅឆ្នាំនេះ គ្រោងនឹងប្រព្រឹត្តទៅនៅថ្ងៃទី២២ និងថ្ងៃទី២៣ ខែវិច្ឆិកា ២០២៤ នៅមជ្ឈមណ្ឌលសហប្រតិបត្តិការកម្ពុជា-ជប៉ុន CJCC (RUPP) ដើម្បីជួយ​សិស្សអាចជ្រើសរើសជំនាញ និងសាកលវិទ្យាល័យដោយមានប្រសិទ្ធភាព តាមរយៈការជួបជាមួយនឹងស្ថាប័នអប់រំ និងសាកលវិទ្យាល័យនានា ព្រមទាំងនិស្សិតមានឱកាសស្វែងរកឱកាសការងារ និងហាត់ការផ្សេងៗ។

បើតាមលោក សុខ លាភ ដែលជាស្ថាបនិកនៃ Sala និង «ពិព័រណ៍ជំនាញ និងសាកលវិទ្យាល័យ» បានឱ្យដឹងថា ពិព័រណ៍ជំនាញ និងសាកលវិទ្យាល័យ ត្រូវបានប្រព្រឹត្តជាលើកទី៤ ដោយមានការគាំទ្រពីក្រសួងអប់រំ ក្នុងគោលបំណងចូលរួមចំណែកក្នុងការលើកកម្ពស់ការអប់រំថ្នាក់ឧត្តមសិក្សានៃយុវជនកម្ពុជា ក្រោយ​ពី​គេ​សម្លឹងឃើញបញ្ហាប្រឈមនៃយុវជនដែលមិនមានទិន្នន័យ ឬ ការប្រឹក្សាគ្រប់គ្រាន់មុននឹងសម្រេចចិត្តជ្រើសរើសជំនាញ ឬ សាកលវិទ្យាល័យណាមួយក្នុងការបន្តការសិក្សាថ្នាក់ឧត្តមសិក្សា។

បន្ថែមពីនេះទៅទៀត ការយកចិត្តទុកដាក់នឹងយុវជនផ្សារភ្ជាប់នឹងជំនាញ និងតម្រូវការទីផ្សារការងារជារឿងដែលភ្នាក់ងារ​ពាក់ព័ន្ធក្នុងវិស័យអប់រំ និងការងារ​ ត្រូវផ្តោតសំខាន់ដើម្បីឱ្យតម្រូវការនៃធនធានមនុស្ស និងជំនាញនៃយុវជនមានចំណុចប្រសព្វមួយរួមគ្នា ។ ហេតុនេះហើយ ក្រៅពីសិស្សដែលកំពុងសិក្សាថ្នាក់វិទ្យាល័យ និងសិស្សទើបប្រឡងមធ្យមសិក្សាទុតិយភូមិ (បាក់ឌុប) កម្មវិធី «ពិព័រណ៍ជំនាញ និងសាកលវិទ្យាល័យ» ក៏មានរៀបចំជាស្តង់ការងារក្នុងក្តីស្រមៃ ព្រមទាំងការចែករំលែកបទពិសោធន៍ពីវាគ្មិនដែលមានសមត្ថភាព និងចំណេះដឹងពាក់ព័ន្ធនឹងទីផ្សារការងារចូលរួមផងដែរ ដើម្បីនិស្សិតមកពីបណ្តាសាកលវិទ្យាល័យនានា មានឱកាសក្នុងការជួបនិងសំណេះសំណាលពីការត្រៀមលក្ខណៈឈានទៅរកការងារក្នុងក្តីស្រមៃផងដែរ។

កម្មវិធី «ពិព័រណ៍ជំនាញ និងសាកលវិទ្យាល័យ – University &TVET Fair 2024» នឹងប្រព្រឹត្តទៅរយៈពេលពីរថ្ងៃគឺ ២២ និង២៣ វិច្ឆិកា ២០២៤ ពីវេលាម៉ោង ៨ ព្រឹក ដល់ម៉ោង ៥ ល្ងាច​ ដែលនឹងមានសកម្មភាពនានាដូចជា ការដាក់ស្តង់នៃសាកលវិទ្យាល័យរដ្ឋ និង​ឯកជននានា ស្ថាប័នធ្វើការលើវិស័យអប់រំ យុវជន និងការងារ ព្រមទាំងការចែករំលែកបទពិសោធន៍ពីវាគ្មិនដែលមានសក្តានុពលពាក់ព័ន្ធនឹងប្រធានបទ «យុវជន និងការត្រៀមលក្ខណៈចូលសាកលវិទ្យាល័យ ឬ ការងារ» ។ អ្វីដែលពិសេសជាងនេះទៅទៀត កម្មវិធីនឹងមានការប្រកួតជជែកដេញដោលក្រោមមូលបទពាក់ព័ន្ធនឹង «យុវជន និងការអប់រំ» ដែលអនុញ្ញាតឱ្យសិស្សអាចថ្លឹងថ្លែងមុននឹងការសម្រេចចិត្តជ្រើសរើសជំនាញ និងសាកលវិទ្យាល័យផងដែរ។

គួរបញ្ជាក់ផងដែរថា «ពិព័រណ៍ជំនាញ និងសាកលវិទ្យាល័យ» ត្រូវបានរៀបំដំបូងឡើយកាលពីជំនាន់កូវីដ១៩ តាម​រយៈអនឡាញ និងបន្តរៀបចំជារៀងរាល់ឆ្នាំរហូតមកដល់ឆ្នាំ២០២៤ កម្មវិធីនេះនៅតែបន្តសកម្មភាពដើម្បីឆ្លើយតបនឹងបេសកកម្មរបស់ខ្លួនក្នុងវិស័យអប់រំ​ ដើម្បីយុវជនអាចទទួលបានជំនាញដែលសាកសមនឹងក្តីស្រមៃរបស់ពួកគេព្រមទាំងត្រូវជាមួយនឹងទីផ្សារការងារផងដែរ៕